Lenkawl

 

United Pentecostal Church (UPC) North East India Serchhip Pastor Bial Pentecostal Youth Department (PYD) buatsaih ‘Chhandamna Camping’ chu kar hmasa lam khan PC. Thankunga Camping Centre-a neih a nih hnuah nizan atang khan a hmun ngaiah a chhawng hnihna neih tan leh a ni a, Speaker atan Evan. R. Vanchhunga hman niin nizan a he thu buatsaih lai thleng hian Campers 36 an awm tawh a ni.

Mizoram Ranking Table Tennis Championship Kolasib 2024 khelh zawh takah Serchhip District atanga Table Tennis khel thiam te chuan Medal 11 an rawn hawn.

Local Administration Department (LAD) changtu Secretary Teresy Vanlalhruaii chuan Serchhip khua rawn tlawhin nimin khan Serchhip DC Pisa Pui Hall-ah Serchhip Town chhunga Village Council hrang hrangte kawmin an hmalakna chungchang an sawiho.

Serchhip-a Excise & Narcotics Department chuan nimin October 14, 2024 chhun khan Then-zawl khua ah Heroin nia hriat Hawng 5 an man leh a, hemi kaihhnawih ah hian Lalrinmawia (24) leh Mimi Lallawmzuali (34), Bazar Veng Thenzawl nia insawi te pawh man nghal an ni bawk. Nimin a END ten Heroin an man hi bawm 5-a dah niin a vaiin gram 62.12-a rit a ni a, heng an thil man kaihhnawiha mihring man te hi thubuai siam sak nghal an ni. Tarlan tawh angin Serchhip a Excise & Narcotics Department te hian Thenzawl ah bawk hian niminpiah khan Heroin hawng 6 an lo man tawh bawk a ni.

Kumin October 2 atanga hman ‘International Day of the Girl Child 2024’ kharna chu nimin khan Serchhip P&E Veng YMA Hall-ah neih a ni.

Serchhip District-ah nimin khan African Swine Fever (ASF) vanga Vawk thi 9 lai chhinchhiah belh niin Vawk 17 zet suat leh a ni bawk.

Mamit District chhunga Khanthuam khua ah tunhnai khan damlo an tam avangin Health Department-a thawktute chu a hmunah kalin damlo mi 167 te enfiah an ni a, Sample pasarih chu enfiah zui tura lak niin a result erawh hriat ala ni lo. Khanthuam khua hi In 50 vel awmna niin mihring 250 vel an cheng a, tunhnai khan Khawsik, Hritlang leh Khuh hnawk avangin damlo engemaw zat an awm a, hei hi sawrkar thuneitu ten an hriat veleh Mamit atangin Health Department- thawktu mi 6 te chu Khanthuam khua ah hian an kal a ni. Thudawn danin Khanthuam khua hi Tuikuk te chenna khua a ni a, lirthei a tlawhpawh theih loh niin West Phaileng atangin Salem Boarding-ah kalin heta tang hian Teirei, Khawhnai, Tuirum leh Kawrnului kaltlangin Khanthuam khua hi kal a ngai a ni.

ZPM President Lalliansawta chuan nimin khan Aizawl-a an Party Office-ah thu sawiin, “Party Office hmun tur atan Assam Rifles Biak In hi a sawi pawh kan sawi ri ngai lo a, kan inrawlh lo a ni,” a ti a. “Sawrkarna kan han chang a, Party Office nei lo ta chu, Party Office neih a tul thu kan sawi fo a, kan hotute rilru ah hual sa leh biak mek pawh kan nei a ni,” a ti a. Assam Rifles Biak In chu an sawi ri ngai lo hrim hrim nia sawiin, “Hei hi Zoram mipui hian min hriatpui se ka duh a ni. Assam Rifles te hi lo insawnchhuak dawn ta pawh nise, saw lai aia hmun tha leh remchang zawk hmun tam tak beisei tur a awm ngei ang,” tiin mi thenkhat ten mi rilru hruaikawi tuma Politics-a inbeihna atana an hmang chu pawi a tih thu a sawi bawk.

MNF party chuan nimin khan Aizawl-a Mizo Hnam Run-ah Chhung Inkhawm neiin Political Session-ah MNYF President Robert Romawia Royte chuan ZPM sawrkarin Mizo hnam issue pawimawh tak tak a ngaihthah chu pawi a tih thu a sawi a. “Mizoram leh Myanmar inkara zalen taka inkalpawh phalna Free Movement Regime (FMR) hlih chungchang te, Myanmar ramri hung chungchangte, thenawm ram leh State atanga Mizo raltlan ngaihven chung-changah te, Assam nena ramri chungchangah te Sawrkar anga Mizo hnam humhalh a tul em em laiin ZPM Sawrkar hian mipui beisei angin hma a la lo,” tiin Chief Minister in dawih aw a chhuah chu pawi a tih thu a sawi bawk.

Mizoram Middle School Teachers’ Association (MSTA) leh Mizoram Primary  Teachers’ Association (MPTA) te chuan PM Poshan Cook lawmman leh Material Cost an dawn loh chung-changah Cooking Cost leh Cook Honorarium an mamawh ang an la dawn loh avangin October 18, 2024 hnu lamah Mid-Day Meal an buat-saih thei tawh dawn lo tih School Education Director hnenah an thlen.

Mizoram sawrkar chuan Sawrkar hnathawkte chu Office Hour ngai pawimawh turin a hriattir. Hemi chungchangah hian tun thla ni 11 khan Chief Secretary chuan Office Memorandum tichhuakin Office Hour ngai pawimawh tura hriattirna tum engemaw zat chhuah a ni tawh chungin Officer leh Staff thenkhatte'n an zawm lo tih tarlan a ni a, “Sawrkar hnathawkte Office hour chhungin Office-ah an awm tluan tur a ni. He Office Memorandum hi zawm lo an awm a nih chuan an chungah Disciplinary Action lak a ni ang,” a ti. Chief Secretary chuan Office hour vawn dik chungchang ah Administrative Head of Department-te chuan an hnuaia Officer leh Staff-te an vil tur a ni tih tarlangin, “An hnuaia mite'n pisa kai hun chhung pisa-ah an awm tluan ngei theihna atan discipline an vawng tur a ni,” a ti bawk.

