Vote chhiar turin Serchhip District a inpeih thawkhat
Lok Sabha Inthlanpui neih a Serchhip District huamchhung Assembly Segment pathum (3)-a vote tla te chhiar dan tur leh inbuatsaihna te chu nimin khan Serchhip DC Meeting Room-ah District Bawrhsap David Lalthantluanga hovin thlirho a ni a, he hunah hian Bawrhsap chuan Vote tla chhiar tur atana mawhphurhna hrang hrang nei te chu an hna theuh tha taka hlen turin a chah a ni. He thutkhawm ah hian Election Officer Gaston Vanlalhriatpuia chuan Vote chhiar tura inbuatsaihna kalpui dan sawiin, May ni 22, 2024 hian EVM Engineer te Serchhipah lo kalin First Level Checking neih tum a nih thu a sawi a. May ni 29 leh June ni 3-ah te Vote chhiartu tura ruatte training neihpui an nih dawn bakah May ni 28 ah hian an awmna tur randomization tihfel tum a nih thu a sawi bawk.
He hunah hian Serchhip SP MS. Dawngkima chuan Vote chhiar ni hian venhimna khauh taka kenkawh a nih tur thu sawiin, ECI in ruahmanna a siam anga an inpeihfel tawh thu a sawi a. DC Office Gate pui-ah lirthei tlanluh phal anih dawn loh thu a sawi bakah tha taka vote chhiar anih theih nan an tih turte an hlen ngei theih a beisei thu a sawi bawk.
Lok Sabha Inthlanpui-a Vote tla te June 4, 2024-a chhiar turah hian ECI-in phalna a pek Authority Letter nei chanchinbu mite tan Counting Hall bulah Media Centre siam an ni dawn a. Media Centre atang hian Round tina vote tla chu mipuite hriat turin au rinna hmanga puan chhuah a ni ang.
Comments
Post a Comment