NH. 54 laihzauh mekah zangnadawmna la tawh In la thiat si lo te thiah sak tan an ni
.jpeg)
National Highway-54 laihzauh leh siamthat hna thawh mek hi kumthar March 2024-a hawn hman ngei tuma hmalakna kal mekah Serchhip District chhunga he kawngpui in a paltlang tura ram nei, Dan anga sawrkar in a ram a lak sak leh zangnadawmna, Compensation leh Rehabilitation and Resettlement a pek tawh zingah mahni In la chhuahsan lo an awm avangin nimin khan Serchhip atangin Executive Magistrate Lalhruailiana Zote leh Dr. Albert Vanlalruata bakah Serchhip SDPO PB. Singh te chu Chhingchhip khuaa kalin, In la thiat lo te hi a hmunah tlawh leh a, In la thiat lo zinga mi Chhingchhip Venghlun-a Lalthuthlunga Hnamte S/o Lalnunthari te chuan an bungrua te lo thiarchhuak then mah se In hi an la thiah loh avangin khawl hmangin an In hi thiah sak an ni a. Thuneitute chuan he In neitute hian a hma lamin chhuanlam hrang hrang an lo siam tawh thu sawiin, tun tumah pawh hian District Bawrhsap in hun a pek belh thu leh karleh lamah chuan an thiah tur thu an lo sawi leh a, amaherawh chu a hmuna kal Executive Magistrate te chuan Dan anga hmalakna kalpui tur an nih thu sawiin an In thiah tur thenkhat chu khawl hmanga thiah sak an ni a, an In chak te hman zui theih tura an lak theihna turin a vai chuan thiah sak lovin Vawiin lam hian an lo thiah zui tur thu In neitute chuan an sawi a ni.
Nimin-a In pakhat thiah a nih hnu hian zangnadawmna la tawh, In la thiat lo nia chhinchhiah pahnih te chu tlawh nghal an ni a, pakhat hian an In hi a lo thiah mek avangin an hmalakna te enpui a nih hnuah lo thiat chhunzawm tura tih an ni a, Chhingchhip Mualpui-a chhungkaw pakhat chuan an In lo thiat fel tawhin hmalak zui ngai lo tura ngaih a ni a. In thenkhat hmalak zui tur pawh ala awm bawk nia thudawn a ni a, District thuneitute chuan zangnadawmna la tawh, mahni In la thiat lo te chungah dan anga hmalak chhunzawm zel a nih dawn thu an sawi a ni.
Tarlan tawh thin angin Serchhip District-a NH. 54 laihzauh leh siamthat hna thawh mekah hian sawrkarin ram a lak fel tawh, compensation dawng tawh zinga za zela 93 chuan an In te an thiat fel tawh a, tunah hian In la thiat lo tlem an la awm avangin kumin July leh August thla khan heng mite hi Magistrate te chuan an In-ah kal chilhin an In thiat tura thupek, Eviction Notice pawh an lo pe tawh a. Hei mai bakah hian tun thla ni 22 khan Serchhip District Bawrhsap leh Competent Authority for Land Acquisition (CALA) David Lalthantluanga chuan a hmunah tlawhin an thiah loh chhan te a endik leh bawk a. Heng zinga then-khat te chu Dan anga an In te thiat tura hmalakna kalpui theih a nih avangin kar kalta chhunga an In te thiat tura hriattir leh an ni a, hemi hnua hma la la lo te chungah hetiang hian hmalak niin thubuai erawh siam sak an ni rih lo thung.
Comments
Post a Comment