Mipui Aw-a thu thlen za zela 72 chinfel a ni tawh

Mipui te'n internet kaltlanga an harsatna, an vuivaina leh an chanvo te an zawhchian theihna tura siam 'Mipui aw'-a thu thlen zinga 72% chu chinfel a ni tawh.

‘Mipui aw' hi DP&AR hnuaia Good Governance Cell (GGC) in a enkawl a, February ni 16-a tlangzarh a nih atanga nimin thlengin thu thlen 134 a awm tawh a, chung zinga 97 chu chinfel a ni tawh a ni. Mipui Aw hi Department hnathawh an hriatchian lohte zawhfiah nan te, sawrkar hmalaknaa duhkhawp lohna lai an neihte thlen nana hmang te an awm a, chungte chu a kaihhnawih Department-a 'Mipui aw' Nodal Officer atana ruat ten lo bawhzuiin, hrilhfiah ngai te an hrilhfiah thin a ni.

Mipui aw-a thu thlen zingah Health Department, Revenue Department leh Transport Department-in zawhna an dawng tam zual a, Department thenkhat mipui atanga an thudawn bawhzui chak tawk lo te pawh an awm thin a, DP&AR hian Nodal Officer te chu a rang lama bawhzui vat turin an hriattir thin a ni. Tuna dinhmunah he Portal-a inziaklut hi mi 527 an awm a, zawhfiah ngai zawt a, thu thlen chu  25.42% a ni mek a ni.