Nimin khan Chhief Secretary Dr. Renu Sharma khaihhruaiin Mizoram Secretariat Conference Hall-ah Secretaries Meeting neiin tun thla ni 30-a Prime Minister hova neih tur PRAGATI Meeting thlirlawkna neih a ni. NHIDCL hnuaia Highway siam mek leh SASCI hnuaia hnathawh hmabakte sawiho a ni bawk. Heng bakah hian Bana Kaih Policy leh Comprehensive Plan for Municipal Waste Management in Aizawl chung-changte pawh sawiho niin, Chief Secretary chuan Secretary te hmalaknaah lawmthu a sawi a, an hmabak ah sawrkar leh mipui tan tan la zel turin a fuih bawk.

ZPM kaihhruai sawrkar kal mekah Police hnathawk tha lo suspend mi 59 an awm tawh a, chung zinga a tam ber chu Zu ruih vanga suspend an ni.

Mizoram Consumer’s Union (MCU) chuan man chawia mipui phur lirthei ten State Transport Authority (STA) in chuanman a bithliah zawm lova an pawl rate siam ang zawma an tlan thin chu mipui sum dik lo taka rawkna a ni tih an sawi.

Sawrkar laipui-a Ministry of Agriculture and Farmers Welfare chuan kumin-a Mizoram-a Grape tharchhuah Metric Tonne 3640 chu kg khatah Rs. 50-in a lei sak dawn.

India rampum huapa ‘Best Tourism Village - Community based Category’ a lawmman dawngtu Sialsuk khawtlang hruaitute chu nimin khan Tourism Minister Lalrinpuii chuan an lawmman lak lawmpuina thingpui a inpui.

Mizoram sawrkar-a Minister Lalthansanga chuan sawrkar chu zawi zawiin kawng dik lam panin a in her mek niin a sawi.

Chief Minister Lalduhoma chuan nimin khan a Pisa-ah Excise & Narcotics Department hotute kawmin The Mizoram Liquor Prohibition Act, 2019 leh The Mizoram Liquor Prohibition Rules 2022 kenkawhnaa thil pawimawh thenkhatte bakah Dan hman mek tihphuisuina tur thenkhat a sawipui.

P&E Department Serchhip-a thawk C. Lalnunsanga (43) h/o Lalhmingmawii, P&E Veng chu nizan khan Electric in a man avangin a boral. Thudawn danin nizan (Oct. 13, 2024) zantir lam khan Ser-chhip Dinthar Veng-a Electric Transformer chu a chhia a, hemi siam tur hian C. Lalnunsanga (Tenuna) leh an thawhpui pakhat chu kalin Fuse a lo chhia a, hemi siam tura a khawih chu Electric hian a man a, Serchhip damdawi In panpui ni mah se a boral zui ta a ni. Tenuna hi Provisional Employee niin a ruang hi lumen a nih hnuah Vawiin-ah vuiliam a ni ang.

Serchhip-a Excise & Narcotics Department leh Central YMA Kumpuan Committee tangdun chuan nimin khan Thenzawl Venghlun-ah Heroin ni ngeia hriat Hawng ruk (6) an man a, a neitu nia hriat Evy Lalramhluni (34), Thenzawl Venghlun pawh manin thubuai siam sak nghal a ni. Tun tuma Heroin an man hi gram 75.82-a rit a ni. Thudawn danin tun tuma Heroin kaihnawiha an man Evy Lalramhluni kut atang hian Serchhip-a Excise & Narcotics Department chuan Sapzu, Royal  Stag um 36 bakah Beer can zahnih chuang chu September 26 khan an lo man tawh bawk a ni.

Serchhip-a Baptist Church of Mizoram (BCM) Pastor Bial pahnih te chuan nimin Pathianni hmang khan Rorel Inkhawm leh Bial Inkhawmpui an nei a, BCM Serchhip Pastor Bial ten BCM Biak In, Moria (Darnam Veng)-ah Rorel Inkhawm leh Bial Inkhawmpui hi neiini BCM New Serchhip ten BCM Biak In, New Serchhip-ah Rorel Inkhawm leh Bial Inkhawmpui hi an nei a ni.

Mizoram Synod hnuaia Inkhawmpui lian ber dawttu Presbytery Inkhawmpui chu nimin Pathianni hmang khan Mizoram Synod hnuaia Presbytery 47 awm zinga 41-ah neih a ni a, nimin Pathianni Inkhawm ah chawhma lamah Upa thlan thar te nemnghehna hun hman niin chawhnu lamah Upa thi te sunna hun hman a ni bawk. Chhimchhak Presbytery Inkhawmpui vawi 101-na Serchhip Kawnpui Kohhran-a neih ah nimin khan Upa 6 te nemngheh niin Upa boral mi 6 te sunna hun an hmang bawk a ni.

Mizoram Synod hnuaia Presbytery upa ber te zinga mi, Chhimchhak Presbytery in kum 100 a tlin lawmna chu Inrinni, October 12, 2024 khan Serchhip Kawnpui Kohhran Biak In-ah neih a ni a, Mizoram Synod Moderator Rev. R. Vanlalnghaka chuan Centenary lungphun hawngin dar vawi 100 vuak a ni a, nleng-a inkhawm neiin tlai lamah Centenary lawmna ruai theh nghal a ni.

Nimin khan Baktawng leh Chhuanthar Tlangnuam-ah te African Swine Fever (ASF) vanga Vawk thi pakhat ve ve awm belh lehin kumin hian Serchhip District-a ASF vanga Vawk thi chu 3424 a tling ta a ni.

Agriculture Minister leh Tuikum bialtu MLA PC. Vanlalruata chuan Inrinni khan a Bial chhung Chhuanthar Tlangnuam-ah ‘Khuangchawi Thla Vangpui Chhuanthar Futsal Hunpui’ a hawng.

Inrinni zan dar 9:00 vel khan Kawnpui Police Station-a duty te chuan an thudawn bawhzui-in Kolasib atanga Diesel leh Petrol phurtu lirthei pahnih an man.

Mizoram Truck Driver Association (MTDA), Mizoram Tipper neitu leh khalhtu pawl leh Eirawngbawlna Gas phurtu Mizoram Indane Driver Welfare te’n Vawiin atanga lirthei din tir an tum chu an sut.

Kumin January atanga October ni 6 thleng khan Mizoram-ah Dengue hri kai mi 449 hmuhchhuah a ni a, an zinga pakhat hian nunna a chan.

Mizoram-a African Swine Fever (ASF), Vawk pulhri leng mek chuan ziaawm lam a panin ni khata vawk thi pawh a tlem chho zel a, nimin khan Mizoram pumah vawk thi 6 chhinchhiah leh niin Vawk 21 suat leh a ni bawk a. Heti hian kumin hian Mizoram-ah khaw 245 te chu ASF hri lenna hmunah puan ni tawhin ASF vang hian Vawk 13,874 a thi tawh a, Vawk 23,251 suat a ni tawh bawk a ni.

