Mizoram-ah Tuialhthei khuahkhirhna hman tihtawp niin tuialhthei harsatna a ziaawm beisei a ni

Mizoram sawrkar chuan Tuialhthei khuahkhirhna a hman mek chu Inrinni khan a titawp tih a puang a, khuahkhirhna awm lovin hralh leh zawrh theih a ni.

Rel kawng chhia vangin Petrol leh Diesel lakluh chungchang ah Mizoram in harsatna a tawk a, hei vang hian Food, Civil Supplies & Consumer Affairs Department chuan POL lei leh hralh chungchangah inkhuahkhirhna dan a lo siam tawh a, Rel kawng a that tak avangin Inrinni khan inkhuahkhirhna hi an hlip ta a ni. Mizoram sawrkar thuchhuah tarlan dan chuan, tun dinhmunah Mizoram aiin Tripura-in harsatna an tawh nasat zawk avangin Rel-in Tuialhthei a phurh hmasak pahnih chu Tripura tan zuah phawt a ni ang a, a pathumna chu Mizoram sawrkarin theihtawpa hma a lakna zarah Mizoram tan IOCL hotuten ruahmanna an siam a ni. Hetianga Rel kawng a lo that takah chuan POL (Petrol leh Diesel) hi dan pangngai angin tluang takin chatlak lovin lakluh chhunzawm theih a ni tawh ang. Mizoram in Tuialhthei a harsatna a tawh mek chu ziaawm chho zel tura ngaih a ni a, mipuite lo chi-ai lo turin Food, Civil Supplies & Consumer Affairs Department chuan a ngenin a hriattir a ni.

FCS&CA Department thuchhuah chuan Petrol pump thenkhat a hlawma black-a zawrh tur lo pechhuak thin an awm tih hriat a nih thu pawh thuchhuah siama tarlangin, hemi vil tur hian District hrang hranga FCS&CA Department, Deputy Commisisoner Office leh SP Office tangkawp ten hma an la ang tih a tarlang a, Petrol Pump-te CCTV footage thlengin en thin tur a ni tih an tarlang bawk.

Hetihlai hian Petroleum Entrepreneurs’ and Transport’ Union of Mizoram (PETUM) chuan FCS&CA Department in thu hriatna rintlak leh chhui chianna awm hmasa lovin Petrol Pump neitute vaukhanna niawm tak thuchhuah an siam leh an Trade Licence cancel sak hial tura hmalak a tum chu hriatthiam har an ti tih an tarlang a. Tuialhthei lakluhna kawngah harsatna awm mahse a theih ang anga Petrol Pump neitute leh a phurtu te’n mipui mamawh phuhru tura an thawh ve mek lai a thuchhuah dengkhawng tak a awm ta mai chu mak an tih thu leh FCS&CA Department thuchhuah anga sawrkar thuchhuak kalha Petrol/Diesel hralh an awm a nih chuan dan hmanga hma lak mai tur ni awm tak a nih lai a Petrol Pump neitute laka mipui rilru dik lo puttir thei tur ang zawnga thuchhuah siam a ni chu pawi an tih thu an sawi bawk.