‘Aizawl City Centre’ leh ‘Aizawl City Centre Annex’ hmalakna kal mek MSPMC-in an enfiah

Mizoram Sawrkar hmasawnna ruhrel endik tura din, Mizoram State Project Monitoring Committee (MSPMC) chuan ‘Aizawl City Centre’ leh ‘Aizawl City Centre Annex’ sak mekte chu nimin khan a hmunah an enfiah a. Heng hmalakna awm mekte zawhfel a nih huna sum dehchhuah anih theih dan turte pawh sawiho nghal a ni.

Modernization of Bara Bazar Trade Facility-cum-Exhibition Project atanga hna – Aizawl Smart City Limited hnuaia ‘Aizawl City Centre’ leh Commerce & Industries Department hnuaia ‘Aizawl City Centre Annex’ hmalakna te hi nimin khan MSPMC Vice Chairman R. Lal Rinawma hovin enfiah a ni a, heng hna te hi Lushai Engineers, Ramhlun South ten thawkin MSPMC Vice Chairman chuan building sak mekte inkara intlawhpawh tawnna awlsam zawk a awm theih dan tur te, bawlhhlawh leh hnawmhnawk felfai zawka tihral a nih theih dan tur mai bakah building sak mekte chu tangkai thei ang bera hman a nih theih dan turte a enkawltu Engineer leh Contractor te a sawipui bawk a ni.

Aizawl City Centre hi New Market Main building awm thinna hmuna sak niin UD&PA Department hnuaia Aizawl Smart City Limited enkawl a ni a. He project zawhfel nan hian cheng vbc. 41.59 chu Smart City Mission atanga hmuh niin January 2023 khan hna hi tan a ni. Tun dinhmun ah hian 38% vel zawhfel tawh niin he building hi Block A leh B-a then tum a ni a. Block A hi Basement bakah G+7 awm tura ruahman niin Block B hi Basement bakah G+5 awm tura ruahman a ni. Two wheeler leh 4-wheeler park-na tur hmun felfai tak te, Service Lift leh passenger lift te bakah Cold Storage te awm thei tura ruahman niin, a building zawhfel hnu hian dawr 1105 vel a awm thei dawn a ni.

Aizawl City Centre Annex hi ‘Foreign Lane’ building awm thinna a sak niin Commerce & Industries Department hnuaia enkawl a ni a. He Project zawhfel nan hian NEDP atang cheng nuai 3641.59 ruahman niin June 2020-ah tan a ni a. He building hi Block A, B leh C-a then tura ruahman a ni a, Block A-ah Basement bakah G+5 awm tura ruahman niin a dang pahnihte chu G+5 ve ve tura ruahman a ni. Dawr(stall) 132 leh dawr te (hawkers) 180 awm thei tura ruahman niin 70% vel zawhfel a ni tawh bawk.