ZPM Intuaitharna hun Lalduhoma’n a hmanpui

ZPM Party chuan nimin khan Aizawl Ramhlun Indoor Stadium Conference Hall-ah ZPM General Headquarters, Organisation Department ten intuaitharna hun an hmang. He hun hi ZPM Leader leh Chief Minister Lalduhoma chuan hmanpuiin, “Party insawhngheh hi thil pawimawh tak mai a ni, chumi tur chuan Constituency hrang hrangte viltu tur kan inruat thin a ni. ZPM Party pawh Party naupang tak kan la ni a, Party inrel-bawlna kawngah zir tur kan la ngah hle mai a, insawhngheh chhoh zel kan ngaih avangin intuaithar reng hi kan ngai a ni,” a ti a. “Party hi a malin a kal thei lova, Ministry leh mipui nen inpawh tlang takin a kal tur a ni a, Sawrkar tha tichak tur leh hmalaknate tihlawhtling turin party hi a insawh-ngeh a ngai a ni. Party ah inlungrualna a awm loh a, innghirnghona a nasat viau chuan Ministry in a tuar a, hmasawnna hnathawh thlengin a tuar a, ramin a tuar thin a ni,” tiin hotute thuawih a pawimawh thu leh thawhpui te tana thawhpui nuam nih a pawimawh thu a sawi bawk.