Ration Card block tumna a awm lo tih sawi

Food, Civil Supplies & Consumers Affairs Department chuan Ration buhfai la lo/la ngai lo te'n e-pos machine an hmeh loh avangin Ration Card block tumna sawrkar-in a nei lo tih an sawi.

Nimin-a FCS&CA Department Director in thuchhuah siama a tarlan danin tunlai hian Veng thenkhat leh Khaw thenkhatah, 'Ration buhfai khul lo/la ngailo te pawhin e-pos machine hmeh vek tur a ni, hmeh loh chuan Ration Card an block dawn' tiin thu thehdarh ni a hriat a nih thu leh hei hi thu belhchian dawl lo a ni tih a tarlang a. “Ration buhfai la lo/la ngai lo te'n e-pos machine an hmeh loh avangin Ration Card block tumna sawrkar-in a nei lo,” a ti a. E-pos machine hmeh chu an Ration an la ngei e tih finfiahna chauh a ni tih tarlangin, “Mipui ten an ration an la (khul) lo anih pawhin retailer-ten an tiriral/hralh mai tur a ni lova, thla thara sem leh turin mipui tan an dah tur a ni. Sawrkarin mipuite tan pawisa tam tak senga buhfai a lei hi e-pos machine kaltlang lova tihral/hralh mai hi dan bawhchhiatna a ni a, e-pos machine kaltlangin a dawngtu tur dik takte hnenah chauh sem tur a ni,” an ti a. He thilah hian mipuite leh retailer zawng zawngte chu sawrkar tawiawm tlat tur leh dan zawm tlat turin an sawm tak meuh tih he an thuchhuah ah hian an tarlang bawk a ni.