MCC zawh hunah thlai thar lei turah Policy atangin Programme-ah kan lut dawn - Adviser to CM

Mizoram sawrkar-a Adviser to Chief Minister Dr. KC. Malsawmzauva chuan Model Code of Conduct a zawh hunah thlai thar lei tura an ruahmante mumal zawka puangzarin policy atangin Programme-ah an lut dawn tih a sawi a, “ZPM Policy thlai thar lei tura hmalakna kalpui thuai kan chak tawh takzet a ni,” a ti.

ZPM Party in nimin-a Aizawl-a Chhung Inkhawm an neih ah Adviser to Chief Minister Dr. KC. Malsawmzauva chuan Model Code of Conduct a zawh hunah thlai thar lei tura an ruahmante mumal zawka puangzarin Policy atangin Programme-ah an lut dawn tih sawiin, “Heng thlai thar leitu turte hi kan dawr mek zel a, agreement mumal tak kan siampui ang. Politics rawngkai lova rual taka kan kal theih nan Regulated Market Society-a kalpui kan tum avangin Firming Society din tur a ni a, chuvangin Cooperation hnuaiah Society tinin Registration an tih a ngai,” a ti a. “Mi rethei lamtang tur kan nih avangin anmahni khaichhuah hi kan tum ber a ni a. Agriculture Department hnuaiah Marketing Board din a ni dawn a, Cabinet Meeting hmasa berah chhawpchhuah tum a ni. Thlai thar pali - Sawhthing, Aieng, Hmunphiah leh Hmarchate hi kan leina tur rate bithliah aia sanga an hralh theih chuan sawrkar inrawlh kher kan tum lo,” tiin Rate bithliah an siam hi Grade A niin Sawhthing leh thlai dangte aiin Hmarcha chu Market tha ber a nih thu a sawi bawk.

Thlai thar lei chungchangah kut hnathawktute an dik a ngai tih pawh sawiin, “Hralh duh luat vang leh hlawk tum luat vangin dik lo taka thlai thar te hralh duh an awm thin a, mi depde leh hlemhle te avangin mualpho theih a ni,” a ti a. “Kan sawrkar tirh khan Hmunphiah chungchangah sawiselna kan tawk a, uluk zawk leh tha taka kan kalpui theih nan rate bithliah chungchangah pawh kan fimkhur hle a, Mizoram hmun hrang hranga an chinte zirchian mek zel a ni. Warehouse paruk (6) siam tum a ni a, dahthatna hmun kan neih chuan a thar loh hunah pawh hralh theih a ni ang,” a ti bawk.

Bana kaih (Hand holding) Policy an zawrh chungchangah hma la turin Department 17-te sawihona an neipui tawh thu pawh Adviser to Chief Minister chuan sawiin, “Agriculture & Allied Sectors, Tourism leh Industry-ah te Pilot Project kalpui phawt tur a ni a. Thlai thar lei kan tum avangin hei hi kan hmanhmawh chuk chuk thei rih lova, Sem policy ang ngawta kalpui tur a nih loh avangin Hand Holding hi Bank Loan hmangin Project Base-a kalpui kan tum a ni,” a ti a. Hei bakah hian Chief Minister Special Package pawh awm thei tura ruahman chhin a ni tih sawiin, “Ruahmanna felfai tak nen fimkhur taka kan kal a ngai a, hlawhtlin kan tum takzet zet a ni,” a ti bawk.