Ramri hung leh FMR hlih tum duhloh lantirin ZORO in ‘Peaceful Rally’ an huaihawt

India Sawrkarin Indo-Burma Border hung a tum leh Free Movement Regime (FMR) hlih a tum duhloh lantir nan nimin khan Mizoram-a Zokhawthar leh Vaphai khua bakah Manipur-a Tengnopal District-ah ‘Peaceful Rally’ neih a ni.

Zo Re-unification Organisation (ZORO) bultuma ‘Peaceful Rally’ Zokhawthar Burma Border-ah hman ah ZORO President R. Sangkawia chuan Border Fencing leh Free Movement Regime (FMR) hlih duh loh lantirna chu pawl mal hmalakna mai ni lovin, Hnam Issue tak tak a nih thu leh Zofa zawng zawng hmalakna a ni tih a sawi a. UN Declaration on the Rights of Indegenous Peoples 2007 Article-ah chuan, ‘Tualto hnamte a bik takin khawvel sawrkar ramri khamin a thendarh te chu an inkawlpawhin an intanpui anga, Sakhaw thil leh khawtlang thil, ei leh bar leh politics-ah te anmahni mi leh sa te nen inpawh a, sawiho theihna dikna chanvo an nei a ni. Ram roreltute chuan tualto hnam te nena inberawn in he dikna chanvo te hi tipuitling tuirn hma an la ang,’ tih a ni tih sawiin, “ He dan pass a nih lai hian India chuan a duhlo lama vote a pe a, tunah erawh a kalh zawngin hmalak a tum hi kan hrethiam thei lova. Border fencing a tum leh FMR hlih a tum hi kan dodal zel dawn a ni,” a ti bawk.

He hunah hian ZORO General Secretary L. Ramdinliana Renthlei chuan Zofate hi kan duh vang ni miah lovin ram bung thum-ah thendarh kan ni tih sawiin, “Zofate thendarh kan nih tirh a kan rilru a cham reng chu insuihkhawm leha, rorelna pakhat hnuai awm a ni, kan beisei kan nghah mek laiin India Sawrkar chuan ramri hung a tum a, zalen taka kan inkalpawhna FMR hlih a tum mek a ni,” a ti a. “India Sawrkar hmalakna hi ngawi rengin kan thlirliam mai dawn nge, na zawkin ke kan pen dawn? Zofate min thendarh tum tute hi kan neklet ve dawn lawm ni?” tiin “India Sawrkarin a thil tum hi a ti lui a nih chuan kan thiam angin kan chhang let ve ang. Ramri a hung lui a, FMR a hlip lui a nih chuan Zofate Independence min puansakah kan ngai dawn a ni,” a ti bawk.

Peaceful Rally hi Vaphai khuaah chuan VC kaihruaina in zing dar 7:00-ah neih niin ZORO General Hqrs. Vice President Rohmingthanga Kawlni bakah YMA, VC leh MUP aiawh ten thu an sawi a, Vaphai leh khaw thenawm atangin mipui thahnem tak an pungkhawm a. Manipur Tengnopal District-ah pawh ZORO General Hqrs. buatsaihin Peaceful Rally hi neih a ni a, Kuki Inpi leh Kuki Students’ Organisation chuan he hun hi buaipuiin Tengnopal District-ah ramri hung duhlotu leh Free Movement Regime thiah duhlo mipui thahnem tak an pungkhawm a, thuziak hrang hrang kengin kawng an zawh bawk a ni.