Mizoram sawrkar-a Excise & Narcotics Department chuan kumin January thla atanga September thla tawp thleng khan Mizoram-ah Ganja kg 546.335 zet man tawhin kum khat chhunga an man tam ber kum a thleng mek a, January atanga May thla chhung khan kg 406.719 man hmanin hemi chhunga an man zat hi kumdang ah an la man phak ngai lo a ni. Excise & Narcotics Department chuan Mizoram-ah Ganja a hluar tih sawiin, tleirawl, kum lama la naupang zawkte’n ganja an zuk thin thu leh ganja dona kawngah khaw-tlang ah leh chhungkuaah tan lak a ngaih thu an sawi a, Ganja zu tam tak chuan changkanna ah ngaiin a that lohna leh hlauhawmna an hre lo nia a lan thu an sawi a, hei vang hian hemi kawng hawi hian inzirtir uar a tul tih an sawi bawk.

Mizoram-a Ration Card nei thin, Tripura lama Aadhar leh Ration Card thlunzawm vanga Jampui tlangdung, Phuldungsei khuaa Mizoram lama Ration la zui thei ta l ote chuan tun thlengin Mizoram-ah Ration an la la chhunzawm thei lo a. Food Civil Supply & Consumer Affairs (FCS &CA) tarlan danin, Tripura lama Aadhar leh Ration Card link tawhte chu Mizoram lama Ration Card Management System (RCMS)-ah an lut ve thei tawh lo a ni. Mizoram lam RCMS-a lut thei ta lote hi a tirah mi 85 an ni a, mobile seeding kalpuiah mi 256 lut thei lo an awm a. Mobile Seeding kalpui a nih avangin Tripura-a Aadhar leh Ration Card link tawhte chu Mizoram RCMS-ah dah luh theih an ni tawh rih lo a ni.

MNF Thalaite chuan Aizawl Zarkawt-a High School Field a chhawnga sak mek chu Inrinni khan an tlawh tih an sawi.

Mizo Zirlai Pawl (MZP) chuan tunhnaia sawrkar Department hrang hranga Officer Pension tawh rawih nawn leh pension tawh mai tur ruai nawn tura File kal lai a awm nia hria-in, hmalak an tum tih an sawi.

Thla thar November ni 5-a Sinlung Hills Council inthlan vawi hnihna lo awm tura chuh tum mi 50 te Nomination paper chu enfiah niin pawm vek a ni.

PWD Minister Vanlalhlana chuan Bana Kaih kaih Policy hnuaia thawktu thlante'n an hna thawhna tur pawisa an puk anga, sawrkar chu guarantor-ah a tang dawn tih a sawi. Lily Veng Cultural & Drama Club (LCDC)-in Inrinni-a an dinchampha vawi 25-na (Silver Jubilee) lawmna Chaltlang Tourist Lodge-a an neih hmanpui-na-ah he thu hi sawiin Vanlalhlana chuan Mizoram Sawrkar chuan a flagship programme Bana Kaih Policy chu a taka kalpui turin September thla khan tlangzarh a nih thu leh thalai, mahni kutke-a ding turte tan ruahmanna hrang hrang awmin cheng nuai 50 thleng sumpai tanpuina pek theihna a awm dawn tih a sawi a. Loan anga kalin Sawrkar chu Guarantor-ah a tang dawn a, sum pai harsatna avanga tun tangka kum kal lai mek hi insawhngheh kum a puan a nih avangin kumin tangka kum bikah chuan Pilot Project angin kalpui rih phawt tur a nih thu a sawi bawk.

Mizoram Police chuan kum 10 kalta, kum 2014 atanga kum 2023 inkar chhung khan thubuai 30,036 an ziaklut a. Police thubuai ziahluh zingah hian IPC hnuaiah Rukruk Case a tam ber a, Non-IPC hnuaiah Zu khapna dan, Prohibition/MLTP Act bawhchhia an tam ber thung.

Union Defence Minister Rajnath Singh chuan State leh Union Territory 11-a Border Roads Organisation (BRO) hnathawh 75 te chu Inrinni khan hawngin heng zingah hian Lawngtlai to Diltlang Parva Road a Lei siam chu a tel a ni.

Tun sawrkar ZPM kaihhruai kal mekah Police hnathawk tha lo suspend mi 59 an awm tawh a, chung zinga a tam ber chu Zu ruih vanga suspend an ni.

Natna benvawn hrang hrang avanga damlo, dinhmun hniam leh thih hlauhawma ding mekten rilru hahdam leh zangkhai zawka hun an hman theih nan sawrkar chuan Palliative Care Unit a din a, Mizoram-ah chuan Palliative Care hi Serchhip leh District thar pathum tih loh District dang zawngah chuan kalpui a ni tawh nia thudawn a ni.

 

Right to Information (RTI) Act chungchang inzirtirna atana hman thin, ‘Right to Information Week 2024’ hawnna chu nimin khan hmun hrang hrangah neih niin Serchhip-ah pawh Addl. DC Lalrinzuala hovin he Hapta hawnna hi neih a ni a. Aizawl-a he ni hman ah ‘RTI Excellence Award 2024’ sem a ni.

Mizoram Synod hnuaia Presbytery upa ber te zinga mi, Chhimchhak Presbytery in kum 100 a tlin lawmna chu Vawiin hian Serchhip Kawnpui Kohhran Biak In-ah neih a ni dawn a, chawhma dar 10:00-ah Mizoram Synod Moderator Rev. R. Vanlalnghaka chuan Centenary Lungphun hawngin Jubilee dar vawi 100 vuak a ni anga, hemi hnu hian Pathian Biak Inkhawm neih zui a ni ang.

Serchhip District-ah Ui khuahkhirhna siam thar niin khawlaia Ui tla leh a nghawnga hrui/chain-a thlunna awm lo te chu neitu awm lo anga ngaih a ni ang.

Serchhip District-a African Swine Fever (ASF) hri leng chuan ziaawm lam a pan hret hret zel niin a lang a, nimin khan Serchhip District-ah ASF vanga Vawk thi chhinchhiah thar awm lovin khaw pathum-ah Vawk 11 suat a ni thung a, heng te hi Khawlailung-ah 7, Chhiahtlang-ah 3 leh Bak-tawng-ah pakhat te an ni. Heti hian kumin hian ASF vangin Serchhip District-ah Vawk 3419 thi tawhin Vawk 6934 suat a ni tawh bawk a, khaw 31-ah hri hi a leng hman a ni.

