Lenkawl

Serchhip District Agriculture Marketing Committee (DAMC) chu nimin khan an Chairman leh Bawrhsap Paul L. Khuma hova thukhawmin Handholding hnuaia thlai tharchhuah lakkhawmna hmun tur te leh he Scheme hnuaia Society din thar te chungchang an sawiho.

Serchhip-a Excise & Narcotics Department hotute chuan nimin khan Serchhip-a thuthar theh-darhtute leng-ah sawmin an hmalakna hrang hrang an sawipui.

Nimin khan Serchhip-ah Dan phalloh-a zawrh Shikhar leh ramdang siam Sikret dapchhuah hna thawh a ni.

Thenzawl Civil Sub-Division Office ruahmannain 'Fehchhuah Programme' vawikhatna leh a hawnna chu nimin khan Buangpui VC Hall-ah neih a ni.

Serchhip District-a khaw pathum-ah nimin khan African Swine Fever (ASF) vanga Vawk thi chhinchhiah leh a ni. AH&Vety Department in an chhinchhiah danin nimin a Vawk thi chhinchhiah te hi Baktawng khua ah pahnih leh Chhuanthar Tlangnuam leh New Serchhip North-ah pakhat ve ve te an ni a, nimin vek khan Serchhip Chhim Veng-ah Vawk pahnih suatin New Serchhip South, Khawlailung leh Chhunthar Tlangnuam-ah Vawk pakhat theuh suat a ni bawk. Heti hian kumin chhungin Serchhip District-ah ASF vang hian Vawk 3465 thi tawhin Vawk 7011 suat a ni tawh bawk a ni.

Mizoram Chief Secretary Dr. Renu Sharma IAS chu Vawiin Oct. 31, 2024 hian Superannuation in a chhuak dawn ta a, he hna lo chelh lailawk tur hian Mizoram sawrkar-a Commissioner & Secretary nilai H. Lalengmawia IAS chu ruat a ni.

Mizoram Arecanut Growers Association chuan an pawl hming thlakin ‘Mizoram Kuhva Chingtu Pawl’ tiin an thlak thu an sawi a. Mizoram-a kuhva chingtute zawng zawng leh Mizo mipuite chu dan lova Myanmar lam atanga kuhva lo lut do kawngah tangrual tura ngenin, ram dan kalha kuhva rah 'smuggling' thila inhnamhnawih lo tur leh mi thawhrah eizawnna tichhetu ni lo turin an ngen bawk.

Supply Department chuan thuchhuah siamin mipuiten Ration lak dawnah chauh ePoS hmetin buhfai hi lak tur a nih thu leh thla leh (next subsequent month) quota la turin ePoS a hmeh lawk theih a nih loh thu an tarlang a, ePoS hmehloh avangin a thla leh quota tur a bo theih loh thu leh Ration buhfai lak dawnin Digital Weighing Scale (a bukna khawl)-ah a tihrihna (tare weight) paih hmasak tur a ni tih an tarlang bawk.

Kumtin October 31, Sardar Vallabhbhai Patel piancham puala hman thin, Rashtriya Ekta Diwas (National Unity Day) chu kumin hian October 31 hi Sawrkar Pisa chawlh a nih avangin nimin khan Chief Secretary Dr. Renu Sharma hovin Aizawl-a Secretariat tualzawl-ah Rashtriya Ekta Diwas (National Unity Day) thutiam sawirual a ni a, Inpumkhatna thutiam hi Secretariat-a Officers leh thawktu zawng zawngte'n sawirualin Mizoram hmun hran hrana Sawrkar Office hrang hrangah he thutiam hi sawi rual a ni bawk.

Mizoram State Policy Coordination Committee (MSPCC) chu nimin khan Adviser to Chief Minister for Implementation of Handholding Scheme Dr. KC Lalmalsawmzauva kaihhruaia thukhawmin Ban-a Kaih Scheme kal mekah Department thenkhat hnuaia dilna lut te an thlirho a, lirthei lei chungchanga dilna lut, Taxi (2-wheeler, 4-wheeler leh Auto Rickshaw) atana dilna chu Handholding Scheme hian a huam telloh thu sawi a ni a. Commercial Passenger Vehicle dangah chuan hnuaiah a diltu ngei hminga State Transport Authority (STA) permit/licence nei tawh tan Scheme hian a huam thei dawn a ni.

Mizoram-ah Agricultural Block pahnih, Tlabung Agricultural Block leh Kawrtethawveng Agricultural Block siam a nih thu Sawrkar-in thuchhuah siamin a tarlang. Sawrkar inrelbawl danphung tihdanglam a nih avangin Tlabung-a Sub-Divisional Agriculture Office chu khar niin thawktute pawh hmundangah sawn an ni a, Tlabung-a he Department Office hawn a nih leh theihnan hian khawtlang hruaituten theihtawpa hma lain, ziak leh tawngkain dilna te pawh an lo thlen tawh thin a. Mizoram Sawrkar chuan Tlabung Agricultural Block siam a nih thu hi niminpiah khan thuchhuah siama tarlangin, nimin-a Tlabung ZPM Block-II hruaitu kalkhawmte chuan Mizoram Sawrkar chungah an lawm takzet tih an puang a ni.

Art & Culture Department leh Dungtlang Branch YMA te tangkawp buatsaihin nimin khan Dungtlang khuaah ‘Cultural Meet leh Vangpui Kut’ neih a ni a, he hun hi Art & Culture Minister C. Lalsawivunga chuan hmanpuiin Vangpui Kut chu Mizo culture vawnhim nana thil pawimawh tak a nih thu a sawi a, mahni hnam zia zahpuite chu Hnam dingchhuak an awm ngai lo a, an ral thin tih a sawi bawk. Dungtlang khua Vangpui Kut hi kumtin hman thin niin kumin hi tum 38 an hmanna a ni a, kum 2021 atang khan Aizawl a Branch YMA an thlanchhuah te an sawm thin a, kumin hian Ramhlun North Branch YMA te sawmin Ramhlun North Branch YMA atang hian member 60 chuang an kal a ni.

Commerce & Industries Minister F.Rodingliana kaihruaina hnuaiah niminpiah khan Commerce & Industries Department hotu lian te nen ‘The Industrial Policy of Mizoram-2024’ Draft copy tlirhona chu a Office-ah neih a ni a, he zirchianna atang hian siam that ngai te siamthat a ni ang a, Cabinet Meeting-a pharh turin Cabinet Memorandum buatsaih thuai a ni ang.

Mizoram Sawrkar chuan Mizoram State Health Care Scheme hman mek chu nakum March ni 31 thlenga hman tura pawtseiin inziaklutte hian kumin October leh nakum March inkarah cheng nuai khat thleng an bill thei ang. Sawrkar thuchhuah tarlan danin mipuite harsatna sutkianna turin Mizoram State Health Care Scheme chu thla 6 chhung atan pawhsei a ni a, Sawrkara MR bill thei leh sawrkar hnathawkin MR a bill sak te leh sawrkar hnathawk erawh a inziahluh theih dawn lo a. MSHCS hnuaia inziaklut tur hian chhungkaw member bituk zat a awm lova, kumin November ni 30 thleng inziahluh theih a ni ang.

Higher & Technical Education Minister Dr. Vanlalthlana hovin nimin khan ‘Consultative Meeting on Draft Mizoram State University Bill’ chu Stakeholder-te nen neih a ni.

