Bawngchawm-a Kel enkawltu chenna a kang

Serchhip Livestock Farmers Cooperative Society ten Bawngchawm-a Kel an vulh enkawltu chenna In chu nizan hmasa khan kangin bungrua engmah chuh hman a ni lo.

Bawngchawm khaw hmunhlui-a Serchhip Livestock Farmers Cooperative Society ten Kel an vulhna hmunah hian a enkawltu chenna In awmin Hmangaiha chuan a luah a, In luahtute awm loh hlanin nizan hmasa khan he In hi a kang a, anmahni bungrua bakah Serchhip Livestock Farmers Cooperative Society te bungrua chu a kangral vek a ni. He In hi a chhuat leh a bang Dap niin a chung atan Rangva hman a ni a, kangmei chhuah chhan hi hriatchian ni lovin niminpiah tlai khan helai velah hian leng an awm avangin kangmei chhuak chungchang ah hian Serchhip Police Station-ah FIR thehluh a ni a, Serchhip Police te chuan nimin tlai khan a hmunah kalin an enfiah nghal bawk a ni.

He In kang ah hianThutthleng 20 leh Dawhkan pakhat, Bel 8, Thleng leh Thingpui in no 30 ve ve bakah In hnuaia Thingzai an dah cubic 30 leh bungraw dang te a kangral vek a, kangmei in a tihchhiat hlut zawng hi cheng nuai 2.5 vel nia chhut a ni bawk.