ZPM Policy ti puitling turin theihtawp chhuah mek

Horticulture Minister Prof. Lalnilawma chuan ZPM Policy ti puitling turin theihtawp chhuah mek a nih thu a sawi.

Nimin-a Chite Veng Aizawl-a Horticulture Department hmunhma hrang hrang a tlawhna ah Horticulture Minister chuan ZPM Policy pui ber, Hand Holding Policy a hlawhtlin theih nan chak taka hmalak mek a nih thu sawiin, “Kumin ah thlai thar lei nghal mai a ngaih dawn avangin a sawngbawlna turte leh a chhekkhawlna tur Godown te ngaihtuah a ngai a, thil hmanhmawh thlak tak a nih avangin Godown awm ang ang te hman a ngai dawn a, chumi tur chuan tuna kan hmanraw neihte a hman tlak leh an tlak lohte kan thliarfel mek a ni,” a ti a a, thawmthat ngai ang ang te pawh thawmtha tura hmalak mek a nih thu a sawi bakah Department dang te nen pawh tanrual a ngaih thu a sawi bawk.

Horticulture Minister chuan sawrkar hmasa ten engemaw chen ah hma an lo la ve tawh tih pawh sawiin, a theihna apiangah an hma lo lak tawhna te pawh chhawm nun zelan tum thu a sawi a. Kuminah hian Sawhthing kan thar hnem dawn nia sawiin, “Kuthnathawktuten sawrkar tharah beiseina an nei sang hle tih kan hriatin kan lawm hle a, mipuite tih beidawn loh hi kan tum ber a ni,” a ti a. “Thlai thar lei turin kan inbuatsaih chho mek zel a, kuthnathawktute pawh lo hlauthawng lo turin kan in chah nawn duh a ni. Tunlaiah Social Media-ah inbeihna a nasa tawh em em a, thudik hre hmasa lova mahni hriat ang ang te awih mai lo turin kan in chah duh a, ngun taka thil kan chikte pawh a ngai ve thin a ni,” a ti bawk.

Nimin-a Horticulture Department hmunhma a tlawhna ah hian Minister hian Multipurpose Packing House, Mushroom Laboratory leh Scion Bank Greenhouse te awmin Chite-a Aizawl Convention Centre sak mek pawh a tlawh nghal bawk a ni.