Tlabung-a School sak dan a hmunah enfiah a ni

Tlabung-a Govt. Primary School-II sak mek chu Inrinni khan Department-a thawktute chuan a hmunah kalin hnathawh dan an enfiah.

Tunhnaiah Social Media lamah Tlabung-a Govt. Primary School-II a Office sak dan ah hnathawh tha lo nia tarlan chu thehdarh niin Lunglei a MZP hruaitute chuan a hmunah kalin a sak dan phung ah duhkhawp lohna lai te an sawi bawk a. Hetiang a nih avang hian Inrinni khan Lunglei a Samagra Shiksha aiawh, School-a thawktute leh Zirlai Pawl aiawh te bakah School sak hna viltute chuan a hmunah an enfiah a. Hnathawh dan enfiahtute chuan he School cheithatna tur atana sum ruahman chu cheng nuai 11 vel a nih thu leh tuna building dinglai thawmthatna atana hman tur a nih thu an sawi a, nimahsela Office atana luahlai chu a that vak tawh loh avangin hnathawktute leh thawktute inbiakremna angin a chhe zuallai thawmtha lovin thiah a nih hnuah a puma sak that a ni ta zawk a ni.

Office tur sak lai mek chu zawhfel a nih hnuah Classroom awmna School building lian zawk chu sum la awm ang anga thawmthat lehnghal tur a ni tih hnathawktute chuan an sawi a, tuna Office an sak mek chu zawhfel a nih veleh hna tan leh nghal an tum thu sawiin, Social Media lama thehdarhtute chuan thil awmdan an hriatchian tawk loh vang a nih thu an sawi.

School thlalak hi Social Media lama a darh hnuah MZP Headquarters Lunglei leh Tlabung Sub-Headquarters hruaitute chuan a hmunah thil awmdan an enfiah tawh a, School building sak dan phung leh hmanraw hman thenkhat chu tha tawk loa an hriat thu, thuchhuah siamin an lo sawi tawh a ni.