Mizo Language Development Board (MLDB) Chairman R. Lallianzuala chuan Mizo tawng humhim tihhmasawn leh thehdarh kawnga hma la turin Mizoram sawrkarin Mizo Language Development Board a din thu a sawi.

Selesih-a College of Veterinary Sciences & Animal Husbandry chuan nimin khan '26th Foundation Day' an lawm a, he hun hi Rural Development Minister Prof. Lalnilawma chuan he hun hi a hmanpui a ni.

Chief Minister Lalduhoma chuan nimin khan Zoram Medical College (ZMC)-ah Post Graduate Degree in Public Health zirna hawngin Girls' Hostel thar a hawng nghal bawk.

Mizo Zirlai Pawl (MZP) chuan zirlaiten hun leh tha tam tak seng a Certificate an sual chhuah laia awlsam taka Certificate leh documents lem ngampa taka siamchhuah a ni chu an pawi an tih thu an sawi a. Hemi kaihhnawih ni ngeia hriat ah hian Mizoram Police te chuan mi pakhat an man thu an sawi bawk.

Aizawl Dawrpui-a dawr nei, RS Traders, Third Eye Solution te chuan nimin khan Serchhip District Volleyball Association te hnenah Combo Speaker hlanin SDVA aiawhin Serchhip Sub-Hqrs. YMA President Kawlthuama chuan a dawn sak a. SDVA President K. Tlangthanmawia chuan an pawl in an mamawh em em Combo Speaker an dawng chu an lawm hle tih sawiin, a petu Cephas Lalrinenga te chungah lawmthu a sawi bawk.

Nakum (2025) January ni 1-a kum 18 tling chin te laa Electoral Roll siamthat hna thawh tur atan nimin khan Mizoram District hrang hrangah Draft Electoral Roll tarchhuah a ni a, Serchhip District-ah pawh Bawrhsap Paul L. Khuma chuan Draft Electoral Roll hi a tlangzarh a ni.

The Salvation Army ten Ruihhlo ngai te enkawlna hmun an buatsaih, Adult Rehabilitation Centre (ARC) Chhiahtlang-ah nimin khan ruihhlo chungchang zirhona neih a ni.

Serchhip District-a African Swine Fever (ASF) hri leng chuan hluar lam a pan zui tawh rih lo niin a lang a, nimin khan Baktawng khua ah ASF avanga Vawk thi pakhat awmin Baktawng leh Chhuanthar Tlangnuam-ah Vawk pakhat ve ve suat leh a ni bawk a, hmundang Vawk thi leh suat a awm belh lo a ni. Heng te nen hian nimin thleng khan Serchhip District-a ASF vanga Vawk thi chu kumin hian 3461 a tling ta a, Vawk 7006 suat a ni tawh bawk a ni. Mizoram pumah kumin hian ASF vanga Vawk thi 14,321 chhinchhiah ni tawhin Vawk suat 23,741 a awm tawh bawk a, khaw 251 in he hri hi an tuar tawh a ni.

Kumin Krismas leh Kumthar vuakvet-a Ser-chhip District-a halpuah leh halmawi chi hrang hrang khapna thupek kenkawh dan tur chu nimin khan Serchhip SP, MS. Dawngkima hovina Pisa ah neih a ni.

Mizoram puma Electoral Roll ennawn tur atan nimin khan District hrang hrangah Draft Electoral Roll tarchhuah a ni a, Mizoram pumah Polling Station 1301 awm mekin Vote nei mipa 4,15,867 leh hmeichhia 4,42,667, an vaiin vote nei 8,58,534 an awm mek a, heng bakah hian Service Voters Mipa 4259 leh Hmeichhia 91, a vaiin 4350 an awm mek bawk. Electoral Roll hi ERO/AERO/BLO leh DEO/DC Office bakah websiate-ah en theih a ni.

Nimin khan Govt. Champhai College Multipurpose Hall-ah Art & Culture Department leh Mizo Academy of Letters (MAL) tangkawp buatsaih ‘Thu leh Hla Kutpui’ (Literary Festival) neih a ni a, he hun hi Art & Culture Minister C. Lalsawivunga chuan khuallian nia hman-puiin Zofate thlang tlak dan leh hemi kaihhnawih a mithiam te thuziak chu he hunah hian zirho a sawiho a ni.

Nimin khan Mamit-ah Art & Culture Department leh All Institutions Mamit District buatsaihin ‘Museum & Records Exhibition cum Book Sale’ neih a ni a, Museum Exhibition-ah hian Mizoram State Museum atangin Museum thil chi hrang hrang 80 phochhuah a ni a. Mizoram State Archives atangin lehkhabu hlu leh vang tak tak 14 leh Zoram humhalhtute sulhnu te pholan a ni a, Tribal Research Institution leh Mizo-ram Publication Board ten lehkhabu chi hrang hrang man tlawm zawka hralh theihin an chhawp chhuak bawk a, Mizoram Publication Board atangin lehkhabu hrang hrang 35 hralhchhuah theiha phochhuah a ni bawk.

Mizoram Chief Secretary Dr. Renu Sharma IAS chu tun thla tawp hian Superannuation pension in a chawl dawn ta a, nimin khan Chief Minister Lalduhoma chuan a Office-ah thlahin Mizoram tana a hnathawh tha tak tak te ah lawmthu hrilhin a hun hman zel turah duhsakna a hlan a. Lawmthu sawina lehkha leh thilpek a hlan bawk a ni. Chief Secretary pawhin Mizoram chu nuam a tih thu leh a hriatreng thin tur thu a sawi a. Mizorama a awm chhunga tha taka thawhpuitu sawrkar leh sawrkar hnathawkte chungah lawmthu a sawi bawk. Dr. Renu Sharma hi kum 7 vel zet Mizoram-ah awm tawhin November ni 2, 2021 khan Chief Secretary hna hi a chelh tan a, nimin vek khan Mizoram-a Secretary leh Department thenkhat te pawhin an thlah bawk a ni.

Mizoram Assembly Speaker Lalbiakzama chuan nimin khan Aizawl-a Falkland Hall-ah khum 200 awm theihna tur 3GEN Global Healthcare Multi-Speciality Hospital sakna tur lungphum a phum a, hemi atana sum ruahman lawk chu cheng vbc. 5 niin zawhfel a nih chuan cheng vbc. 25 vel senna tura ngaih a ni. He hunah hian Assembly Speaker Lalbiakzama chuan 3GEN Global Healthcare-in thil thar a rawn ken tel tur Air Lift Ambulance Service te, Eye Transplant leh Robotic Surgeries te chu Mizoram-ah a hmasa ber tur an nih bakah, Air Ambulance facility phei chu India hmarchhak ah pawh a hmasa ber tur a nih dante sawiin, 3Gen Global Healthcare Multi-speciality Hospital lo ding tur chuan damlo enkawlna bakah Mizoram sum leh pai lamah nasa tak a than tirin, thalai tam tak tan eizawnna a pek tur thu a sawi bawk a ni.

