Nausen thi zat tehna ah Mizoram dinhmun tha ber

Sawrkar kum liam ta 2022-23 chhung khan Mizoram-ah nausen kum khat hnuailam thi 363 awmin nu nau chunga thi (Raicheh) mi 18 an awm bawk a. Sawrkar laipui atanga record tihchhuah thar berah chuan nausen thi zat tehnaah Mizoram dinhmun a tha ber a ni.

Mizoram sawrkar Health Department hnuaia Reproductive and Child Health (RCH) State Programme Officer Dr. Lily Chhakchhuak chuan Mizoram chu nausen sang khat zel atanga chhuta thi zat tehna, Infant Morality Rate (IMR)-ah India rama hniam ber, dinhmun tha ber a nih thu sawiin, IMR chu 18 a nih thu a sawi a, hemi ang hian nausen 1000 zelah 18 thi ang a ni a. Kum kalta 2021-2022 ah khan nausen thi 465 awmin IMR chu 24 a ni a, kum hmasa aiin kumin hian dinhmun a tha zawk a ni. Kum 2022-2023 chhung vek khan Nausen thla khat hnuailam thi 202 awmin Neonatal Mortality Rate (NMR) chu 10 a ni a, nausen 1000 zelah 10 thi ang niin hei hi kum hmasa a NMR 17 aiin a tha zawk bawk a ni.

Kum 2021-2022 chhung khan Mizorma-ah nu nau chunga thi (Raicheh) 25 awmin Maternal Mortality Rate (MMR) chu 131 a ni a, kum liamta 2022-2023 ah khan nu nau chunga thi 18 awmin MMR chu 90 niin nu 1,00,000 zelah 90 thi ang an ni bawk a, kum hmasa aiin MMR pawh hi tha zawkin kum kal mek 2023-2024 ah nu nau chunga thi 10 an awm leh tawh thung a ni.

Sawrkar laipui atanga Mizoram RCH dinhmun endiknaa dinhmun tarlanna, Sample Registration System (SRS)-ah kum 2017-18 khan Mizoram hi Nagaland nen an intluk viau a, SRS in a tarlan thar ber kum 2020-2021 ah Mizoram IMR chu 3 niin Mizoram IMR a hniam zawk tak avangin tunah chuan Mizoram chu India ramah IMR hniamna ber a nih thu Dr. Lily Chhakchhuak chuan a sawi bawk.

Hetihlai hian National Family Health Survey (NFHS) chhinchhiah dan chuan Mizorama nupa tuakin fa an neih zat chawhrual (Mizoram Total Fertility Rate) chu kum 2015-16 khan 2.3% a ni a, NFHS hnuhnung ber 2019-20 ah chuan 1.9%-ah a tla thla a. Chawhrualin Mizorama nupa tuak khatin fa pahnih an nei tling lo tihna a ni.