Serchhip District-a Quick Response Team (QRT) te chuan nimin khan chhiatna a lo thlena hliam tuar te bawihsawm dan zirna, Basic First Aid Training an nei.

Kumin December 9 atanga 14 chhung khian Serchhip-ah ‘International Paraglyding Accuracy Championship-2024 cum Air Sport Festival’ chu neih a ni dawn a, hemi chungchang hi nimin khan MASA General Hqrs. hruaitute chuan Chief Minister Lalduhoma sawipuiin, hlawhtling taka he hun buatsaih theih dan turte an sawipui a ni. International Paraglyding Accuracy Championship-2024 cum Air Sport Festival-a tel tur hian ram 8 tangin mi 31 te chuan an hming an pelut tawh a, he Championship neih rual hian mipuite tan Paraglyding hmanga thlaw theihna bakah Rs. 300 vel chawia Balloon lian mi phur thei ( Hot Air balloon) hmanga thlawh theihna pawh buatsaih tum a ni bawk.

Food, Civil Supplies & Consumer Affairs Department chuan Mizoram-ah Petrol, Diesel leh LPG te hi mumal takin a rawn thleng lût reng tih sawiin, Fur ruahtui tam avangin kawng te'n duh thu a sam lova, kalkawngah a rawn phurtu motor-te an rawn thang rei deuh thin mah se Mizoram-a rawn phurhluh leh a thlengte chu a pangngai reng tih an sawi a. Mipuite'n mahni hmasiala mamawh zat aia tam Petrol leh Diesel-te kan chhekkhawl thin avangin mipui tam zawk tan harsatna kan siam thin tih pawh sawiin, Petrol, Diesel leh LPG te inchuh buai a awm loh nan mipuite chu mahni mamawh ang chin chauh la turin an ngen bawk.

Mizoram sawrkar in Bana kaih Scheme a kalpui turah Progress Partner-ni tura dilna 1003 zet Portal-ah a lut tawh a, heng mite hmalak tumna senso chu cheng vbc. 182.11 a tling tawh a ni. Dilna zingah hian Commerce & Industries Department-a lut tam berin dilna 425 a lut tawh a, AH&Vety Department hnuaiah dilna 304 a lut tawh bawk tih nimin-a District Agricultural Marketing Committee-te tan ‘Bana Kaih Scheme chungchang zirhona ah tarlan a ni.

Social Welfare Minister Lalrinpuii hovin niminpiah khan State Commissioner for Persons with Disabilities, Women and Child Development leh Mizoram State Commission for Protection of Child Rights hotute chu thukhawmin Commissioner for Persons with Disabilities hnathawh tlangpui thlirin, Rights of Persons with Disabilities Act 2016 (RPwD) danin a phut anga rualbanlote tana hamthatna hrang hrang neih theihna tura hmalakna te an sawiho a. He hunah hian naupang humsual dai Special Home leh Observation Home a awm mekte enkawlna lama an harsatna te sawiho niin, Home chhunga zirna In siam belh leh Juvenile Justice Board-in naupang, tuna Special Home a awm mek te chu uluk zawk a ennawn leh nise an ti a, POCSO Act hnuaia hrem te chu thlir uluk lehzual tura tih a ni bawk.

Mizoram Governor Dr. Hari Babu Kam-bhampati chu damlohna avanga hun engemaw chen Hyderabad lama a inenkawl hnuah tunkar Nilaini, Oct. 9, 2024 khan Mizoram-ah rawn letin a hna a thawk chhunzawm leh tawh a. Nimin khan Chief Minister Lalduhoma chuan Governor hi a chenna Raj Bhavan-ah kanin dam taka a lo kir leh avangin lawmpuina a hlan a. Hriselna tha nei zel turin duhsakna a hlan a ni. Governor hian a inenkawlna kawngah Chief Minister-in a mamawh apiang a ngaihtuahsak avanga lawmthu lo sawiin, hma a sawn zel thu a hrilh bawk a ni.

Chief Minister Lalduhoma kaihhruaiin Centre for Environment & Social Justice hotute leh Taxation Department hotute chu thukhawmin Chhiah thar siam chuang lova sawrkar sum leh pai dinhmun tha zawka awm theih nana chhiah lak hawm tihpun dan tur an sawiho a. He Meeting-ah hian, State pawn atanga Mizorama sumdawng bungrua lo lut, GST pe si lo te dapchhuah leh fel fai zawka umzui dan tur te, Mizoram chhunga sumdawnna kalpui GST pe ngei tura ngaih, pe si lo an tam ni a lang te, GST hi bungrua ah chauh ni lova Services-ah pawh lak tur a nih thu leh Services Sector atanga chhiah pe lo an tam si nia a lan thu te bakah chhiah lama Mizoram hmasawnna tur thil dangte an sawi a ni.

Social Welfare Minister Lalrinpuii chuan Mizo hmeichhe zingah ruihhlo ngai tam zel chuan nawhchizawrhna a ti hluar tih sawiin, ruihhlo do kawngah mitin tanrual a ngai tih a sawi.

Lawngtlai District chhunga Tuithumhnar khaw mi Vanramnuama (40) chu ramhnuaiah thi-a hmuh a ni a, Sanghal in a beih avanga thi nia rin a ni.

Project Pushpak-a Chief Engineer Girish Prasad Singh chuan niminpiah khan Mizoram Governor Dr. Hari Babu Kambhampati chu hmuin Mizoram chhunga Border Road Organisation (BRO) hnuaia hmalakna leh hmachhawpte a hrilhfiah.

School Education Department chuan zirna In hrang hranga zirlai naupangin an tui mamawh chanve tal zirna In-ah an in theihna turin ‘Tui in Dar’ (Water Bell) vawi 2 aia tlem lo vaw theuh turin thupek a chhuah.

Mizoram Larsap Dr. Hari Babu Kambhampati chuan mipuite'n Bank hman tangkai dan leh hamthatna awmte an dawn theih nana inzirtirna kalpui nasat a tul thu a sawi.

National Highway-06 huamchhunga awm Khamrang to Kawnpui kawng siam mêk chu nimin khan PWD changtu Minister Vanlalhlana chuan a hmunah a tlawh.

Mizoram Commercial Vehicle Union (MCVU) chuan Oil man tihsan leh kawngchhia avanga an lungawi lohna lantirna atana October 14, 2024 atanga an lirtheite dintir an tum chu Chief Minister Lalduhoma ngenna avangin an thulh rih thu an sawi.

