Mizoram-a Power Supply khaihlak fo leh mumal zawka Power Supply pek dan tur sawiho a ni

Tunhnaia Mizoram hmun hrang hranga Power Supply khaihlak fo chungchang leh Power Supply mumal leh tha zawka mipuite hnena pek theih dan tur chu niminpiah khan sawiho a ni.

He sawihona hun P&E Minister F. Rodingliana kaihhruaia neih ah hian P&E Department-a Superintending Engineer chin chunglam telin P&E Minister chuan kawlphetha a intodelh tura hmalakna kawngah P&E Department Officer te chu ram hmangaihna leh siamthat duhna thinlung pu chunga hnathawk turin a chah a. Tunhnaia Mizoram Sawrkar in kawlphetha leina man ba cheng vbc. 81 lai mai a pek avangin Mizoram Sawrkar chungah lawmthu a sawi bawk.

P&E Minister chuan tunlaiin thli leh ruah avanga kawlphetha pekchhuah kawnga mipuiten harsatna an tawk chu pawi a tih thu sawiin, kawlphetha hnianghnar a mipuite pek anih theih nan P&E Department in theihtawp a chhuah zel tur thu a sawi a. Aizawl khawpui bikah kawlphetha tha zawka mipuite hnena pekna tur hnathawh mek, RDSS leh Smart City Project thawh mek chu hmun thuma then hmunkhat thawh zawh tawh a nih thu a sawi a. Hmasawnna hnathawh avangin power Shutdown lak zauh zauh a la ngai rih dawn tih pawh sawiin, mipuite lo hrethiam turin a ngen nghal bawk a ni.

He Meeting-ah hian Transformer chhia avanga kawlphetha pek kawnga harsatna awm mekte chinfel nan State Budget-a Transformer thar leina tur pawisa dah hmangin Transformer thar te Company atanga direct a man tlawm zawka lei dan tur ruahmanna te thlirho a ni a. Mizoram hmun hrang hranga Power Supply chungchanga harsatna awmte report zung zungna tur Customer Care Centre (CCC) chu ni khat (1)-a darkar 24 function tura tuaithar leh nghal nise tiin SE Level Officer pakhatin a bik taka vil tura rel a ni. He Customer Care Centre(CCC) kaltlang hian ramchhung khawi lai atang pawhin Power Supply chungchang harsatna thlen theih a ni anga, Duty ten a changtu Division/Sub-Division te hnenah an bawhzui turin an hriattir vat thin dawn a ni.

Hydel Project hrang hrangte tuaithar dan tur leh Power tam zawk siamchhuak thei turin ruahmanna hrang hrang  pawh he thutkhawm ah hian siam a ni bawk a, Mizoram hmun hrang hranga kawlphetha pekchhuahna ruhrel siam mekte thlirho nghal niin, heng hnathawh mek thenkhat a harsatna awmte sawiho niin chinfel dan tur ruahmanna siam nghal a ni.