Legislature Party ten SASCI sum sawiho an duh

ZPM Legislature Party chuan Special Assistance to States for Capital Investment (SASCI) sum chungchang sawipui-ah MNF Legislature Party chu sawmin MLP chuan Assembly Special Session a sawiho an duh thuin an chhanglet thung.

Zirtawpni kalta khan ZPM Legislature Party hian MNF Legislature Party chu lehkha thawnin tunhnaiah SASCI sum chungchang ah thu inchuhna a awm tih tarlangin, hemi chungchang ah hian mipuiin thil nihphung dik tak an hriat theih nan Media hma ah Common Platform hmangin sawihona neih tha an tih thu leh hemi atan hian an sawm thu an tarlang a ni.

Hetianga ZPM Legislature Party ten an sawmna hi Inrinni khan MNF Legislature Party chuan ziaka chhangletin, “Keini MNF Legislature Party chuan ram leh hnam tanan thil/thu pawimawh leh sawiho tur awm ah, Democracy ropuina leh Legislator te zahawmna vawnhim tul kan ti a, Media kaltlanga Common Platform ni lovin, Legislative Assembly House-ah ngei Special Assembly Session ko a, ZPM Sawrkar inthlahdah na a vanga, SASCI sum cheng vbc. 233 chuang zet luangral (Lapse) chungchang hi sawiho ngei tha kan tih thu ka han hriattir a che,” an ti a. “Sawrkarna chelhtu in nih angin Special Assembly Session koh pawh in thuneihna a ni a, May 2024 chhung ngeia he thu pawimawh hi sawiho kan chak hle mai,” an ti bawk.

MNF Legislature Party chuan Budget Session 2024 kal liamta ah khan SASCI Scheme hnuaia Sum hi a luanral leh thil danga hman an hlauh avangin thahnem ngai taka an au chhuahpui in awmzia a nei ta lo chu pawi an tih thu pawh an tarlang a, “Tuna SASCI 1st Instalment pawisa vbc. 266 chuang sawrkar in kawl mek pawh hi hnathawktu te hnenah a rang lama pechhuak thuai turin kan phut tlat a che u,” an ti a. Tuna sum Lapse cheng vbc. 233 chuang hi hmuhlet leh anih ngei theihna turin Sawrkarin hma an lak ngei an phut thu leh anmahni pawhin an theihna ang anga sawrkar tanpui an inhuam thu an tarlang bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar