Kolasib District-a Bank te hmalak dan thlirlet a ni

Kolasib District chhunga Bank hrang hrangte hmalak dan thlirin District Consultative Committee, District Level Review Committee & District Level Security Committee chu nimin khan an thukhawm.

Kolasib DC Conference Hall-a thutkhawm hi District Bawrhsap John LT. Sanga chuan kaihruaiin Bank chu mipui indawrtawnna hmun lun leh pawimawh tak a nih angin anmahni dawrtute dawnsawn kawngah hawihhawm leh dawhtheihna neih thin a pawimawh thu a sawi. Thutkhawmna hmasa a lo rel tawh hmachhawp hrang hrang bawhzui a nih dan thlirletin mihring 2000 aia tlem awmna khaw 29 zinga khaw 23-a cheng ten Bank kalhmang an hriatna tur leh an hman tangkai theihna turin Business Correspondence dah a nih thu leh a bak khaw 6 chu Indian Postal Payment Bank-in a tuam tawh thu tarlan a ni a. Annual Credit Plan-in kuthnathawktute tihhmasawn nana hmachhawp a siam atanga 96.81% chu tihfel tawh a nih thu leh Crop Loan pekchhuah tur erawh bituk zat atangin za zel a 49.79 chauh pekchhuah hman a nih thu tarlan a ni bawk.

Hei bakah hian Bank-a Sum dahluh leh Loan hmanga pekchhuah zat, Credit Deposit Ratio chu za zelah 69.01 a nih thu thutkhawmah hian tarlan niin hei hi kum hmasa nen khaikhinin za zel-a 6.43-a puang ang a ni a, ‘Annual Credit Plan for Financial Year 2024-25’ chu he hunah hian tlangzarh nghal a ni bawk.