Mizoram-a Oil Palm tharchhuah 20% vel thartu Nalzawl khua in Mizorma-ah Oil Palm an tharchhuak tam ber

Mamit District-a Nalzawl khua chu Mizoram-a Oil Palm tharchhuak tam ber khua nia hriat an ni a, Mizoram in kum khat-a Oil Palm a tharchhuah za zela 20 vel chu he khua atanga tharchhuah niin Mizoram mai bakah India hmarchhak-a khaw mal-a Oil Palm tharchhuak hnem ber nia hriat an ni bawk.

Mizoram-ah hian sawrkar hmalakna in kum 2005 vel atangin Oil Palm hi chin tan niin Oil Palm chin leh sawngbawl a nih theih nan December ni 2, 2004 khan ‘The Mizoram Oil Palm (Regulation & Processing) Act’ chu pawm a lo ni tawh bawk a, a tirah Company pathum- Godrej Agrovet Ltd., Ruchi Soya Industries Ltd. (Patanjali Foods Ltd. tia thlak) leh 3F ten District hrang hrangah chan insema hma lain Mizoram hmun tam takah Company ten kuthnathawktute hlawhtlinpui lo mahse, Godrej Agrovet Ltd. te hmalakna hnuaiah Kolasib leh Mamit District-ah chuan Vawiin thlengin Oil Palm hi hlawhtling takin kalpui mek a la ni a, heng District pahnih a Oil Palm tharchhuah te chu Bukvannei khua a Godrej Agrovet Ltd. te Oil Palm Mill-ah hralhin Company te hian Oil Palm hriak pawh kumtin Metric Tonne tam tak Mizoram pawnah an thawnchhuak reng a. Mizoram District dangah Oil Palm Mill bun theih a nih rih loh avangin District danga Oil Palm tharchhuak te pawhin Bukvannei-ah hian an tharchhuah te hi an hralh thin a ni.

Mamit District chhunga Nalzawl khua hi Mizoram-a Oil Palm tharchhuak tam ber khua nia hriat an ni a, Mizoram in kum khata Oil Palm a tharchhuah za zela 20 vel hi he khua in an thar niin an khuaa cheng zatve deuhthaw chu Oil Palm a innghat an ni a, huan nei zau deuh te phei chuan Oil Palm atangin thla tin sum cheng nuai 2 atanga nuai 7 te an lakluh bakah a la lut tlem pawl pawhin thla tin Rs. 20,000 - Rs. 50,000 vel an lalut a, Oil Palm ching ve lo te pawhin kumtluan in an thawh sen loh inhlawhna an nei tih an sawi a ni.

Nalzawl VCP Rinchungnunga chuan Oil Palm chinna kawngah hetianga hma an lak avang hian Mizoram mai ni lo, India hmarchhak ah pawh a khaw bila Oil Palm tharchhuak hnem ber an nih avangin Nalzawl chu ‘Oil Palm Village’ a nih thu a sawi a ni.