Chhiahtlang atanga Keitum thlenga National Highway-54 siamtu NHIDCL leh Contractor te chu an contract chungchangah leh Court hmaah harsatna an hmachhawn lohna turin a tha thei ang bera siamthat hna rang taka thawk tura hriattir an ni.

Nimin October 10, 2024 kha ‘World Mental Health Day’ niin Serchhip District leh hmun hrang hrangah he ni pual hian hun hman a ni.

National Programme for Control of Blindness & Visual Impairment (NPCBVI) in kumtin October 10-a ‘World Sight Day’ an hman thin chu nimin khan Thenzawl-ah hmangin a thlawna Mit entirna neih nghal a ni.

Hrangturzo Bialtu MLA leh Adviser to Chief Minister Lalmuanpuia Punte chuan nimin khan a bial chhung North Vanlaiphai-ah Mizoram Cooperative Apex Bank (MCAB) Branch thar a hawng.

Serchhip District-ah nimin khan African Swine Fever (ASF) vanga Vawk thi khaw pathum ah chhinchhiah leh niin khaw pakhat-ah vawk suat a awm leh bawk.

Mizoram Presbyterian Kohhran Inkhawmpui lian ber dawttu Presbytery Inkhawmpui chu nimin atang khan Presbytery hrang hrang 41-ah neih ta ni a, tunkar Pathianni zan thleng khi a awh ang.

Serchhip Sub-Hqrs. YMA-a Training and Youth Affairs Committee chuan nimin khan Marian H/S Serchhip-ah Awareness Campaign an buatsaih.

Nimin tlai khan NGOCC leh Mizoram Commercial Vehicle Union (MCVU) te chu Aizawl-a Central YMA Committee Room-ah inkawmin tunhnaia Sawrkarin Oil man a tihsan chungchang leh a kaihhnawih bakah MCVU in karleh Thawhtanni atanga Oil man san leh kawng chhia avanga tlan loh an tum chungchang te an sawiho a. Tunkar Thawhlehni-a Chief Minister in NGOCC hruaitute hnenah Oil man tih to chungchang hi Cabinet Meeting thurel a nih avangin Cabinet Meeting bawkin a ngaihtuah leh a ngaih thu leh Cabinet meeting koh thuai a nih tur thu te, chumi chhung chuan ‘Kept in abeyance’a dah a nih tur thu a lo hrilh chu NGOCC hruaitu te chuan MCVU hruaitute an sawipui a. MCVU hruaitute chuan Oct. 12, 2024 ralhma in Sawrkarin MCVU hruaitute hnenah tawngka ngeiin a hmalak tum dan hrilhfiah se an ti thung a ni.

Power & Electricity Minister F. Rodingliana chuan nimin khan Tuivai Hydel Project siam tur hmalak mek chu tlawhin kawlphetha MW 180 tharchhuak thei tura tihpuitlin dan tur a hmunah a en.

Mizo Zirlai Pawl (MZP) General Hqrs. chuan nimin khan Executive Committee Meeting vawi 636-na neiin Commerce & Industries Department hnuaia Asst. Marketing Inspector post ruak pakhat hnawhkhahna tura hna lakah Interview tura koh mi 10 ten Interview-na tur hmun an thlen hnua Cancel thut chungchang ah October 16, 2024 ralhma ngeia Interview tura koh mi 10 te chu a ngai anga Interview kalpui a nih theihnan a hmala tura an phut thu an sawi a. Oct. 16 ralhmaa hmalakna a awm lo a nih chuan a tul angin Zirlaite leh thalai hna zawng mekte thlavang hauh turin na zawka hmalak relin, “Tute emaw thun tuma hmalakna ni thei tur anga Department hmalakna hi chhunzawm lo turin kan ngen,” an ti bawk.

Lawngtlai East Bialtu MLA leh Adviser to Chief Minister Dr. Lorrain Lalpekliana Chinzah chuan nimin khan Ngengpuilui-a Lei (Bridge) dawh thar chu a hawng a, he Lei hi Ngengpuikai (Lawngtlai District)  leh Khawmawi (Lunglei District) inkara awm niin meter 125-a thui a ni a, sawrkar laipui-a Ministry of Defence kaltlanga 71 RCC Border Roads Organization ten an dawh a ni.

Hnahthial District chhung Cherhlun khuaa Fur Zikhlum chingtute chuan an Zikhlum thar te an seng mek a, Cherhlun khua ah hian kumin hian chhungkaw 42 ten Zikhlum hi chingin Tin 40 hmun velah an ching a, an Zikhlum chin hi ‘Ryozeki variety’ niin a vanglaiin an khua ah hian kg. ah Rs. 25/- in hralhchhuah a ni. Cherhlun-ah hian Fur Zikhlum chin hi kum 2019 atang khan Horticulture Department hmalaknaa enchhinna neiin bul an lo tan pui tawh a. Nikum lamah quintal 900 vel tharin kuminah erawh nisa leh ruahin a tihchhiah nasat avangin quintal 700-800 vel thar an in beisei a ni.

Nimin khan Chief Secretary leh Single Window Clearance Authority-a Chairman Dr. Renu Sharma IAS hovin Single Window Clearance chungchang ah Department hrang hranga Secretary-te chu Chief Secretary Conference Room-ah an thukhawm a, Chief Secretary chuan Department tinte chu Single Window Portal kaltlanga Clearance leh Approval chak leh rang zawka pek a nih theih nan leh National Single Window System Portal-a onboard a nih thuai theihna tura chak zawka hma la turin a hriattir a ni. Single Window Clearance Authority hi Ease of Doing Business Act, 2022 leh Ease of Doing Business Rules, 2023 hmanga din a ni a. He Authority hian Single Window System portal kaltlanga sumdawng leh investors ten awlsam leh chak zawka approval leh clearance an lak zung zung theihna tura hmalakna kawnga thuneitu a ni.

PWD Minister Vanlalhlana chuan nimin khan a Pisa-ah PWD hotute leh NHIDLC aiawhte kawmin Mizoram-a kawngpui dinhmun a sawipui.

Mizoram-a infiammi 416 te hnenah niminpiah khan chawimawina Tangka fai, Incentive Cash Awards to Meritorious Sportsperson chu hlan a ni.

Home Minister K. Sapdanga chuan kumin August thla thleng chauhva Heroin man zat chu nikum chhung zawnga man zat thuak a ni tawh niin a sawi.

National Tobacco Control Programme (NTCP), National Health Mission, Mizoram buatsaih Tobacco Free Youth Campaign 2.0 chu nimin khan Health Minister Lalrinpuii chuan a Office Chamber-ah a tlangzarh.