Food, Civil Supplies & Consumer Affairs Minister B. Lalchhanzova chuan nimin khan a Pisa-ah Indian Oil Corporation (IOC) hotute kawmin Mizoram-ah kum dang zawng aia ruahsur a tam avangin ei leh bar chawkluhna kawng ah harsatna hrang hrang siam mahse LPG Supply-ah harsatna lian a thleng lo chu lawmawm a tih thu a sawi a. Hetiang dinhmun thleng tura Indian Oil Corporation Limited, LPG Distributor leh thawktu te zawng zawng inpekna ah lawmthu sawiin, mipui tana thahnemngai lehzual a thawhho pui ah a sawm a. Indane Divisional Office, Silchar-a Deputy General Manager and Head Rajjyoti Das pawhin Mizoram sawrkarin theihtawp a chhuahpuina ah lawmthu a sawi a. Mizoram hian thla tin LPG Cylinder 6000-7000 vel mamawh ang niin hei hi Truck 20-25 phur vel a ni. He hunah hian Mualkhang-a LPG Bottling plant siam thar mek chungchang leh Oil Depot din thuai a nih theih nana hmalak dan te sawilan a ni bawk.

MNF Party chuan zirlai tam takin an mamawh leh an innghahna Scholarship sem chhunzawm lova a khaihlak ta chu pawi an tih thu an sawi.

Chief Minister Lalduhoma’n sawrkar laipui-a Minister of Road Transport & Highways Nitin Gadkari hnenah Mizoram kawng chhia a ziaawm nan kawng siam dan phung thara kal an dil tih a sawi.

Chin New Year Day lawmna hmanpuia USA khawpui Washington a châm mek Rajya Sabha MP K. Vanlalvena chuan Thawhtanni khan US Department of State Officer, East Asia, South East Asia and Pacific Region changtu Erin Kimsey-i chu Washington-a a Office-ah hmuin Mizoram-a UNICEF Office din a nih theihna atana hma lak sak turin a ngen a. Rajya Sabha MP K.Vanlalvena chuan US Officer hnenah hian Mizoram chu thenawm ram pathum Myanmar, Bangladesh leh Manipur atang te a politics kal fuh lo avanga raltlante rawn fuankhawm mekna a nih thu leh heng raltlan te zingah hian naupang kumtling lo tam tak an awm thu a hrilh a. Heng kum-tling lo raltlan te hian Zirna tha te, Chaw tha te, Damdawi tha te leh silhfen thianghlim bakah chenna hmun tha leh thianghlim an mamawh thu a hrilh bawk a. Heng an mamawhte pe vek tur hian Mizoram chu India rama State intodelh lo ber te zinga mi a nih avangin kan tan thil harsa tak a nih thu te sawiin, a rang thei ang bera Mizo-ram-ah UNICEF Office hawn a nih theihna tura hma ...

Mizo Inneih, Inthen leh Rokhawmna Dan ennawntu, Review Committee chu nimin khan an Chairman Law & Judicial Department-a Addl. Secretary Zahmingthanga Ralte kaihhruaiin Secretary Conference Hall-ah a tum khatna atan an thukhawm.

National Ayurveda Day, 2024 chu nimin khan Aizawl-a Assembly Annexe Conference Hall-ah hman a ni a, Mizoram Governor Dr. Hari Babu Kambhampati chuan he hun hi khuallian niin a hmanpui a ni.

Chief Minister Lalduhoma chuan sawrkarna an chan khan leiba tam tham tak an chhawm avangin an kawng a chho nghal hle tih sawiin, “Renchem takin kan sum te kan enkawl a. Chuvang chuan tunhmaa RBI balance chhe tak nei thin khan tun Financial Year tawpah kha chuan RBI Balance cheng vbc. 500 chuang kan lo nei ta a ni,” a ti.

 

Kumin-a India rama Nurse hna thawk tha te chawimawina sang, National Florence Nightingale Award dawngtu H. Mankimi, IOC Veng Serchhip chu nimin khan Serchhip District Hospital-a Nurse te chuan lawmpuina hun an hmang.

Serchhip District chhunga Baktawng khua ah nimin khan African Swine Fever (ASF) vanga Vawk thi 4 awm belh lehin Baktawng-ah bawk hian Vawk pathum suat leh a ni bawk a, District chhunga khaw dangah ASF vanga Vawk thi leh suat chhinchhiah belh a awm lo a ni. Heti hian kumin chhungin Serchhip District-ah ASF vanga Vawk thi 3460 awm tawhin ASF vang hian Vawk 7004 suat a ni tawh bawk a ni.

Vehicle Enforcement Service Association, Mizoram (VESAM) chuan thudik ziktluak lo hmanga Social Media-a thehdarhtu Maxi Cab khalhtu chu ngaihdam dil tura an phut thu an sawi.

Nimin khan Saitual-ah District Agricultural Marketing Committee chu a tum hnihna atana thukhawmin thlai thar pali (Hmarcha, Aieng, Sawhthing leh Hmunphiah) lei kawnga hmalakna te an thlirho a, Thlai thar leisa dahkhawlna, Secondary Collection Centre (SCC) atan a hmun thum tur tihchian chungchang bakah Secondary/Auction Centre-a Society Federation inrelbawl zel dan turte pawh an sawiho bawk.

Kar kalta Thawhtanni atanga chin hriat loha awm Lalthansanga (52) , Champhai Vengsang chu khawtlang huapa ni 7 chhung zawn a nih hnuah hmuh a nih loh avangin khawtlang huapa zawnna chu nimin khan tihtawp a ni a. Lalthansanga hi kar kalta Thawhtanni zinga Vawngzawl Lui-a a kal chu chin hriat lohin a bo zui a, chhungkhat laina-in ni khat an zawn hnuah khawtlang huapa zawn zui a ni ta a ni.

Khawzawl District chhunga sawrkar hma-lakna hrang hrang endikna, National Level Monitor for RD Schemes (NLM) nei turin Field Investigator, Anil Kumar Sharma leh Shailesh Kumar te chuan Khawzawl thlengin nimin atang khan an District chhung khaw 10-a sawrkar Scheme 11-a hmalakna te an endik tan a, thla thar Nov. 4 thlengin heng hmalakna te hi an enfiah dawn a ni. NLM hi Ministry of Rural Development hnuaia hmalakna a ni a, District hrang hrangah endikna an nei ang.

Central Vigilance Commission chuan nimin, Oct. 28, 2024 atanga November 3, 2024 thleng hian Vigilance Awareness Week, 2024 an hmang leh dawn a, Vigilance Awareness Week, 2024 thupui atan hian ‘Culture of Integrity for Nation's Prosperity’ tih hman niin Bharat Ratna Sardar Vallabhbhai Patel pianchampha a lo thlenna kar chhunga buatsaih a ni. He hapta pual hian Commission chuan ram hmasawnna atana kawng tinrenga rinawmna thlen tura kan inpekna chu nemnghet leh turin mipui zawng zawngte a ngen a ni.

Gauhati High Court chuan Bairabi leh Saikhawthlir inkara Teirei lui chunga Lei dawh hna chu uluk taka an vil mek thu an sawi. Tunhnai khan hemi chungchanga Public Interest Litigation (PIL) ngaihtuahtu Justice Nelson Sailo leh Justice Marli Vankung te thutna Bench chuan Teirei Lei chungchang hi an ngaihtuah a. He thila telna neite chu Lei dawhna tihkhawtlai a nih chhan leh phalna awmte Court-a thehluhna hun a pe leh a ni. Teirei lei dawh hna hi kum 2017 a thawk tanin thla 24 (kum 2) chhunga thawh zawh tura ruahman a nih laiin tunah hian thawh zawh tur hun hi nakum May ni 31 thleng pawhsei sak leh a ni. Teirei Lei hi Kolasib District leh Mamit District inkal-pawhna atana pawimawh em em a nih avangin Lei dawh hna tihkhawtlai a nih avangin mipui-in nasa takin an tuar tawh a ni.

