Ram pass lem hmanga zangnadawmna la a puh mi 23 te Special Judge-in thiamloh a chantir

India leh Bangldesh ramri hungna tur atana sawrkarin mimal ram a laksak ah Land Settlement Certificate (LSC) lem hmanga zangdawmna la mi 23 te chu Prevention of Corruption Act, Special Judge HTC. Lalrinchhana chuan thiamloh a chantir.

Thudawn danin he thubuai hi kum 2007 bawr vela India leh Bangladesh ramri hung hna (Indo-Bangla Border fencing) thawh na tur atana sawrkar in mimal ram a lak sak ah Ram Pass (LCS) lem 35 zet hmangin zangnadawmna dawng a hriat a nih atanga intan a ni a, he thubuai ah hian khatih hunlai a CADC a Revenue Officer (Settlement) Ranga Mohan Chakma chu Ram Pass lem pechhuak tu ber a puh a ni a, CADC hnuaia Surveyor dang pahnih Borcheg Image Chakma leh Manabendra Chakma te nena inthurual in ram lak ngai tur hming (List) pawh dik lo taka inthurual a siama puh an ni bawk. Hemi thubuaia an Ram Pass pek chhuah ho hi a zavai deuhthaw hian sawrkar pisa chawlhni a pek chhuah anga tarlan a ni bawk a. Hei bakah hian Ram Pass ah hian CADC (Agricultural Land) Act, 1983 leh CADC (Agricultural Land) Act, 1993 hnuai a pekchhuah anga tarlan a nih laiin he dan hi a awm lova, CADC (Agricultural Land) Act, 1982 chauh hi an dan neih a ni thung.

He thubuai hi Central Bureau of Investigation (CBI) chuan chhuiin Ram Pass lem hmanga zangnadawmna (Compensation) la nia tarlan mi 21 bakah a hunlaia CADC a Revenue Officer (Settlement) Ranga Mohan Chakma leh CADC hnuaia Surveyor dang pahnih Borcheg Image Chakma leh Manabendra Chakma te bakah khatih hunlaia Lawngtlai DC Pisa-a UDC David C. Darduna chu hemi thubuaia zangnadawmna pechhuak tu ber a nih bawk avangin thubuai siam sak a ni a. He thubuai hi chhui a nih hnuah CBI hian thuhretu mi 34 te Court-ah thu an zawtfiah a, Zangnadawmna dawn duh vanga thuneitute bum ah te, lehkha lem leh diklo a tak anga thuneitute hnena an hman vang te leh sawrkar hnathawk an thuneihna anmahni emaw, mi tute emaw tana hman khawloh leh chutianga inthuruala dan bawhchhia a puhna ah mi 23 chu thiamloh a chantir a, lung In-a khung nghal tura tiin midang pahnih chu thubuai ngaihtuah lai hian an thi hman a ni.