Tuikum Lui Pump House bula Kawr Tur hmanga hraitu nia hriat Police ten an man

Serchhip khawpui chawmna atana PHE Department in Tuikum lui an lakna bul lawka Tuikum lui fintu Khuangthuama Kawr chu niminpiah tlai khan Tur hmanga hrai nia hriat a ni a, hemi chungchang ah hian Serchhip Police Station-ah FIR thehluh niin he thil-a inhnamhnawih nia hriat mi pathum te chu manin thubuai siam sak an ni.
Thudawn danin Khuangthuama Kawr hi niminpiah (May 13, 2024) tlai dar 6:00 vel khan Tur hmangin hrai ngei nia hriat a ni a, niminpiah tlai khan Tuikum Lui Pump House-a Duty te chuan he Kawr-ah hian Chakai leh Kaikuang thi te hmuin Tur hmanga hrai ngei nia hriat a ni a. Hemi chungchang ah hian nizan hmasa khan Serchhip Police Station-ah FIR thehluh niin Tur hmanga he Kawr hraitu nia hriat Serchhip IOC Veng nia insawi vek- Lalmuanpuia (25), Vanlalliana (39) leh Laldinpuia (45) te chu Serchhip Police te chuan manin thu zawhfiah an ni a, heng mite hian an tih ngei a nih thu Police te hnenah hian an sawi nia thudawn a ni bawk.

Khuangthuama Kawr tia hriat lar hi Tuikum lui Pump House bul maia awm niin Fur ruahtui tam lai, Tuikum lui a nut chang chuan he Kawr-a tui hi Gravity hmanga Pump House-ah lain mipuite hnenah semchhuah thin a ni a. Hetianga Tur hmanga hrai nia hriat a nih avang hian PHE Department chuan nizan hmasa dar 6:00 atang khan Tuikum Lui tanga Tui an Pump zawng zawng pawh titawp nghalin a tul angin hma an la nghal a. PHE Department-a thawktute chuan tunhnai bikah Khuangthuama Kawr hi a hnar lamah leivung paih avanga a tui a nut avangin an Pump loh thu sawiin, nizan hmasa la la khan Tuikum Lui-a Tui Sample hi lain an enfiah nghal tih an sawi a, hlauhthawn tur a awm lo nia an hriat avangin darkar 7 chhung Tui Pump an chawlhsan hnuah nizan hmasa dar 1:00 vel atang khan Tui hi Pump chhunzawm leh a nih thu an sawi a, mipuite tan pawh hlauhthawn tur a awm loh thu an sawi bawk.

Serchhip Police te chuan he thil thleng hi mipui vantlang hriselna nghawng thei anih avangin a titute hi IPC Section 428/429/277 hnuaiah thubuai siamsak an ni tih sawiin, nimin khan Serchhip District Court-ah hruai nghal an nih thu an sawi a. He kawr-a Tui bakah Chakai leh Kaikuang thi te pawh hi FSL-a enfiah tura thawn tum niin heng mite hian he Kawr hraina atana Tur an hman hi eng ang nge a nih an hriat loh thu an sawi niin LENKAWL an hrilh bawk.

Comments

Popular News (Last 30 Days)

LPG man bithliah thar