Clinical Establishment te dan anga chhinchhiah leh khuahkhirh dan chungchang sawiho

Kolasib District chhunga hriselna dinhmun enfiahna leh inentirna (Clinical Establishment)-te dan anga chhinchhiah leh khuahkhirh tura din, District Registering Authority (DRA) chu nimin khan an Chairman leh Kolasib District Bawrhsap John LT. Sanga hovin an thukhawm.

Kolasib DC Conference Hall-a thutkhawm neih ah hian District Bawrhsap chuan Mihring taksa hriselna dinhmun enfiahna (laboratory) chu natna chungchanga inenkawl zui zel dan tur hriltu a nih avangin a pawimawh thu leh, mihring himna leh hriselna khawih a nih angin Clinic leh Laboratory-te chu fimkhur taka kalpui a tul thu a sawi a. Thih leh dam inkar hriltu a nih theih avangin, mihring himna dah pawimawh hmasa ber chunga danin a phut anga Clinic leh Laboratory te kalpui zel turin Kolasib District chhunga Clinic leh Laboratory enkawltute chu a chah nghal bawk.

Kolasib CMO Office-in an chhinchhiah danin, tun dinhmunah Kolasib District chhungah sawrkar hriatpui Clinical Establishment 33 a awm mek a. Heng zinga 7 chu Government Establishment (District Hospital, Community Health Centre leh Primary Health Centre) niin, a dang 26 chu mimal din (Private) Laboratory leh Clinic a ni thung a. Nimin a thutkhawm ah hian DRA Convener, Kolasib District Senior Chief Medical Officer Dr. RK. Lalthlamuana chuan Clinical Establishment Act, 2010 hnuaia Clinical Establishment-te zawm tur tlangpui sawifiahin, Clinic leh Laboratory te chu DRA-ah an inziahluh (register) vek a, a him chin leh pawm theih chin (minimum standard) an phak ngei ngei a tul thu te a sawi bawk.

Sawrkar laipui dan siam, The Clinical Establishments (Registration and Regulation) Act, 2010 behchhanin Mizoram-a Clinical Establishment-te chhinchhiah, khuahkhirh leh vil zuina tur, The Mizoram Clinical Establishments (Registration and Regulation) Rules, 2014 chu Mizoram-ah hman a ni a. Mizoram Sawrkara Health & Family Welfare Department Commissioner & Secretary atanga lehkha dawn bawhzui leh Mizoram CE (R&R) Rules, 2014 Section 4(1) tlawh chhanin District Registering Authority chu November ni 16, 2023 khan din thar a ni.