Chief Minister Lalduhoma chuan Mizo hlang awmna Mizo Territorial Battalion din an dil chu sawrkar laipui-in a bawhzui dawn tih Inrinni a chanchinbumite a kawmna-ah a sawi a, Chief Minister chuan Delhi a zin hmasak lamah Defence Ministry-ah Scouts Battalion din an dil thu leh Sawrkar laipuia thuneitute nen an sawi tlanna-ah Scouts Battalion chu China ramri-a duty tur an nih avangin Territorial Army dil zawk turin thurawn an pe tih a sawi a. Tun tuma Delhi a zinna ah Defence Minister Rajnath Singh hnenah hei hi thlen lehin Rajnath Singh chuan Mizo Territorial Army, Mizo hlang awmna din tura rawtna hi Cabinet Committee on Security thutkhawm leh hmasa berah putluh a tum thu a hrilh niin a sawi a. Mizo Territorial Army Battalion Home and Heart hi din a nih chuan Mizoram ramri-a duty tur leh Mizoram pawna tirhchhuah loh tur chi an ni tih a sawi bawk.

Mizoram sawrkar Food, Civil Supplies & Consumer Affairs Department hotute chuan Food Corporation of India (FCI)-in buhfai an la rawn pekchhuah loh avangin raltlante ei tur buhfai an a la thei rih lo niin an sawi.

Health Minister Lalrinpuii hovin nimin khan a Pisa-ah mipuite'n eitur thianghlim leh hrisel an neih theih nana hmalak dan tur sawiho a ni.

Kum 2019 March 11-a Mizoram Larsap in Chairman a lakluh hnua a taka hna thawk tan, Mizoram Lokayukta chuan eiruk thubuai chhui tur 67 a dawng tawh a, kumin 2024-ah thubuai 14 a dawng tawh.

Mizote ngaihhlut leh tlawh châk, Buannel leh Phawngpui National Park chu thla thar November thla atang hian tlawh theih a ni chho leh dawn nia thudawn a ni.

MNF Vice President Dr. R. Lalthangliana chuan tuialthei man tihsan a nih avangin thil man a pung nasa niin a sawi.

Home Minister K. Sapdanga chuan eptu Party te chu thutling lo leh belhchian dawl lo hmanga mipui rilru hruaikawi tum-ah a puh.

Chief Minister Lalduhoma chuan Sustainable Development Goals Dashboard thar leh Project Monitoring Committee Dashboard (MPLAN) thar te chu nimin khan a hawng a. Chief Minister chuan Department te chu data dik tak zel thun tum turin a chah bawk.

Serchhip District Volleyball Association in an buatsaih ‘C. Laldinpuia Memorial Volleyball Tournament’ chu Inrinni khan khelh zawh niin New Serchhip VC te an Champion a, Veteran-ah Bungtlang Vengsang VC te an Champion bawk.

Mission Organic Chain Development for North Eastern Region (MOVCD-NER) Phase IV chungchang sawihona chu Zirtawpni kalta, October 25, 2024 khan District Level Monitoring Committee, Serchhip District chuan an nei. Hei sawihona Serchhip DC Meeting Hall-ah neih hi Serchhip District Deputy Commissioner Paul L.Khuma chuan kaihruaiin Serchhip DAO leh Member Secretary Lalchharliana chuan thutkhawm chhan te a sawi a, MOVCD-NER hnuaia loneitu/farmer thlan chungchang te sawiho niin, a dawngtu tur diktak ten an dawn theihnan concerned Department te thawhhona tha neih a tulzia tarlan a ni bawk.

Kumin chhungin Serchhip District-ah African Swine Fever (ASF) vanga Vawk thi 3456 a awm tawh.

Zirtawpni zan-a Maxi Cab (Sumo) chesuala boral Johny Lalthazuala, Serchhip IOC Veng chu Inrinni khan vuiliam a ni.

 Serchhip Bialtu MLA leh Chief Minister Lalduhoma chuan kar kalta Delhi-a a zin khan NBCC ten an rawn dawr tih sawiin, Mat lui khuahna tur rawn enpui hmasa tura an tih thu leh Drone-in thla lain chuta tang chuan an inbe zui leh dawn tih a sawi a, Tui in tur bakah kawlphetha, Tourism leh Fishery atana tangkai tur a nih thu a sawi bawk.

Serchhip Vengchung Branch Kristian Thalai Pawl (KTP) te chuan Inrinni khan Serchhip Blood Bank-a dah turin thisen Unit 10 an pe a, thisen petute hi mipa 8 leh hmeichhia pahnih niin Serchhip Blood bank-ah kalin thisen hi an pe a ni.

Chief Minister Lalduhoma chuan Kolasib a Nursing School chu Nursing College-a hlankai a ni dawn niin a sawi. Chief Minister Lalduhoma chuan tunhnaia Delhi-a sawrkar laipui thuneitu hrang hrang an dawrna-ah Kolasib-a Nursing School chu Nursing College-a hlankai an remti a. Hemi tihpuitlinna atan hian cheng vbc. 7 dah a nih thu an lo hrilh niin a sawi. Hei bakah hian Finance Commission in Village Council te chan ve tur hun rei tak pek theih tawh loh pekna atan tunah hian cheng vbc. 35 an rawn nawr chhuak niin a sawi bawk.

Chief Minister Lalduhoma chuan BJP atanga MLA pakhat Deputy Chief Minister-a lakluh chungchanga thu thang chu thu diklo a nih thu a sawi.

Chief Minister Lalduhoma chuan kar kalta Delhi a zin khan Sanctuary-a thawktu ten lawmman an lak har thin avanga harsatna an tawh te a thlen tih sawiin, sawrkar laipui hian Project Tiger & Elephant hnuaia Dampa Tiger Reserve a thawktute tan 2nd Instalment cheng nuai 152.022 chu an sanction tih a sawi.

Chief Minister Lalduhoma chuan sawrkar hmasa in hma a lo lak tawhna ADB Loan chu dawn a hun tawh thu leh dawn thei turin thil a lo fel tak tak lo tih Inrinni-a thuthar thehdarhtute a kawmna ah a sawi a, theihtawp an chhuah nain kan dawng dawn lo ni ta te-a an hriat thu sawiin, “Khami kan dawng dawn lo a nih chuan kan Health Care System kan lo puan thin kha kan kalpui thei dawn lo a, a hlui tuna mi hi a thar a kan thlak hma chuan an chhunzawm rih a ngai dawn,” a ti a, hemi chungchang ah hian US-AID te nen indawrna an neih mek thu leh Mizoram-ah rawn kalin Health Minister leh Finance lam te nen an indawr dawn tih a sawi bawk.

Mizoram Chief Secretary ni mek Dr. Renu Sharma IAS chu tun thla tawp hian Pension-a a chhuah dawn tak avangin amah thlaktu tura an duhdan te sawrkar laipuiah an thlen tih Chief Minister Lalduhoma chuan Inrinni khan thuthar thehdarhtute hmaah a sawi a. Manipur Cadre, 1992 IAS Batch, sawrkar laipuia Ministry of Civil Aviation Secretary nilai Vumlunmang Vualnam chu Mizoram Chief Secretary atan Union Home Ministry-a Secretary hnenah an dil thu leh sawrkar laipuia thuneituten an lo ngaihtuah zui dawn tiin an chhang niin a sawi a. Hei hi a remchang lo a nih chuan Mizoram Chief Secretary ni thei tur zingah duh an thlan theih nan AGMUT Cadre IAS zinga Chief Secretary dinhmun chelh thei te hming pe phawt tura an ngen thu a sawi bawk.