Baptist Church of Mizoram (BCM) chuan nimin atang khan Bial Rorel Inkhawm an nei tan a, Serchhip Bial ten BCM Biak In, Moria-ah leh New Serchhip Bial ten BCM Biak In New Ser-chhip-ah te an nei a ni. BCM Bial Rorel Inkhawm neih mekah hian nimin khan Thalai Kristian Pawl (TKP) ten ro relin Vawiin leh naktuk-ah Baptist Mipa Pawl (BMP) leh Baptist Kohhran Hmeichhe Pawl (BKHM) ten ro an rel leh anga, Inrinni khian Bial Kohhran Rorel Inkhawm neih a ni ang.

Govt. Serchhip College-a thawklai Laldin-puia s/o PC. Bawithanga (L), Hmar Veng, Serchhip chuan Apex Professional University, Arunachal Pradesh atangin nimin khan Economics Subject-ah Doctorate Degree a hmu thar a, a Thesis chu ‘A study on Agriculture Crop Production and Marketing-an Overview of Serchhip District, Mizoram with reference to it's Economic Contribution’ tih a ni a, a Supervisor chu Prof. (Dr.) Nasir Ahmed Khan, Vice Chancellor, Apex Professional University, Pasighat, Arunachal Pradesh a ni.

Serchhip District chhung Lungpho khaw mi Lalthanmawii (29) chu nimin khan an fehna ah lung lum in fuh palhin hmunpui lam panpui a nih laiin a boral.

Kum 2022-a African Swine Fever (ASF) avanga Mizoram-a Vawk suat (culled) te hnena zangnadawmna semchhuah phalna pek a ni ta a, tun tumah hian Mizoram pum-a chhungkaw 1847 te hnenah zangnadawmna hi pek tur niin an sum dawn tur atanga za zela 25 pek phawt an ni anga, Serchhip District-ah pawh chhungkaw 59 te pek an ni ang.

Niminpiah (Oct. 8, 2024) tlai-a Keitum khua a leimin in chenna In pakhat leh In sak mek pakhat a hnawl te senghawi hnatlang chu nimin khan neih niin Serchhip Sub-Hqrs. YMA hruaitute chu hnatlang a thawkte hi tlawhin thingpui lumna tur sumfai an pe.

Serchhip District-a African Swine Fever (ASF) hri leng chuan ziaawm lam a pan zel a, nimin khan ASF vanga Vawk thi pakhat chhinchhiah niin Vawk suat pahnih chhinchhiah a ni bawk.

ZPM Val Upa Council chuan tunlaia Social Media-a thuthang, Zoram mipuite sawi hlawh em em, ‘ZPM Sawrkarin an Party office hmun atan Assam Rifles Biak In hmun lak an tum’ tih chungchangah niminpiah khan Lalmuanpuia Punte MLA chuan kawm tih sawiin, “He thuthang lo darh chhuah dan leh a sawi chhuaktuten tan chhan atana an hmante kimchang takin Lalmuanpuia hian a report a. Heta a thusawi hi thu dik pawm tlak leh fiah dawl tak niin kan hria,” tiin “A ni hi party office hmun zawng tura ruat zingah pawh a tel lo. Chuvang chuan ama thu thua Assam Rifles Biak In hmun lak sak tum anga sawi hi thil awm ang lo lutuk mimal hming tihchhiat tumna niah kan ngai a, pawi kan ti hle,” an ti bawk.

BJP Mizoram Pradesh chuan Central atanga Mizoram thalai te leh naupangte tana Infiamna lama hmasawnna tur, PFC atanga CSR Fund hmanga Aizawl FC Field tihchangtlunna tur nikum October 11-a pekchhuah tawh tun thlenga State sawrkar in ala hup bet chu pawi an tih thu nimin khan thuchhuah siamin an tarlang a. Central atanga thalai te hmakhua ngaia hmalakna hi a khaihlak anih chuan nakin zel ah hetiang Fund kan chan chhunzawm a hlauhawm hle nia an hriat thu sawiin, Mizoram sawrkar chu North Lungleng-a Aizawl FC Field tih chang-tlunna tur hi a rang thei ang bera tihfel sak tura Mizoram sawrkar leh Sports Minister chu an ngen thu an sawi bawk.

Mizoram Journalists' Association leh Home Department tangkawp buatsaihin Cyber Crime chungchang inzirtirna chu nimin khan Lawngtlai Press Club-ah neih a ni a, Adviser to Chief Minister leh Lawngtlai East Bialtu MLA Dr. Lorrain Lalpekliana Chinzah chuan khuallian niin a hmanpui a, Social Media hmangtuten midang pawisawi nan leh inbumna lam hawi atan hmang lovin, Social Media chu a tangkaina leh eizawnna bakah zirna te leh loneih leh thildang dangah tangkai taka hmantheih a nihna chu hman tangkai a tul thu a sawi bawk. He hunah hian Cyber Crime-a Deputy SP Jeremia Vanlalhmachhuana chuan Cyber Crime chungchang a zirtir a ni.

Mizoram Governor Indra Sena Reddy Nallu chuan nimin zing dar 4:30 khan Aizawl khawpuia ran talhna hmun, 'Modern Slauhter House, Mualpui' chu tlawhin hmalak dante a enfiah a, AH & Vety Department enkawl he ran talhna hmun hi kum 2013-ah hawn niin Pathianni tih loh kar tluanin ran talh thin a ni a, thla khatah ran 500-600 velh talh a ni tlangpui a, heng ran talh turte hi Vety Doctor-in an hriselna dinhmun an enfiah thin a ni. Governor Indra Sena Reddy Nallu chuan kan ei leh in te a hrisel tha em tih finfiah hmasak fo a tul thu sawiin, hemi atanga natna kai theihte laka fihlim tura tanlak a tul thu a sawi a. Ran talh tur reng rengte a hrisel em tih talh hma leh hnua enfiah zel a pawimawh thu sawiin, ran talhna hmun ni lova talh a awm loh nana hmalak a tul thu a sawi bakah Modern Slauhter House Mualpui chu a nihna ang taka mumal zawka kalpui a nih theih nana tan la turin thawktute a chah a ni. 

State Level NCORD meeting vawi 8-na chu niminpiah khan Chief Secretary Dr. Renu Sharma IAS hovin neih a ni.

Mizoram Teachers' Federation (MTF) hruaitute chuan nimin khan School Education Department changtu Minister Dr. Vanlalthlana chu kawmin MTF-te'n sawrkara an thu thlen duh hrang hrangte an thlen a, inpawhtlang takin an thu thlente hi an sawiho bawk a ni.

