Pawl hrang hrang ten CM hnenah thu an thlen

Chief Minister Lalduhoma chuan nimin khan Central YMA hruaitute a Pisa-ah kawmin Mizoram Chamber of Commerce & Industry hruaitute leh  Project Pushpak Mizoram Chief Engineer thar pawh a kawm bawk.

Chief Minister hova an inkawmna ah hian Central YMA hruaitute hian, Myanmar atanga lo kal mi thenkhatte chungchang te, tunhnaia ILP dan bawhchhia engemawzat an man avanga mumal zawka ILP Regulation kalpui tha an tih thu te leh Ruihhlo Do Core Committee kalpui thar leh tha an tih thute an thlen a. Chief Minister hian Prime Minister leh Union Home Minister te hnena a rawt angin Myanmar atanga rawn raltlan te chhinchhiahna tur bik, Biometric Enrolment Portal a awm tawh thu leh a taka an kalpui thuai tur thu a lo hrilh a. ILP kalpui dan pawh thlir nawn mek a nih thu leh Online Tracking System thar neih tum a nih thu leh Ruihhlo Do State Level Core Committee pawh a rang lama koh tha a tih thu te a lo hrilh a ni.

Mizoram Chamber of Commerce & Industry hruaittute pawhin nimin khan Chief Minister hi a Pisa-ah kawmin Commerce  leh Industry lama Mizoram hmasawnna tur rawtna an neih hrang hrang te a sawipui. Heng zingah hian Mizorama Cooperative Society hmanga mipuite tana awlsamna thlen theih dan te, Mau behchhan Industry dintute tana dawr ber tur Department neih tul an tih thute, Industrial Area chungchang te, Consultancy Firm leh Registered Contractor te inkara harsatna awm thei te, Tender chhangtute tana Work done Certificate phut chungchang te, Mizoram chu financial literacy rate kan hniam avanga Bank Loan lak a har thu te, Inner Line Permit kalpui dan tha nia an hriat an rawtna te, EDP leh ESDP Training te Department pakhat hnuaiah awm thei se thaa an hriat thute, SRI Scheme Hand Holding Policy nena kalkawp tir theih an rin thu te, Bangladesh nena insumdawn tawnna chungchang te leh thil pawimawh dang te an thlen a. Chief Minister hian an rawtna te chu an lo zirchian tur thu hrilhin, rawtna thenkhatte chu chipchiar taka ziaka thlen rang turin a chah bawk.

Project Pushpak Mizoram Chief Engineer thar GP. Singh pawhin nimin khan Chief Minister Lalduhoma hi Chief Minister Office-ah tlawhin Mizorama an hnathawh tlangpui a sawipui a. Chief Minister hian Project Pushpak Mizoram Chief Engineer thar chu sawrkar in a lo lawm tih hrilhin, a tulna apiangah Pushpak chu an thawhpui tur thu a lo hrilh a. Project Pushpak ten kawngpui an sialna ah leivung mumal taka paih thin turin a hrilh a. Khaw kar kawng chauh ngaihtuaha kawngin a paltlang khaw chhung ngaihthah leh si te chu tha a tih loh thu a hrilh bakah tuna kawngpui an enkawl mek 18 te bakah hian Myanmar leh Bangladesh ramri hrula kawngpui thar siam dan ngaihtuah turin a chah bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man