Thirsakawr hmanga infiamna hriat hlawh tak, RedBull Urban Downhill Biking Event chu ramchhunga a hmasa ber ni turin Inrinni khan Aizawl-a Republic Veng-ah buatsaih a ni a, mi 21 telin rampawn atangin mi pali an tel bakah Mizo pathum an tel bawk. A pumpui-ah Taiwan mi Chiang Sheng Shan chuan Red Bull Tlang Ruam hi minute 1:41.640 ah tlanchhuakin pakhatna a ni a, khawvel a Urban Downhill Event lian ber Red Bull Valparaíso Cerro Abajo 2025 ah a inlan dawn a ni. Chiang Sheng Shan hi Asian Downhill Festival-ah vawi li Champion tawhin National Champion vawi 15 a lo ni tawh bawk a. Indonesia mi Rama Teguh Adi Pratama chu pahnihna niin minute 1:46.867-ah a thleng a, Yawar Ali Khan Jammu & Kashmir mi chu pathumna niin minute 1:48.520-ah a thleng bawk a ni.

PHE Department hotute chuan November thla ralhma in Aizawl mipuite hnenah a pangngai in tui sem theih an inbeisei tih an sawi.

School Education Minister Dr. Vanlalthlana chuan zirlaite chu mahni kalkawng tur thlira rilru nei taka zir turin a fuih.

Vairengte leh Sairang inkara kawngpui lian laih tura zangna-dawmna tihfel a nih thu Chief Minister Lalduhoma’n a sawi.

Mizo Zirlai Pawl (MZP) dinchampha phak pualin Inrinni khan Aizawl-ah ‘Ruihhlo-Zirlaite hmelma’ tih thupui-a hmangin Ruihhlo Do Kawngzawh neih a ni a, he hun hi School Education Minister Dr. Vanlal-thlana leh Excise & Narcotics Minister Lalnghinglova Hmar ten an telpui a ni.

Mizoram Larsap Dr. Hari Babu Kambhampati chuan Chakma Autonomous District Council sawrkarin Chakma zirlaite tan Mizo tawng zir tura thutlukna a siam chuan, Chakma leh Mizote inbiakpawhna leh inhriat-thiamna kawngah thui tak a pui dawn tih a sawi.

Mizoram-a Kohhran hrang hrangte thawhhona leh inpumkhatna tura hmalatu tur, Council of Churches in Mizoram (CCM) chu nimin khan hawn a ni a, hemi hma niminpiah khan Mission Veng Kohhran Biak In-ah rorel inkhawm neih a ni.

Chief Minister Lalduhoma chuan Aizawl khawpui chhung atanga Assam Rifles insawnchhuak tura inremna chu Mizoram sawrkar leh Assam Rifles aiawh ten Nilaini kalta, October 23, 2024 khan New Delhi Mizoram House-ah a hriatpuinain an ziak tih a sawi.

Serchhip Chhim Veng Volleyball Court-a khelh ‘C. Laldinpuia Memorial Volleyball Tournament’ khelh mekah nimin khan Semi Final khelh zawh niin Vawiin chawhma dar 10:00 hian Final khelh a ni dawn a. Nimin a Semi Final inkhel ah New Serchhip VC in Hriangtlang VC chu 3-0 a hnehin Final an lut a, Serchhip Vengchung VC in Darnam VC chu 3-2 a hnehin Final an lut bawk a, New Serchhip VC leh Vengchung VC ten Final an khel ang. Veteran inelna-a Semi Final-ah Hriangtlang VC in Saithleng Arts, Vengchung chu 3-2 a hnehin Final an lut a, Bungtlang Vengsang VC in New Serchhip VC chu 3-1 a hnehin Final an lut bawk a, Hriangtlang VC leh Bungtlang Vengsang te hian Veteran inelna ah Final an khel dawn bawk a ni.

Thla thar November thla chhunga State Level Mock Exercise on Flood and Landslide Disaster neih turah inrawnkhawmna leh inhrilhhriatna, Coordination and Orientation Conference chu nimin khan neih a ni a, he hun hi Serchhip District atang pawhin Bawrhsap Paul L.Khuma hovin sawrkar mi pawimawh ten an lo zawm a ni.

Serchhip District-a Tobacco Free Youth Campaign neih kal mek denchhenin nimin khan Ser-chhip Bazar leh a chhehvela Vantlang hmunah dan bawhchhia a meizu an awm leh awm loh enfiah niin Dan bawhchhia mi 4 man an ni a. Hemi rual hian Thenzawl-ah kum tlinglo hnena Vaihlo leh a kaihhnawih hralh an awm leh awm loh enfiah niin Dan bawhchhia man an awm lo thung.

Nimin khan Serchhip District-a khaw pathum ah African Swine Fever (ASF) avanga Vawk thi chhinchhiah belh 5 a awm.

Mizoram Middle School Teachers Association (MSTA) Sub-Hqrs. Serchhip chuan nimin khan Serchhip Kawnpui VC Hall-ah Conference vawi 25-na an hmang a, he hun hi an President C. Hranghnuna chuan kaihruaiin Report hrang hrang ngaihthlak a nih bakah an member Pension a chhuak mi 4- PL. Sawilaia (Govt. Hmuntha Middle School); R. Sangzeli (St. Peters Chhing-chhip); Lalthianghlima Varte (Govt. Chhiahtlang Middle School) leh Lalhmuchhuaki Sailo (Govt. Lungkawlh Middle School) te thlahna hun an hmang a. Chawhnu lamah kum 2024-2026 chhunga an pawl hruaitu tur an thlang nghal bawk a ni.

Mizoram Public Service Commission (MPSC) chuan MPSC chu Constitutional leh Independent body a nih thu sawiin, Sawrkar leh mipui tana hna a thawhna kawngah sawiselna leh rawtna nei an awm chuan Chairman emaw, Secretary emaw hnenah a duh tan a thlen theih reng tih an sawi.

Aizawl leh Reiek inkar Tlawng Lui-a Lei dawh thar chu nimin khan PWD Engineer-in-Chief (E-in-C) Er. Lalrinkima Hnamte chuan a hawng a, he Lei hi metre 55 a thui niin metre 12.2 (40.6 ft) a zau a ni a. Lirthei in a zawh tur chin hi metre 7.5 a zau niin a sir ve ve ah ke a kalna tur metre 1.2 a zau siam a ni bawk a, Lei san zawng hi metre 7 a ni. He Lei dawhna tur hi Central Road Fund kaltlangin MoRTH in cheng nuai 757.56 a rawn pe a, February 28, 2017 khan hna thawh tan niin M/S Satguru Engineers & Allied Services Pvt. Ltd. Guwahati chuan Lei dawh hna hi an thawk a, Ton 70 dawl zo tura ruahman niin kum 2017-a Tulian avangin a tira ruahman sa ti danglamin ruahman lawk aia sangin Lei hi dawh a ni.

