Inthlanpui result chak leh awmze nei zawka puanzar a nih theih dan tur sawihona neih a ni

Mizoram Assembly Inthlanpui-a Vote tla te chhiar huna Chanchinthar lakhawmtute hriat tur pawimawh hrang hrang sawihona chu nimin khan neih a ni.

ICT Conference Hall-a he sawihona hunah hian Meeting kaihruaitu Addl. CEO H.Lianzela chuan inthlang ram Democracy-a mipui aiawh thlan kawngah Media-te an pawimawh thu sawiin, Media-te hmakhua ngaipawimawhin ECI pawhin an tan ruahmanna a siam thin thu a sawi a. Boruak muanawm tak hnuaiah vote thlak a nih ang bawkin harsatna awm lova vote chhiar a nih theih nan leh mipuite'n result an hriat zung zung theihna turin ruahmanna felfai tak neih a tul a ni, a ti. Addl. CEO chuan General Observer bakah Constituency tin tan Counting Observer mi pakhat zel ECI in a ruat thu a sawiin, Mizoram-ah Counting Centre 13-ah Counting Hall 40 a awm dawn thu a tarlang a. Counting Hall 40 tan EVM Table 399 leh Postal Ballot Table 56-ah te Counting Personnel 4,000 chuangte'n December 3, 2023 zing dar 8:00 atangin vote an chhiar dawn thu a sawi a. Media chu mipui ngaihchan ber a nih dawn avangin hemi atana ruahmanna felfai tak lo nei lawk theuh turin a chah nghal bawk.

He hunah hian Counting Centre tinah Media Centre a awm tur thu leh hemi atang hian Information pek chhawn thin tur niin Media-te'n anmahni ruahmanna siam kaltlangin result an puangzar nghal zung zung thin dawn a. Media bikte tan ECI in Counting Centre-a luhphalna Authority Letter (AL) a siam sakte tan chauh luh phal a ni dawn a. Thuneitute ruahmanna siam ang zel chauha Counting Hall-a luh tur niin, thla la turte tan Video Long Shoot chauh lak phal a ni ang. Mobile phone leh Dan phal loh bungraw dang kenluh phal a ni dawn lo a, Counting Hall luh dawnin Media Centre-ah Mobile Phone dah zel tur niin, Media Centre-ah hian Mobile Phone hman theih a ni ang.

District tin tan DEO theuhte ruahmanna angin Media Centre buatsaih a ni a, Media mite tan he hmun hi information an lakna tur leh vote chhiar chhunga an innghahna tura ruahman a ni a, Information & Public Relations Officer-te’n an thutchilh reng dawn a. Meeting chuan DDK, AIR, ZONET leh LPS te inbunna tur bakah Interview Booth, Counting Centre tinah siam ni se an ti bawk a ni.