Chhingchhip khua ASF hri lenna ah puan ve leh a ni
Serchhip District chhunga Chhingchhip khua ah hian tunhnai ah Vawk thi a awm nual a, heng Vawk thi te hi African Swine Fever (ASF) vanga thi an ni tih finfiah ni tawhin he hri a darh zel loh nan Dr. Biaklianzuali, Sr. Veterinary Officer Serchhip chuan ‘The Prevention & Control of Infectious and Contagious Disease in Animal Act 2009, Section 20 Sub-section 1’ in thuneihna a pek angin Chhingchhip khua hi May 15, 2024 atangin Vawk hri lenna hmun (Infected Area)-ah a puang a ni.
Heti hian Serchhip District chhungah Khumtung khua leh Chhingchhip khua te hi Infected Area-ah puan ni tawhin Infected Area atang hian Vawk, Vawksa leh Vawksa atanga thil siam reng reng lakchhuah emaw, lakluh emaw khap tlat a ni a, Vawk thi reng reng paih mai lovin Chinai/Disinfectant nen thuk taka phum ngei tur a ni a. Vawk talh leh vawksa zawrh khap tlat ni bawkin, Vawk thi an awmin AH & Vety Department Official te hnenah hriattir vat thin tur a ni.
Serchhip District chhunga ASF hri lenna hmuna puan khaw pahnih ah hian nimin thleng khan ASF vanga Vawk thi 53 zet awm tawhin Vawk 97 suat a ni tawh a. Chhingchhip khua ah hian nimin khan Vawk thi pakhat chhinchhiah belh leh niin heng te nen hian kumin ah ASF vang hian Vawk 11 thi tawhin Vawk 48 suat a ni tawh a. Khumtung khua ah hian nimin khan Vawk thi 9 awm belh leh bawkin a vai hian Vawk note a ni a, Vawk 6 suat a ni bawk a. Khumtung khua ah hian ASF vangin Vawk 42 thi tawhin Vawk 49 suat a ni tawh bawk a ni.
Hetihlai hian Mizoram pumah nimin khan ASF vanga Vawk thi 17 awm belh lehin kumin ah ASF vanga Vawk thi 718 a awm ta a, nimin vek khan vawk 6 te chu suat leh niin ASF vangin Vawk 640 suat a ni ta bawk a ni.
Comments
Post a Comment