Service Association of Mizoram Irrigation & Water Resources Technical Staff (SAMITS) chuan nimin khan IWRD Chief Engineer Office Auditorium-ah General Conference tum 8-na neiin Adviser to Chief Minister TBC. Lalvenchhunga chuan a hmanpui a, Irrigation & Water Resources Department hnuaia Technical Staff-te chu mipui tana rawngbawl an nihna hriaa thahnemngai lehzuala thawk zel turin a fuih a. Tanrualna leh thawhhona tha tak an neihte chhawmnung zel tur leh rilru thar pu a ram leh hnam tana ngaihtuahna seng zel turin a chah bawk. Chawhnu lamah Rorelin an pawl hruaitu tur an thlang nghal a ni.

Bengaluru-a cham mek Supply Minister B. Lalchhanzova leh Karnataka Food, Civil Supplies and Consumers Affairs Minister KH Muniyappa te chu niminpiah tlai khan Kumara Krupa Guest House-ah inkawmin State pahnih ten Supply Department hnuaia hna an thawh dan te inhrilh tawn a. State pahnih Official te pawh he hunah hian telin mipui tana tha zawka hnathawh dan tur te an sawiho a ni.

Home Minister K. Sapdanga chuan kumin Krismas leh nakum kumthar lo thleng turah Mizo mipuite Halpuah hal lo turin a ngen tih Akashvani zawhna chhangin a sawi a, Halpuah hal chu Lung natna vei ten an zual phah thin tih sawiin, halpual leh halmawi rim chu Chuap natna vei ten an zual phal thin thu leh nunna chan hial an awm thin thu a sawi a. Halpuah leh Halmawi hal rim chuan naupang tan tlang hrileng a thlen bakah ran pul hri a len phah thei tih te pawh sawiin, Diwali, Krismas leh Kumthar-ah te Halpual leh Halmawi hal lo hram turin mipuite a ngen a ni. Tarlan tawh thin angin Mizoram sawrkar chuan kumina hunpui lo thleng turah Halpual leh Halmawi hal a khap a, a ti luite chu hrem tur an nih thu sawiin, District hrang hrang Bawrhsap te pawhin anmahni huamchhungah hma an la bawk a ni.

Niminpiah khan PC Party chuan Aizawl-ah Assembly neiin an Party hruaitu tur thlanna an nei a, President atan Vanlalruata, Vice President atan Lalthuamliana leh Treasurer atan Lalsang-puii te thlantlin an ni. PC Party Assembly-ah hian an President Vanlalruata chuan Mizoram-a raltlan awm mek te khungkhawma khuahkhirh an duh thu leh awmze nei-a enkawl an duh thu a sawi bawk.

Mizoram Lok Sabha MP Richard Vanlal-hmangaiha chuan tunkar Thawhtanni atanga Ningani chhung khan Mumbai tlawhin Navi Mumbai-a Mizoram House hmun thar tur chu a tlawh bawk.

Nimin khan Kolasib-ah Bawrhsap Robert C. Lalhmangaiha hovin Bairabi leh Sairang inkar Rel kawng siam meka hmalakna kal mek leh harsatna awm te thlirin District thuneitute leh Indian Railway hotute bakah khawtlang hruaitute an thukhawm a, he hunah hian Railway hotute chuan kumthar March ni 25-ah Mualkhang thlenga Rel luhtir theih an in beisei tih sawiin, hei bakah hian Jamira, Hailakandi District, Assam-a Relkawng chhia avanga Mizoram a Rel lo lut thei lo chu Rel kawng siamthat a nih tawh thu leh bungraw phur Rel pawh a kal tawh thu an sawi a, Passenger Rel erawh a la kal hrih lo tih an sawi bawk.

Kulhpawn Monitoring Committee ti invuah te chuan nimin khan Aizawl Press Club-ah thuthar lakhawmtute kawmin Mizoram Police Headquarters hnuaia Police Quarters 26 sak chungchanga Contractor thlan dan dik lo chhui chiang turin Mizoram Lokayukta Chairman chu an ngen tih an sawi.

Sericulture Department hnuaia Eri Project kalpul mekah Sericulture Farmer te tharchhuah ‘Eri Cut Cocoon’ chu State pawnah thawnchhuah a ni.

Sports Minister Lalnghinglova Hmar chuan infiamna chi hrang hrangah, Mizo thlalaite thiamna leh theihna haichhuak tur chuan mi nawlpui ban phak, Sports Infrastructure tha siam a pawimawh thu a sawi.

Sawrkar kum kal mek-a kum chanve (April - September, 2024) chhungin Mizoram-ah a thlawnin Thisen Unit 17,559 pek ni tawhin hei hi thisen pek zawng zawng atanga chhutin za zela 94.19 a ni a, Mizoram-ah kum chanve chhunga a thlawna thisen pek tam ber tum a ni.

Deputy Commissioner of State Tax, Serchhip Zone chuan sawrkar kum kal mekah September thla thleng khan Chhiah chi hrang hrang cheng vbc. 8 chuang hmu tawhin sawrkar kum liamtaa hemi hun chhunga Chhiah an hmuh aiin za zela 47.04 zetin an Chhiah hmuh hi a sang zawk a ni.

Serchhip District Volleyball Association in an buatsaih ‘C. Laldinpuia Memorial Volleyball Tournament’ chu Serchhip Chhim Veng Volleyball Court-ah khelh mek niin nimin khan Pool match khelh zawh a ni a, Vawiin hian Semi Final khelh tan a ni ang. Ruahman lawk ang chuan tukin dar 9:30-ah Semi Final hi khelh tan a ni anga, New Serchhip VC leh Hriangtlang VC te inhmachhawnin hemi hnu hian Veteran-ah Hriang-tlang VC leh Saithleng Arts, Vengchung te an inhmachhawn anga. Hemi hnu hian Vengchung VC leh Darnam VC inhmachhawnin inkhel hnuhnung berah Veteran atangin Bungtlang Vengsang leh New Serchhip an inkhel leh bawk ang.

Serchhip District-ah nimin khan African Swine Fever (ASF) vanga Vawk thi pathum chhinchhiah belh leh niin heng te hi Baktawng khua ah pahnih leh Khawlailung khua ah pakhat te an ni a, nimin khan Serchhip District-ah ASF hri leng darh zel tur venna atana Vawk suat erawh a awm belh lo thung a ni. Heti hian kumin chhungin Serchhip District-ah ASF vanga Vawk thi 3451 awm tawhin Vawk 6985 suat a ni tawh bawk a ni.

Tun thla ni 21-a Police Commemoration Day denchhenin nimin Oct. 24 khan Serchhip District Executive Force (DEF) te chuan Serchhip Blood Bank-a dah turin thisen Unit 8 an pe a, thisen petute hi mipa vek niin Serchhip Blood Bank-ah kalin thisen hi an pe a ni. Police Commemoration Day hi India ram pumah kum 1960 atang khan kumtin hman thin a ni a. India khua leh tuite himna tura Police-te inpekna sang ber - mahni nunna hlantu Police Martar huaisente chawi-mawina ni leh hriatrengna atana hman thin a ni.

‘Sir’ ti a in koh hi I bansan daih ang u - Rev. Dr. Zaichhawna Hlawndo

Indian Medical Association (IMA), Mizoram Government Doctors' Association (MGDA) leh Indian Dental Association (IDA) tangkawp buatsaihin nimin khan a thlawna in entirna hmun, 'Multidisciplinary Clinic' chu Hnahthial District-ah buatsaih a ni a, he hunah hian Doctor thiam hrang hrang ten damlo te enin a vaiin Doctor 50 awmin Supporting Staff 11 an awm a, damlo mi thahnem tak enin Vawiin hian chhunzawm leh a ni ang. Tun tum hi Mizoram-ah Multidisciplinary Clinic buatsaih tum 10-na a ni.

