Mizoram-ah ASF vangin kumin hian Vawk 684 thi tawhin Vawk 387 zet suat a ni leh tawh

Vawk pul hri African Swine Fever (ASF) avangin kumin hian Mizoram State chhungah Vawk 684 an thi tawh ni a report a ni a, ASF vanga Vawk suat tawh zat chu 387 a tling bawk.

Tunlai khawlum chhovah ASF hri leng hi a hluar chho leh tan mek nia hriat a ni a, AH & vety Department-a Deputy Director Dr. M. Zohmingthangi chuan kum 2021 atang kumtin khawlum intan tirhin ASF hi a rawn hluar chhuak leh thin tih sawiin, Thlasik laiin ASF chu zia deuh thin mahse nipui a lo inherchhuahin a hri chu a rawn pung leh thin tih a sawi a. Vaccine rintlak tak hmuhchhuah ala nih loh avangin mipuite chu fimkhur a pawimawh takzet a ni, a ti bawk. Hei bakah hian AH & Vety Department-a Deputy Director chuan ran damlo nei an awm anih chuan Animal Husbandry & Veterinary Department Phone No. 1962-ah Doctor te biakrawn theih reng an ni tih a sawi bawk.

Animal Husbandry & Veterinary Department in a chhinchhiah danin nimin khan African Swine Fever (ASF) vang hian Vawk thi 11 a awm belh leh bakah hri darh zel tur benna atana Vawk suat zat 56 a awm belh leh bawk a. Heng Vawk thi te hi Muallungthu-ah 4, Aizawl Ramhlun Sports Complex-ah pakhat, Hualngohmun-ah 1, Dulte-ah 2 bakah Khumtung khua ah pathum te an ni. 

Khawvel-a Vawk tam tak suttu ASF vang hian Mizoram-ah kum 2021-22 khan Vawk thi 33,417 zet a awm nia chhinchhiah a ni a, hemi kum hian Vawk 12,568 zet suat a ni bawk a. Kum 2022-23 khan vawk thi 12,795 awmin 11,686 suat a ni bawk a, kum 2023-2024 ah Vawk thi 1139 awmin Vawk 980 suat a ni bawk a, heng kum thum chhung hian Mizoram-ah ASF vanga Vawk thi 47,351 awmin Vawk 25234 suat a ni bawk a, ASF hri leng hi a kum telin a ziaawm hret hret niin a lang a ni.

Mizoram-ah hian Vawk thi avanga tanpuina dawng chhungkua 2488 an awm tawh a, RTI hmanga zawhna an chhanna atanga a lan danin ASF avanga Vawk thi neitute tan sawrkar laipui inkaihhruaina (Central Guidelines)-ah zangnadawmna pek theih a ni lova, “Vawk suat (culled) tan chauh zangnadawmna dil theih a nih avangin Mizoram sawrkar in sawrkar laipui ah zangnadawmna a dil,” tih a ni a. Kum 2021-a Vawk suat neitute hnenah zangnadawmna cheng nuai 1169.94 pek a nih thu leh kum 2022-a vawk suat neitute zangnadawmna Rs. 5,26,63,300 dil leh niin AH & Vety Department chuan ASF vanga Vawk chante tanpuina tur cheng nuai 311.66 chu tunah hian an dil mek a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man