Tuikum lui fintu Tur hmangin hrai?

Serchhip khawpui chawmna atana PHE Department in Tuikum lui an lakna fintu Khuangthuama Kawrchu  Tur hmanga hrai nia hriat a ni a, a hraitu nia hriat mi pathum te chu man an ni.

Thudawn danin Khuangthuama Kawr hi  nimin (May 13, 2024) tlai dar 6:00 vel khan Tur hmangin hrai ngei nia hriat a ni a, he Kawr hi Tuikum Lui-a Pump House bul maia awm niin Chakai leh Kaikuang thi te pawh hmuh a ni a. Hemi chungchang ah hian nizan khan Serchhip Police Station-ah FIR thehluh niin Tur hmanga he Kawr hraitu nia hriat Lalmuanpuia (25), Vanlalliana (39) leh Laldinpuia (45) nia insawi te chu thu zawhfiah tura man nghal an ni a, an vai hian Serchhip IOC Veng nia insawi vek an ni.

PHE Department-a thawktute chuan tunhnaiah Khuangthuama Kawr hi a nut avangin an Pump loh thu leh Tuikum lui fintu hrai ni ngeia hriat a nih avang hian nimin tlai dar 6:00 atang khan Tui an Pump pawh an chawlhsan nghal thu an sawi bawk.