Green Mizoram Day 2024 hman dan tur ruahman

Mizoram ti hring tura thingphun beihpui thlakna ni, ‘Green Mizoram Day 2024’ chu kumin hian ‘I nunna atan thing phun rawh’ tih thupui-ah hmangin hman leh a ni dawn.

State Level Sub Committee on Green Mizoram, 2024 chu nimin khan Forensic Science Laboratory Conference Hall-ah thukhawmin kumin a Green Mizoram Day hman dan tur hi sawiho a ni a, kumin-a State Level Inaugural function leh he ni puala thing phunna hmun atan Zokhawsang, Assam Rifle’s Complex chu thlan niin Ramngaw humhalh kawnga thawk tha bik mi pathum hnenah chawimawina Rs. 10,000/- theuh leh Citation pek nise an ti a. State Level leh District Level a kangmei veng tha District leh khua te chu kumdang a tih thin angin lawmman pek leh tur niin kumin hian ‘I nunna atan thing phun rawh’ (Plant trees for your life) tih chu thupui atan thlan a ni.

Kumin-a Green Mizoram Day-ah hian sawrkar department te leh Institution hrang hrang te’n hmun rem an neih chuan thing tiak phun se tiin EF&CC Department in kuminah pawh thing tiak mamawhte tan a tul angin a ruahman anga. He ni denchhen a thingtiak la zawng zawng ten an thingphun te an enkawl zui ngei ang tih intiamkamna nen kumin hian thingtiak hi pekchhuah nise an ti bawk.

He thutkhawm ah hian nikum lama an hmalakna te thlirlet niin chhinchhiahna atanga a lan dan chuan nikum khan thingtiak 29,839 chu phun a ni a, thingtiak 1,26,722 chu Department hrang hrang hnenah leh NGO dangte hnenah sem a ni bawk.