Mamit District Sericulture Officer (DSO) Office chuan nizan hmasa khan Govt. Muga Seed Farm, Mamit-a Muga Silkworm Pangang ‘Favang Seed Crop (Bhodia)’ an khawi mek pangang Cocoon tur sengkhawm hna an thawk a, Mutih Pangngang (Eri) khawi mekte pawh enho a ni bawk. Tun dinhmunah Mamit District-ah hian project kallai mek hnuaiah Muga silk pangang khawi chhungkaw 49 awmin Project kallai piah lamah mahni a khawi chhungkaw 67 an awm bawk a ni.

Govt. Hrangbana College-a Mizo Department leh Mizo Language Development Board tangkawpin an buatsaih James Dokhuma kut-chhuak zirhona chu nimin khan Aizawl-a Govt. Hrangbana College-ah neih a ni a, ni hnih awh National Seminar-ah hian thupui hrang hrang 18 sawiho tura chhawpchhuah niin, heng thupui hmanga thuziakte hi lehkhabu-a tih chhuah tum a ni. 

Lunglei khawpui chhunga Power & Electricity (P&E) Department-a hna thawktu zawng zawngte inhmuhkhawmna leh intuaitharna hun chu nimin khan Convention Centre, Lunglei-ah neih a ni a, he hun hi Lunglei Power Circle-a Superintending Engineer Er. Lalrinmawia chuan hmanpuiin thawhhona tha pawimawhzia te, Power network vil that a ngaih thu te leh mipui (consumer)-te ngaih pawimawh a tulzia te a sawi a ni. He hunah hian 'Sharing Expertise and Best Practices' tih chu thupui-ah hman niin Department a thawk, tawnhriat ngah tawh ten an thiamna leh tihdan phung thate zirtirin hun an hmang a ni.

Mizoram Legislative Assembly-a Committee on Public Undertakings te chu tun thla ni 22 atanga nimin thleng khan an Chairman Er. H. Ginzalala, Technical Adviser to CM hovin Kerala-a State Corporations hrang hrangte zirchianna neiin a fehchhuak a, Kerala-a an cham chhung hian Committee on Public Undertakings, Kerala te nen Joint Meeting neiin State Public Sector Corporations chungchang leh an kalpui dante an sawiho a. Kerala Legislative Assembly-a Speaker leh Minister of Law, Industries and Coir-te hmuin an inkawm bawk a ni. Committee hian Kerala Handicraft Development Corporation, Tourism Development Corporation, Travancore Titanium Products Ltd. leh Board of Public Sector Transformation te tlawhin Committee on Public Undertakings, Kerala hian Mizoram rawn tlawh ve ngei an duh thu an lo hrilh bawk a ni.

olasib District Bawrhsap Robert C. Lalhmangaiha chuan nimin khan ‘Tobacco Free Youth Campaign 2.0’ chu Kolasib DC Conference Hall-ah a hawng a, Mizote hian zuk leh hmuam kan ti nasa a, kan hriselna pawhin a tuar hle tih sawiin, hemi dona lama thawktu hriselna lama hnathawkte chu fakawm a tih thu a sawi a. Vaihhlo leh a kaihhnawi te hi do rem a ngaih thu sawiin, hemi lak atanga kan zalen a, nunphung thar kan zawh a ngai tawh takzet tih a sawi bawk.

Supply Minister B. Lalchhanzova chuan mi rethei leh dinhmun harsa ten an chanvo an chan theih nan hma an la zel dawn tih sawiin, Ration Card siam danglam vanga harsatna tawk te Department in a ngaihsak dawn tih a sawi. Supply Minister sawi danin Mizoram Sawrkar chuan dinhmun harsa tak, Ration Card var-a awm an ngaihsak zui zel dawn a, an chanvo an chan theih nan sawrkarin hma a la zel dawn tih sawiin, Ration Card chuan chhungkaw khawsak phung a hril a, a phu ten chanvo dik tak an chan theih nan hma an la zel dawn tih a sawi a ni. Minister B. Lalchhanzova sawi danin Buk dika buhfai khulh chu mipui chanvo niin State dangin Card var a awm tana buhfai mi pakhat tana kg 8 an ruahman ang chu an ti ve lo a, a hming chauhin chhungkaw khat tan kg 7 leh a aia tlem an pe a, State pawisa buhfai lei nan an hman belh lo tih a sawi bawk.

Nimin-a YMA Rorel Inkhawm vawi 4-na neih ah YMA hruaite hlun chawimawina chu mi 77 hnenah hlan leh a ni a, YMA hruaite hlun chawimawina hi mi 3274 te hnenah hlan a lo ni tawh a ni. YMA-ah hian member 4,97,946 awmin Branch 819, Group 80 leh Sub-Hqrs. 8 a awm mek a, Mizoram bakah Assam, Meghalaya, Manipur, Tripura leh Nagaland bakah rampawn (Bangladesh)-ah YMA Branch hi a ding a ni.

Centre for Environment & Social Justice (CESJ) chuan Mizoram sawrkar-a Department pali (4) a changtu Minister theuhte hnenah Mizo-ram tualchhuak thil hrang hrang humhalhna dan kengkawh tha turin an ngen.

India-a a hmasa ber ni turin khampang awih a lirthei ke hnih nei hmanga intlansiakna, Downhill Mountain Biking hmasa ber Red Bull ‘Ruam Event’ chu nimin khan Aizawl-ah neih tan a ni a, nimin khan he infiamna a tel turte fuihna leh an hriattur tulte hrilhhriatna hun hman a ni a. Vawiin leh naktuk-ah Aizawl khawpuia Upper Republic, Republic leh Republic Vengthlang huamchungah he infiamna hi buatsaih a ni ang. Downhill bike khaltu sawm bik mi 25 te chu khawvel pum huapa an thiam thil pholanna hun remchang siamsak an ni dawn a. He intihsiaknaah hian qualifiers leh Main Race neih tur niin a titha te chu South America-a Red Bull Cerro Abajo-a inelnaah an tel ang.

YMA Inkhawmpui Lian neih loh kum-a neih thin, ‘YMA Rorel Inkhawm’ vawi 4-na chu nimin khan Aizawl Mualpui Salem Veng-a R. Dengthuama Hall-ah neih a ni a, thu pawimawh hrang hrang an rel zingah Plastic bur/bottle-in kan ram a tihchhiat nasat avangin a hman tlem dan inzirtir leh thil danga hman tangkai dan kawng zawn chu a tel a ni.

UD&PA Minister K. Sapdanga’n sawrkarin a kalpui mek Bana Kaih hmanga kaihchhuah theih turin mipuiten ban an phar a, an penchhuah a ngai tih a sawi.

Sawrkar laipui ruahmanna, Nagar Van Yojana hnuaia cheng nuai 132 senga Entlang Social Forestry tih hmasawnna tura hmalakna hrang hrangte chu nimin khan MJA Serchhip District Member te chuan a hmunah an tlawh.

LPS Cable TV in ‘LBS Suzuki Youth Icon’ thlanna an buatsaiha pakhatna ni ta, Lalsangliana leh pathumna Lalbiakkima te chu nimin khan Serchhip-ah ropui taka lo hmuah an ni.

