Kum thum chhungin Mizoram-ah ASF vanga Vawk thi leh suat 72,137 a a awm tawh

Vawk hri leng African Swine Fever (ASF) vangin Mizoram-ah Vawk thi 47,243 zet chhinchhiah ni tawhin Vawk 24,894 zet suat a ni tawh bawk a, ASF kaihhnawiha Mizoram-a Vawk thi leh suat tawh zawng zawng chu 72,137 a tling tawh a ni.

Mizoram-ah hian March 21, 2021-ah ASF vanga Vawk thi hi hriat tan niin kumin November ni 2 thleng khan ASF vanga Vawk thi hi ala awm a, November ni 3 hnu lamah Zirtawpni thleng khan ASF vanga Vawk thi hi chhinchhiah awm tawh lovin ASF hri leng avanga Vawk thi erawh a kum telin a tlahniam tawh nia thudawn a ni bawk.

Ram hrang hranga Vawk tam takin an thihpui tawh ASF hri hi Mizoram-ah kum 2021 khan hmuh tan niin March 21, 2021 atanga kumtawp December 31 thlengin ASF vanga Vawk thi 33,417 leh suat 12,568 awmin, a vaiin Vawk 45,985 chu ASF kaihhnawih ah hian a thi a. Nikum (2022)-ah khan February thla atangin ASF hri a darh leh a, nikum chhung khan Vawk 12,791 a thih bakah Vawk 11,594 suat a ni bawk a, kum 2022 chhunga ASF vanga Vawk thi leh suat zawng zawng chu 24,385 a tling a. Kumin bikah May 5 atangin Mizoram-ah ASF vanga Vawk thi awm lehin November 2, 2023 thlengin District pasarih-a khua leh Veng 33-ah Vawk 1,035 zet a thi a, ASF darh zel tur vèn nan Vawk 732 suat ni bawkin ASF vanga kumin a Vawk thi leh suat hi a vaiin 1,767 a tling tawh bawk a ni. Heti hian Mizoram-a ASF a léng tih finfiah a nih ni, March 21, 2021 atanga November 2, 2023 thleng khan Mizoram-ah ASF vangin Vawk 47,243 a thi tawh a, Vawk 24,894 suat a ni bawk a; ASF kaihhnawiha Mizorama Vawk thi leh suat tawh zawng zawng chu 72,137 a tling tawh a ni.

Mizoram-a ASF vanga Vawk thi zat hi a lèn tan atanga chhûtin kumtin a tlahniam a; ASF vanga Vawk thi leh suat zawng zawng 72,137 zinga 45,985 (63.75%) chu kum 2021-a mi a ni a. Kum 2022 khan Vawk thi leh suat 24,385 awmin hei hi Vawk thi leh suat tawh atangin 33.80% a ni a, kumin 2023-a Vawk thi 1,767 hi kum thum chhunga ASF vanga Vawk thi leh suat zawng zawng atangin 2.45% chauh a ni tawh a. ASF hei kai Vawk te hi enkawl dan mumal tak a awm loh avangin Vawk leh Vawksa atanga siam thildang te lakluh khap thin a ni a, tun dinhmunah chuan ASF hri leng hi a awm rih lo nia hriat a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man