Mizoram-ah kumin September thleng khan lirthei 3,18,191 a awm a, heng zinga 2,21,851 (69.72%) chu Aizawl District-a awm a ni a. Lirthei zingah Two Wheeler tam berin lirthei awm zat atanga chhutin 68.56% a tling phak a ni.

Health & Family Welfare Department changtu Minister Lalrinpuii chuan State Drug Testing Laboratory chu a taka hman tangkai thuai a nih theih nan a tul anga hma la turin thawktute a chah.

Irrigation and Water Resources Department changtu Minister PC. Vanlalruata chuan tuihna leh tui humhalh chu mitin mawhphurhna a nih thu a sawi.

Serchhip District chhunga bawlhhlawh sawngbawl dan tur leh faina beihpui neih chhunzawm dan tur chu nimin khan District Bawrhsap Paul L. Khuma hovin sawiho a ni.

Tun thla ni 2 atanga hman ‘National Wildlife Week 2024’ hman chu nimin khan Thenzawl Forest Division-ah pawh a kharna hun hman a ni.

Chhimchhak Presbytery vawi 101-na leh Chimchhak Presbytery kum 100 tlin lawmna chu naktuk Oct. 9, 2024 atanga Pathianni zan thleng khian Serchhip Kawnpui Kohhran Biak In-ah neih a ni dawn a. Hemi chhunga lirthei che vel a buai loh nan leh a fel fai theih nan Serchhip SP chuan Serchhip Indoor Stadium kawt tual leh Synod Bookroom atanga chhim lam (Bazar lam) vantlang zun In inkar chu inkhawmpui Palaite tan Parking atan hman tur a ni tih thupek a chhuah a. Hei vang hian hemi hun chhung hian inkhawmpui palai ni lo tan helai hmunah hian motor dah theih a ni lo tih tarlangin, hei hian rikrum thil leh Dan leh thupek thil-a tul bik a awm chu a huam lo ang.

Serchhip Mat Phai, Zawlpui Zau-a Leilet then-khat a Buh te chu tunhnai khan natna in a bawm nia Report an dawn bawhzuiin nimin khan Serchhip District Agriculture Officer (DAO) Lalchharliana hovin Department-a thawktute chuan a hmunah an enfiah a. Leilet thenkhat ten an la tawrh nasat loh laiin Leilet thenkhat ah chuan a lo nasa hman viau tih Agriculture Department hotute chuan sawiin, a enkawl dan te  pawh an zirtir nghal a, a tul huna hman turin damdawi te pawh pek nghal an ni bawk. Serchhip Mat Phai-a buh chingtu zinga harsatna tawk zat hi chiang taka hriat theih an la ni lo a, a rang lama in report tura hriattir niin a tul angin hmalak zui a nih tur thu DAO chuan a sawi a. East Lungdar leh North Vanlaiphai Block lamah pawh thawktute an fehchhuak mek a ni.

 Serchhip District-a khaw pahnih ah nimin khan African Swine Fever (ASF) vanga Vawk thi 12 a awm belh leh a, heng te hi Chhiahtlang-ah 8 leh Baktawng-ah pali te an ni. Nimin vek khan Baktawng khua ah hian Vawk 4 suat ni bawkin khaw dangah Vawk suat a awm belh lo thung a ni. Heti hian nimin thleng khan Serchhip District-a khaw 31-ah ASF vangin Vawk 3414 a thi tawh a, Vawk 6919 suat ni tawh bawk.

Nimin tlai-a ruahsur avang khan Serchhip District-a Kei\um khua ah chenna In pakhat leh In sak lai pakhat chu lei tawlh in a hnawl a, In \henkhat pawh luahzui ngam lohin a awm bawk. Kei\um a\anga thu kan dawn danin chhiatna thlenna hmun hi Serchhip lam a\anga Kei\um luh tirh, Kei\um Thirphun kawn thlenhma ah a ni a, NH. 54 kawng thlanglam min chuan a thlanga Lalrengpuia In sak lai chu a hnawl chhe vek a, Rualthangvela te In luahlai pawh luahzui tlak lohin lei hian a hnawl awn bawk a, hei bakah hian a thlang lane pakhat-a In te pawh luahzui ngam loha awmin Vawiin hian khawtlang huap hnatlang neih a ni ang.

DEMOCRACY NGE THEOCRACY (Democracy or Theocracy) - Rev. Dr. Zaichhawna Hlawndo

Thla thar November 5-a Sinlung Hills Council Inthlanpui vawi 2-na neih tur atan Congress Party chuan an Candidate turte nimin khan an puang a, Seat 12-a inthlanna neih tur an chuh vek dawn a ni. BJP chuan he inthlanna neih tur atan hian Seach Committee dinin, Candidate duh ang an hmuh loh chuan an ding dawn lo tih an sawi a ni. He inthlan chuh tumte tan hian tun thla ni 10 thlengin Nomination paper thehluh theih a ni ang.

Kumin December 9-11 chhung khian LPS Arena, Falkland-ah Inchaipui neih a ni dawn a, inbuatsaihna kalpui mek a ni.

Saitual Police Station chuan nimin Oct. 8,. 2024 khan an kum 50 tlinna, Golden Jubilee an lawm a, Saitual Superintendent of Police (SP)  Pukhraj Kamal IPS chuan Jubilee lung khuh hawngin he hun hi a hmanpui a ni. Saitual Police Station hi kum 1974 khan din a ni a, tunah hian Police Station building chang-tlung tak nei tawhin, tun thleng hian Officer-in-Charge 36 in an thutchilh tawh a ni.

Mizoram sawrkar-a Information & Communication Technology (ICT) changtu Special Secretary Amit Sharma hovin nimin khan ICT Official te leh Telecom Service Provider (TSP) hrang hrangte chuan an hmalakna leh Mizoram a Mobile Connectivity/Service dinhmun an thlirho a, Lengpui Airport-ah tun aia Mobile Connectivity leh Service tha zawk a awm theih nan hma la tura tih an ni bawk.

Mizoram Commercial Vehicle Union (MCVU) General Headquarter Executive Meeting chuan karleh Thawhtanni, October ni 14, 2024 atangin Commercial Vehicle zawng zawng an ding dawn tih an an sawi.