Serchhip District Hospital sak a nih dawn avanga damdawi In chawmtu Electric Transformer sawn hna chu Vawiin hian thawh chhunzawm leh tum a ni a, hei vang hian Vawiin chawhma dar 10:00 atang hian 11Kv Switching Station atanga Serchhip khawchhung chhimlam zawng leh Hriangtlang leh Keitum Feeder a awm khua ten Power supply in nei thei dawn lo a, P&E Department chuan mipuite hriatthiamna an ngen a ni. He Electric Transformer sawn hna hi thawh zawh thawkhat ni tawhin hrui pawh pawhfel a ni tawh nia thudawn a ni.

AH&Vety Department ten an chhinchhiah danin nimin khan Serchhip District-ah African Swine Fever (ASF) vanga Vawk thi leh suat a awm belh lo a, heti hian kumin chhunga Serchhip District-a ASF vanga Vawk thi chu 3448 niin Vawk 6985 suat a ni tawh bawk. Mizoram-ah nimin khan District 5-ah ASF vanga Vawk thi 22 chhinchhiah niin Vawk 48 suat a ni thung a, Mizoram pumah kumin hian ASF vangin Vawk 14,140 thi tawhin Vawk 23,590 suat a ni tawh bawk a ni.

Mizoram-a tlawmngai pawl lian ber, YMA in Khawmpui Lian neih loh kuma an neih thin, YMA Rorel Inkhawm vawi 4-na chu Vawiin chawhma dar 10:30 hian Mualpui Salem Veng a R. Dengthuama Indoor Stadium-ah neih a ni dawn a, Serchhip atanga Rorel Palai turte chuan Vawiin hian Aizawl an pan hlawm ang. Kumin a YMA Rorel Inkhawm neih turah hian YMA Khawih Agenda 8 leh Sawrkar Khawih Agenda 5 chhawpchhuah a ni dawn a, YMA Khawih zingah hian NHIDCL hnuaia Mizoram kawngpui siam vil zui kawnga hmalak rawtna te, Ruihhlo Do kawnga tun aia chak zawka hmalak rawtna leh YMA Inkhawmpui Lian neih loh kumah Sub-Hqrs. YMA Inkhawmpui neih rawtna a te a tel a ni.

Mizo Students’ Union (MSU) General Hqrs. leh Cement company aiawhte chu nimin khan thukhawmin Mizo mipuite harsatna sutkianna tur atan Mizoram-a Cement hralhchhuahna rate chu Rs. 10-a a tlawm theihna turin darkar 72 chhunga hma la turin thu dah a ni a. Hemi hun chhunga company rate tla thei lo te chu Mizo-ram-ah an sumdawn chhunzawm MSU chuan rem a ti lovang tih an sawi a ni. MSU chuan he an hmalakna hi Mizoram leh Mizo mipuite tan a ni tih mipuiten min hriatsak a, thlawp tlat turin an ngen bawk a ni.

Rokunga Memorial Society chuan tunlai khawvel danglam zel kara Mizo Zepui nunpui tlattu hnena an hlan thin ‘Rokunga Award’ dawng turin Sihfa khuaa cheng C Thangmawia chu an thlang a. Rokunga Award hi kum thum danah a dawng tur thlan thin niin he chawimawina dawng tur hian tlawmngai, huaisen, taima, rinawm, tuarchhel leh thuhnuairawlh thlanchhuah thin an ni, Tun tuma he chawimawina dawng tura thlan C. Thang-mawia hi kum 83-a upa niin thla thar November ni 1 khian Pi Zaii Hall, Synod Conference Centre, Mission Veng-ah hlan a ni ang. 

Mizoram-a mimal enkawl ATM Booth hmasa ber dawttu chu nimin khan Champhai-a HT. Khupa building, New Champhai-ah Champhai Addl. DC K. Zorammuana chuan a hawng a, sumdawnna hmun pawimawh tak New Champhai kawn-a ATM Booth thar awm chuan mipuite tan remchang a siam ngei a beisei thu a sawi bawk. He hunah hian S.Lalrinawma, Master Franchisee pawhin ATM Booth hawn a nih theih nana an hmalak dan sawiin, Mizoram District thenkhat ah Vakrangee Kendra, ATM hi hawn tura buatsaih mek thu a sawi a. Mizoram chhungah ATM 30 vel hawn theih beisei a nih thu leh Booking 11 a awm thu a sawi a, kumin October thla chhung hian Aizawl leh Lungleiah te hawn hman an tum thu a sawi bawk.

Karnataka sawrkar hnuaia Revenue Department kalphung zirchiang turin Land Revenue and Settlement Minister B. Lalchhanzova chuan niminpiah khan Karnataka a thleng a, nimin khan Karnataka Revenue Minister Krishna Byre Gowda chu a pisa, Vikasa Soudha-ah hmuin State pahnih te in laichinna ti chak tura thawh-puiah sawmin, Karnataka-ah a bikin Bengaluru khawpui ah Mizo thahnem tak an awm ve thu leh a tul anga an thlavang lo hauh thin turin a chah a. An sawrkar tirh atanga an lo ruahman tawh tih hlawhtlin ani chu a lawmthu sawiin, Karnataka State chu India ram State zinga Land Revenue administration nei tha leh technology thar hmang tangkai ber te zing ami anih anga tlawh annih thu a sawi bawk.

Chief Minister Lalduhoma chuan nizan hmasa khan New Delhi-ah Assam Rifles Director General Vikas Lakhera hmu in Mizorama venhimna chungchanga hmalakna tur hrang hrang an sawi dun a, he hunah hian tunhnaia P&E Minister F. Rodingliana leh Assam Rifles Checkpost duty inkara thil thleng chungchang an sawidun tura ngaih a ni a, Home Minister K. Sapdanga sawi danin Chief Minister Lalduhoma Delhi zin hian Assam Rifles Director General Vikas Lakhera nen an inkawm hunah P&E Minister F. Rodingliana leh Assam Rifles chungchang an sawi dawn a ni.

Food, Civil Supplies & Consumer Affairs Department chuan Ration buhfai man chungchang ah mipui lamah hriatchian loh a awm theih avangin hemi chungchang hi an sawifiah a. Ration buhfai man tihsan a nih tak avang hian October, 2024 Ration sem atangin Non-NFSA (Card Var) beneficiary ten kg. ah Rs. 30/- zêla an lak tur thu sawiin, PHH (Card Pawl) beneficiary ten an Ration baka additional kg. 3 an lâk thin erawh chu a man ngai, kg khat ah Rs. 15/- zêlin in an la thung ang tih an tarlang a, buhfai man tihsan hi Mizo-ram pumah hman nghal tur a nih thu an tarlang bawk. Hei bakah hian tuna NFSA beneficiary revision (thlan that) neih mêk hi zawhfel a la nih loh avangin October, 2024 thla hi tuna Ration Card an neih lai mêk angin Ration buhfai hi la lak tur a nih thu leh Office Order dinglai angin Retailer ten mipui-ah buhfai bûk tling ngei an pêk theih nan Supply Godown atangin bûk tling ngeiin buhfai an phur chhuak tur a ni tih an tarlang bawk.

MNF Treasurer Lalruatkima chuan Local Council leh Village Council term pawh tawi chu a thlangtu mipuite zahlohna niin a sawi.