Chief Minister in SBI hotute a kawm

Chief Minister Lalduhoma chuan nimin khan a Pisa-ah Vincent, Managing Director, Chief General Manager, State Bank of India leh a thawhpui te kawmin Mizoram-a State Bank of India te hmalakna chungchang leh Hand Holding Policy kalpuina kawnga thawhdun theihna turte a sawipui.

Chief Minister hian, SBI Credit Deposit Ratio India ram huapa chawhrual 76 a nih reng theih laia Mizoram bik 46 emaw vel chauh a ni thin chu a ngaimawh hle tih he inkawmna ah hian sawiin, “Kan sum deposit tlingkhawm te keimahni tan hman tangkai a ni tawk lo tihna a ni,” a ti a, “CD Ratio sang zawk min neihpui ngei ka beisei tlat a ni,” a ti. SBI Sponsor Bank, Mizoram Rural Bank a thawktu indaih lo leh Allowances tlem bik an dawng nia sawi te lo enchiang turin Chief General Manager hi a chah bawk.

Bank kaltlanga Central Scheme kalpui hrang hrang chungchang pawh sawipuiin, heng Central Scheme awm mek te leh Mizoram sawrkar Hand Holding Policy te chu kal kawptir tura hmalak mek a nih thu te, chumi atana Bank leh Mizoram sawrkar thawhdun dan turte an rel a ni.

Chief Minister chuan, tunhma in Central Scheme loan te chu a dawngtuten hlawhtlin tum vang pawh ni lovin subsidy emaw, Margin Money emaw an duh vang maiin an dil fo thin nia sawiin, “Kan sawrkarah chuan chutiang mite tan chuan beisei a remchang tawh dawn lo. Hand Holding Policy nen kaikawpin; kan khaichhuah turte pawh Beneficiary (a dawngtu) ti tawh lovin Partner (thawhpui) kan ti tawh dawn a. A hlawhtling tur te chauh thawhpui kan tum dawn a ni,” tiin hmalak dan tur an duan te a hrilh a ni.

He hunah hian Chief Minister hi OSD to Chief Minister R. Lalrodingi leh Jonathan Lalremruata,  bakah LP. Lalchangkima, Managing Director ZIDCO ten an tawiawm a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man