Latest News

Chapchar Kut hlut dan ngaihtuah a tul

Image
Mizo ten Kut chi thum kan neih zinga tun thleng kan la hmanlar ber Chapchar Kut chu kumdang ang bawkin kan lo hmang zo leh ta a, kumin hian Serchhip bikah chuan thil thar leh danglam lutuk awm lovin mipui ten an beisei thin ang ngeiin ‘Phullem chung ah’ Chapchar Kut hi kan hmang a, kan Mual in min dawl zoin kumdang-a harsatna kan tawh thin tam tak kan tawk lo thung niin a lang a, mipuite pawhin kan Phullem kan roh in kan dimdawi hle a, hetiang bawk hian sawrkar in mipuite tana hmasawnna hna a thawh te hi neitu rilru pu in enkawl ila, a tichhetu ni lo a a venghimtu kan nih zui zel hi a tul hle a ni.

PWD Serchhip Division in kawngpui KM 365.81 enkawl mekin blacktop loh KM 27.845 a awm

PWD Serchhip Division-a hotute chuan an Division huamchhungah inkalpawhna kawngpui enkawllai KM 365.81-a thui an neih mek thu sawiin, heng zinga KM 337.967 te chu Blacktop tawh a ni tih an sawi a. PMSGY-III hnuaiah Khawlailung leh Hmunzawl inkar kawngpui chu Blacktop tura ruahman mek a nih thu an sawi bawk.

PWD Serchhip Division-a Sr. Executive Engineer, Er. Zirsangliana chuan PWD Serchhip Division ten kawngpui an enkawl mek dinhmun LENKAWL zawhna chhangin PWD in kawngpui an enkawl te hi chi hrang hranga then a nih thu a sawi a. State Highway hnuaiah kawngpui pakhat enkawllai an neih thu sawiin, hei hi Serchhip-Thenzawl-Buarpui Road a nih thu leh KM 14.96 a thui a nih thu a sawi a. Major District Road-ah kawngpui pakhat enkawl nei bawkin hei hi Keitum leh Artahkawn inkar kawngpui, KM 32.82 a thui a ni tih a sawi a. Other District Road-ah kawngpui enkawl pathum neiin heng te hi Biate-Artahkawn-North Vanlaiphai inkar kawng KM 42.444 a thui te, Chekawn leh North Vanlaiphai inkar kawng KM 19.608 a thui leh Biate leh Tuipui inkar kawng KM 16.290-a thui a nih thu a sawi a. Heng zinga KM 18.290 chu Serchhip District pawnlama awm a nih thu leh heng kawng te hi a vaia Blacktop vek a nih thu a sawi a ni.

PWD Serchhip Division-a Sr. EE chuan Satellite Town Road tia an vuah, khawchhung inkalpawhna kawngpui hrang hrang pawh an Division hnuaiah hian hlawm 123-a then a awm thu a sawi a. Heng zawng zawng hi KM 73.43-a thui niin heng zinga KM 66.93 chu Blacktop a nih thu leh la Blacktop loh KM 6.50-a thui a awm thu a sawi a. Village Road an tih hnuaiah KM 9.50-a thui kawng enkawl an neih thu sawiin, hei hi Khumthung leh Baktawng inkar kawng pahnih leh Serchhip atanga Zawlpui panna kawng hlawm hnih a then te a nih thu a sawi bawk.

PMGSY hnuaia kawngpui laih zawh tawh, Contractor te la enkawl mek pawh KM 84.37-a thui an Department hnuaiah a awm thu Er. Zirsangliana chuan sawiin, heng te hi East Lungdar leh Sailulak inkar kawng KM 17.91 a thui te; Chekawn leh Lungchhuan inkar KM 3.68-a thui te; Chhingchhip-Thentlang-Sialhau kawng KM 12.80-a thui te, Chhingchhip atanga Hmuntha leh Khawbel kawng KM 39.55-a thui te; Khawlailung leh Piler inkar KM 4.24 a thui leh Chekawn leh Sialsir inkar KM 6.20-a thui te a nih thu a sawi bawk.

Heng bakah hian PMGSY hnuaia hnathawh lai pathum enkawl mek an neih thu pawh sawiin, heng te hi Chhingchhip leh Hualtu inkar kawng te; Chhingchhip-Thentlang-Sialhau (Tuikum Bridge Thentlang) leh Serchhip leh Hriangtlang inkar kawng te a nih thu a sawi a. Heng kawngpui an enkawl zawng zawng thui zawng hi KM 365.81 niin heng zinga KM 337.967 te chu Blacktop niin KM 27.845 te chu la Blacktop loh a nih thu a sawi a. Blacktop loh zingah hian KM 21.35-a thui Serchhip leh Hriangtlang inkar kawng a tel a. PWD Serchhip Division in Serchhip District pawnlam a kawngpui an enkawl KM 18.290 a awm bawk a ni.

Serchhip-a PWD hotute chuan PMGSY hnuaia hmalakna hrang hrang te thawh mek a nih laiin PMGSY-III hnuaiah Khawlailung atanga Hmun-zawl kaltlanga Lungpho kawngpui Blacktop hna chu thawh leh tura ruahman mek a nih thu leh hna pawh tan thuai beisei a nih thu an sawi bawk.

Heng bakah hian Mizoram sawrkar chuan Keitum atanga Zawlsei thlengin NESID hnuaiah kawngpui laizau tura ruahmanna siam mek a nih thu leh tunah hian DPR pawh siam a nih tawh thu an sawi a. He kawngpui siam tur hian tuna kawngpui awmsa tam tak zawh leh dawn mah se paih then tur tam tak a awm avangin tuna Keitum leh Zawlsei inkar kawng awmsa aiin KM 30 vel dawn-a kawng hi tawi tawh tura beisei a ni tih an sawi bawk.

Comments

Popular News (Last 30 Days)