Nimin khan LAD Minister C. Lalsawivunga hovin Aizawl-a Mizoram State Veterinary Council Conference Hall-ah ‘The Mizoram (Village Council) Draft Bill, 2024’ chungchanga inrawn-khawmna leh sawihona chu a tum hnihna atan neih leh a ni a. Tuna Village Council inenkawl nana kan hman mek, The Lushai Hills District (Village Council) Act, 1953 chu Mizoram UT a nih atang daih tawha hman a nih avang leh tunlai khawsakphung leh changkanna nen inhnerem lo tam tak a awm tawh avangin he dan hi ennawn a ngai tih he hunah hian sawilan a ni a. Ngaihdan hrang hrang sawiho niin kan ram mila democracy chhawmnung reng a kalpui zel ni se tih a ni bawk.

Chief Minister Lalduhoma chuan nimin khan a Office-ah Mizoram State Transport Authority kawmin Mizoram-a khualzin phur lirthei tihhmasawn dan tur an sawiho a, Home Minister K. Sapdanga, Transport Minister Vanlalhlana leh Supply Minister B. Lalchhanzova te pawh an tel a ni. State Transport Authority hian hma thar lak dan tur an ruahmanna - Online Cab Booking System chungchang te, Aizawl khawpui chhunga Maxi Cab lut thin te rel fel chungchang te, Maxi Cab service tam ber Sumo production a lo tawp tawh avangin Thingtlang Bazar Bus kan uar thar leh dawn nia an hriat thu leh chutiang hun a lo thlen huna inbuatsaih dan tur te an thlen a. Online Cab Booking system hi buaipui hmasak ni se tha an ti a ni. Hei bakah hian Passenger phur lirtheite tihhmasawnna tur thil dang te pawh an sawi bawk.

Mizoram-ah kumin September thleng khan lirthei 3,18,191 a awm a, heng zinga 2,21,851 (69.72%) chu Aizawl District-a awm a ni a. Lirthei zingah Two Wheeler tam berin lirthei awm zat atanga chhutin 68.56% a tling phak a ni.

National Health Mission hnuaia hmalakna pakhat, National TB Elimination Programme leh Piramal Swasthya tangkawp buatsaih ‘TB Free Workplace Initiative’ chu nimin khan Health Minister Lalrinpuii chuan a hawng.

Rural Development Department chuan an Department hnuaia Scheme hrang hrangte District leh Block Level-a Officer te'n an kalpui dan thlirletna hun nimin khan Aijal Club-ah an hmang a, he hun hi RD Minister Prof. Lalnilawma chuan khuallian niin a hmanpui a ni.

Sairang-a FCI Godown sak hna chawlh lailawk mek chungchanga harsatna awmte chinfel theih dan tur chu nimin khan Mizoram Governor chuan Land Revenue & Settlement (LR&S), Environment, Forests & Climate Change (EF&CC) leh Food Corporation of India (FCI) hotute a sawipui.

Serchhip District Hospital chawmtu Electric Transformer sawn tura hmalakna kal mekah Vawiin hian hna thawh chhunzawm leh a ni dawn a, hei vang hian Vawiin chawhma dar 10:00 atang hian Serchhip Switching Station (Control Room) atanga chhimlam zawng ten Power an hmu thei dawn lo a, hna thawh zawh a nih hma chuan Power hi pek theih a ni dawn lo a, P&E Department chuan mipuite hriatthiamna an ngen a ni.

Mizoram Journalists’ Association (MJA) in Mizoram District hrang hranga ‘Seminar on Cyber Crime’ an buatsaih tur hawnna hun chu nimin khan Serchhip Press Club-ah an buatsaih a, he hun hi Chief Minister leh Serchhip Bialtu MLA Lalduhoma chuan khuallian niin a hmanpui a ni.

Serchhip Bialtu MLA leh Chief Minister Lalduhoma chuan Serchhip District-a Head of Offices te chu a tul hun apiangah an tan biakpawh theih a nih thu a sawi.

Serchhip-a District Research Officer (DRO) Office in an chhinchhiahna atanga a lan danin thla kalta, September 2024 chhung khan Serchhip District-ah naupiang 53 awmin heng te hi mipa 22 leh hmeichhia 32 te an ni a, naupiang ah mipa aiin hmeichhia hi 10 in an tam zawk a ni. September thla chhung vek khan Serchhip District-ah mitthi 23 chhinchhiah an awm bawk a, heng te hi mipa 16 leh hmeichhia 7 niin mitthi zingah hian hmeichhia aiin mipa hi 9 laiin an tam zawk bawk a ni. September thla chhung khan Serchhip District-ah hian mitthi aiin naupiang hi 30 in an tam zawk a ni.

Serchhip District-ah nimin khan Vawk hri leng mek, African Swine Fever (ASF) vangin Vawk thi 8 chhinchhiah belh leh a ni a, heng te hi Chhiahtlang-ah 8 leh Baktawng-ah pahnih te a ni a, khaw pahnih-ah Vawk suat 8 bawk awmin Khawlailung khua ah 6 leh Baktawng-ah pahnih te an ni. Heti hian kumin chhungin Serchhip District-ah ASF vanga Vawk thi 3408 a awm tawh a, Vawk 6915 suat ni tawh bawkin khaw 31-a chhungkaw 2083 ten he hri hi an tuar tawh a ni.

NGO Co-Ordination Committee chuan Petrol leh Diesel hralhchhuahna atanga Chhiah tihpun chu tihniam leh turin hmalak an tum.

Pachhunga University College (PUC) chuan tun thla ni 10 thleng awh tur ‘Library Week’ an hmang mek a, nimin khan a hawnna neiin Mizoram University (MZU) Vice Chancellor Prof. Dibakar Chandra Deka chuan a hmanpui a ni. PUC hian Library-ah lehkhabu 63,287 an nei mek a, nitin mi 437 velin tlawh ziah ang an ni bawk.

Aizawl Zodin Assam Rifles Quarter Guard ep-a Mahatma Gandhi lim dah thin chu a dahna hmun siamthat a nih chhunga dahna, Pachhunga University College in awm zui zel se an duh avangin Mizoram sawrkar chuan MINECO Green Park-a dah tur Gandhi lim dang an siamtir a, dah theiha peihfel a ni tawh a ni.

UD&PA Minister K. Sapdanga chuan nimin khan Govt. Aizawl College, Mualpui-ah ‘Making Aizawl Liveable and Safety City’ tih thupui hmanga 'National Sumposium On Vision Aizawl City After 20 Years' chu a hmanpui a, “Vawiin a kan rilru put hmang leh awm dan hian kum 20 hnuah Aizawl khawpui awm dan tur a hril thui hle dawn,” tiin Zirlaite chu hna zawngtu ni lova hna siamtu nih tum zawk turin a fuih bawk.