MDC leh MLA nih kawp theih lohna dan District Council in a neilo - Chairman, LADC

Lai Autonomous District Council (LADC)-a Chairman VL. Hmuaka chuan ‘MLA leh MDC chu nih kawp theihloh’ tih District Council inenkawlna dan ah a awmlo tih a sawi a. Hetihlai hian MLA atana thlantlin K. Hrahmo chuan MDC a nihna chu banna a thehluh tawh thu a sawi ve thung a ni.

Nimin-a a Office Chamber-a thuthar thehdarhtute a kawmna ah LADC Chairman VL. Hmuaka chuan MLA leh MDC chu nihkawp theihloh tih District Council inenkawlna dan ah a awmlo tih sawiin, “MDC nilai, MLA a thlantlin an lo awm fo tawh a, hengte hian MDC zawk bansanin MLA an nizui tlangpui,” a ti a. Hei hi a chhan ber chu duhamna rawngkai leh midang chherchhuahna kawng daltu anga an lan theih vangin nihna chelhkawp chu tih awma an ngaihloh vanga MDC zawk bansan thin an ni tih a sawi a ni. LADC Chairman chuan District Council in dan a neih ah District Council pakhat ah bak MDC a nih theih loh tih pawh sawiin, District Council pahnih emaw, a aia tam ah emaw a rualin Member a nih theihloh a, District Council inthlanna a Member a tlingkawp an awm chuan an duh zawk an thlan a ngai niin a sawi bawk.

LADC Chairman chuan LADC-ah Sawrkar thar a piang thei ta chu lawmawm a tih thu sawiin, “Sawrkar a mumal loh chuan mipui ten an tuar thin,” a ti a, LADC ah Sawrkar tha tak CEM viak tha leh kumlam ah pawh la naupang, thalai sukthlek hria an nei chu thil lawmawm tak a ni, a ti a, CEM thar rintawkna Vote of Confidence nei turin tunkar Zirtawpni-ah LADC Session koh a nih thu a sawi bawk.

Hemi hmalam hian BJP atanga MLA-a thlantlin K. Hrahmo chuan MLA leh MDC hi a nih kawp theih tih an party in Political Session an neih ah a lo sawi tawh a. “Tunah hian MDC ka nihna erawh chu dahthat tula ka hriat bakah MLA leh MDC-a ka hlawh te chu pakhat zawk zawka hlawh lak a thaa ka hriat avangin, MLA hlawh chauh hi ka la a, tunah hian MDC ka nihna pawh banna ka thehlut tawh a, MDC By-Election ka bial chhungah ngei kan nei leh dawn a, BJP MDC tha tak kan neih belh leh ngei dawn a ni,” a lo ti tawh bawk a ni.