Mizoram leh Assam ten inrem taka hmasawnna rahbi kan rah chhoh tlan zel a tul - Chief Minister

Chief Minister Lalduhoma chuan Mizoram State leh Assam State chu ram inthenawm kan nih angin kawng tinreng ah kan in mamawh tawn thu leh kan tanho a ngai tih a sawi a,, “Inrem taka hmasawnna rahbi kan rah chhoh tlan zel a tul hle,” a ti bawk.

Assam Cultural Society Mizoram bultuma Rongali Bihu (Assamese New Year) lawmna hun Inrinni-a Aizawl Vanapa Hall-a neih a hman-puina ah Chief Minister Lalduhoma chuan kan hriat theuh angin Mizoram chu British awpna hnuaiah Assam huamchhungah hun rei tak kan bet tih sawiin, chumi hnuah District Council te neiin State hrang kan nei chho ta zel tih a sawi a. “Ram inthenawm kan nih angin kawng tinrengah kan inmamawh tawn a, kan tanho a ngai a, inrem taka hmasawnna rahbi kan rah chhoh tlan zel a tul hle,” a ti a. Kumin kumtir lama Assam Chief Minister Himanta Biswa Sharma nena an inkawmnaah pawh ramri-a boruak ralmuang awmtir leh harsatna siam lo zawng zela awm an remti dun tih sawiin, “Chhan hrang hrang avangin Assamese engemaw zat Mizoram-ah in awm mek a, thlamuang tak leh hlim taka in awm kan beisei. In hun remchangah fang kual ula, kan nunphung leh hmunhlui te tlawh ula, inunauna leh inhriatpawhtawnna tha i siam zel ang u,” tiin a sawm a ni.

Chief Minister chuan hnam tin hian tobul kan nei theuh tih pawh sawiin, “Hnam nun ze mawi leh tihdan phung tha tak tak kan nei thin. Chung pi leh pute atanga tihdan tha leh hnam nun zemawi tak tak te chhawmnun zel hi a mawi em em a, thangtharte mawhphurhna pawimawh a ni,” a ti a. Mizoram cheng Assam Cultural Society ten Assamese hnamzia vawnghim a Rongali Bihu an lawm thin pawh a mawiin a zahawm hle tiin Assam Cultural Society hmalakna a fak bawk.

Rongali Bihu lawmnaah hian Assam Cultural Society, Mizoram-a President Dr. PC. Kalita chuan kalkhawmte lawmna thu sawiin, Mizoram-ah Assamese hi mi 500 vel kan cheng mek tih a sawi a. He hun an hmanah hian Bihu lam leh zai te, Assamese hnam ze pholang thei thil te entir a nih bakah Nepali lam te, Cheraw te entir a ni bawk.