Millennium Centre sak zawm dan tur sawipui

Chief Minister Lalduhoma’n nimin khan a Office-ah Aizawl Millennium Centre thuneitute kawmin Millennium Centre enkawl dan leh sak chhunzawm chungchangte a sawipui.

Chief Minister hian Millennium Centre Authority Manager, R. Lalnunpuia leh a thawhpui te hnenah Millennium Centre-a vantlang inthiarna man chawi lova kalpui theih a nih leh nih loh te, dawr neitute leh a luah chhawngtute inkarah luah man mumal zawk leh inremna dan tha zawk a duan theih em tih te chu Governing Body-in lo ngaihtuah se tha a tih thu a lo hrilh a. Millennium Centre inenkawlna tha taka a kal zel chu lawmawm a tih thu a sawi bawk.

He hunah hian Millennium Centre Authority Manager, R. Lalnunpuia chuan Millennium Centre sak a nih dan kimchang leh tuna an dinhmun te, Chief Secretary kaihhruai Millennium Centre Governing Body-in North Block Building chung lama sak belh tura ruahmanna a lo duan tawh te a sawifiah a. Millennium Centre hi Structural Safety Certificate nei, a original design anga chhawng 4 la sak belh theiha him a ni a. Tun dinhmunah chhawng khat, Food Court tur bik sak belh dan ngaihtuah phawt ni se tiin Governing Body chuan ruahmanna a nei a; an ruahmanna hi Chief Minister hnenah hian an thlen nghal bawk a ni.

Millennium Centre sakna sum hi a tir atangin Bank Loan hman a ni a, sawrkar sum ruahman a ni lo a. Loan hi an rul zo vek tawhin tuna sak zawm lehna tur pawh hi sawrkar sum hmang lova kalpui leh tur a ni.

Tunah hian Millennium Centre-ah hian dawr 342 a awm mek a, an zinga 4 hi hun bi neia luahtir a ni a; a dang te chu a leitute hnenah kum 91 chhung atan pek a ni a. Thawktu nghet 8 an awm mek a, rukruk ching lak inven nan High Definition CCTV 66 an vuah bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar