Serchhip District AIDS Prevention Control Committee in HIV/AIDS dona kawnga hmalak dan tur an sawiho
Serchhip DC Meeting Hall-a he thutkhawm ah hian District Bawrhsap David Lalthantluanga chuan Serchhip District chu ram laili a awm, ramdang nena inrina pawh tlem te chauh nei niin HIV/AIDS leh a kaihhnawih ah pawh kan dinhmun a tha viau thin tih a sawi a, amaherawh chu heng natna te hi Mizoram-ah a hluar zel thu leh Serchhip District pawh kan dinhmun a tha tak lutuk bik lo tih sawiin, Mizoram State AIDS Control Society (MSACS) te nen pawh nikum lamah hmalakna kalpui a lo nih tawh thu leh nasa zawka hmalak zel a tul thu te a sawi bawk a ni.
He thutkhawm ah hian District AIDS Prevention and Control Committee-a Member Secretary, Dr. Lalnunhlima Khiangte chuan HIV/AIDS a Mizoram dinhmun leh Serchhip District dinhmun tlangpui tarlangin, Serchhip District-ah hian HIV kai thar hi pung hluai lo mah se a punna hi nghet takin a kal reng thu a sawi a. Nikum September thla atanga kumin January thla thleng khan Serchhip District-ah Integrated Health Campaign (IHC) neiin hetah pawh hian HIV hrik pai mi 30 lai hmuhchhuah belh an nih thu a sawi a. Heng mite hi ART Centre-a kal tura an tih bakah IHC ah hian Hepatitis B vei mi 46 leh Hepatitis C vei mi 151 lai hnuhchhuah an nih thu te pawh a sawi bawk a ni.
He hunah hian Health Department-a Joint Director Zuiliani Hrahsel chuan kumin June thla atanga October thla thlenga Intensive HIV/AIDS Awareness Campaign-in Rural Areas ‘Zoram Harh rawh Campaign’ neih tur chungchang leh District Community Resource Group (District CRG) siam chungchang te a sawifiah bawk.
He Meeting hian District AIDS Prevention and Control Committee member te telin Kohhran hrang hrang ah leh School sang chinah HIV/AIDS do kawng ah awmze nei zawkin beihpui thlak thar leh nise tiin an ti a, Sawrkar duh dan angin AIDS/HIV natna vei te nena tha zawka thawhhona turin Community Resource Group din nise an ti bawk a, heng bakah hian hmalakna tur thenkhat an rel bawk a ni.
Comments
Post a Comment