MBSE in kumin a HSLC Exam Result tichhuakin Zirlai Exam zinga za zela 73.37 in an pass

Mizoram Board of School Education (MBSE) chuan kumin a pawl 10 zirlaite tana High School Leaving Certificate (HSLC) Exam a buatsaih result chu nimin khan tichhuakin Exam beitu zirlai zawng zawng zinga za zela 73.37 ten an pass a, Zirlai pass vekna School 85 awmin Pass nei lo School 18 an awm bawk a ni.

Mizoram Board of School Education (MBSE) in nimin-a HSLC Exam 2024 Result a tihchhuah ah hian Zirlai Exam beitu mipa 8654 leh hmeichhia 9907, an vaiin mi 18,561 awmin heng zingah hian Mipa 6437 leh hmeichhia 7181, an vaiin 13,618 ten an pass a, Zirlai 4837 te Fail in Comparmental Chance nei 106 an awm bawk a ni. Kumin a HSLC Pass thar zingah hian Distinction-a pass 1332 awmin 1st Division-a pass 3801, 2nd Division-a pass 5564 leh 3rd Division-a pass 2921 an awm a, Exam tura inziaklut zingah Exam lo 434 an awm bawk a ni. Kumin a HSLC Exam-a pass zingah 13,477 te hi Regular Candidate an nih laiin Private Candidate zingah mi 141 te an pass ve bawk a ni.

Kumin-a HSLC Result chhuak ah hian a pumpui-ah Lalmoipuia Lawmzual s/o HL. Lawmzuala, St Paul's HSS chuan Mark 550-ah 485 hmuin Mizoram pumah pakhatna a ni a, Vanlalmuanpuii d/o R.Lalthazuala, St Paul's HSS chuan Mark 480 hmuin pahnihna a ni a, H. Lalsangpuia s/o H.Lalhumhima, St. Joseph HSS chuan Mark 478 hmuin pathumna a ni bawk. Kumin hian Top 10-ah Zirlai 14 langin St. Joseph HSS atangin 5, St Paul's HSS atangin mi 4 leh Mount Carmel School, Greenland HSS, St. James School, K.D. High School leh Goodwill English Academy (Serchhip) atangin Zirlai pakhat theuh an lang a, Aizawl pawn lamah Goodwill English Academy atang chauh hian lang an awm niin a lang.

Kumin hian School pakhat atanga Zirlai Exam zawng zawng pass vekna School 85 awmin Zirlai Exam zawng zawng Fail vekna School 18 a awm a. Management-wise a chhutin Sawrkar School atanga Exam zingah za zela 63.28 pass in Deficit School-ah za zela 91.2 an pass a, Aided School-ah za zela 66.36 pass in Lumpsum School-ah za zela 74.45 an pass a. Private School zirlai za zela 83.22 an pass bawk a ni.

MBSE Chairman JH. Zoremthanga chuan kumin hian zawhna har zawng tehnaa a zangkhai deuh, LOTS zawhna zaa 60 leh a bak zaa 40 chu tlema har deuh Application leh HOTS atanga siam a nih thu a sawi a, HOTS zawhna chu telh tam deuh deuh tura ruahman a nih thu a sawi bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar