Ruihhlo do kawngah YMA in theihtawp chhuah dawn

Central YMA President Lalhmachhuana chuan Mizoram run mektu ruihhlo do kawngah Central YMA in theihtawp a chhuah dawn tih a sawi.

Tunhnaia Central YMA hruaitu thlan thar te chuan nimin khan Aizawl-a Central YMA Committee Room-ah MJA Member te kawmin ram leh hnam tana hmachhawp leh thil pawimawh hrang hrang an sawiho a. He inkawmna kaihruaitu Central YMA President Lalhmachhuana chuan Mizo ten damdawi ang thoin Zu an chhiatpui tih sawiin, Rangvamual leh Phunchawng-a Zu Factory tam ta lutuk an vei thu a sawi a. Ruihhlo tih hian Drugs chu rilru-ah a lang lian thin tih sawiin, hei bakah hian Zu lam pawh ngaihtuah a ngai ta viau tih a sawi a. Rangvamual leh Phunchawng-a Zu Factory a tam ta lutuk chu a vei awm hle tih sawiin, helai hmuna Zu siam te hi a darh nasa nia a lan thu a sawi a, Zu tha in tur hmu zo lovin RV leh Phunchawng-a Zu siam an in lo thei si lo a. Heng hmuna Zu siamna te hi hnatlang neia vil leh deuh a tha ang em tih chu an ngaihtuah tih a sawi a, hetihrual hian mipuiin an tlin em tih erawh ngaihtuah a tul thu a sawi bawk.

Central YMA President sawi dan chuan, tunlai hian Mizoram-ah Heroin a tam hle a, tunhma-a Hawng khat (1) man a nih pawha hlawhtlinga an inngaih laiin tunah chuan kg. a man tur a tam tawh hle a. Myanmar leh Manipur buaina remchanga rawn hmang an awm theih avangin Manipur leh Myanmar-a Zohnahthlak hruaitute chu hnam inpumkhatna leh khawngaihna remchanga rawn hman tumte chu dim dawih an nih dawn loh thu hrilh hriat an ni tih a sawi a. Kil tin atangin ruihhlo doletna kawngah an thawkho anga, an tirem thei lo a nih pawhin nek tawm tura tan lak zel a ni dawn tih a sawi bawk. Hei bakah hian khawvel hmun hrang hranga cheng Zofaten tunah hian a takin inpumkhatna an nunpui mek niia lang chu thil lawmawm tak a nih thu a sawi bawk.

He inkawmna ah hian MJA President C. Lalrambuatsaiha pawhin YMA leh MJA chu thil tum inang, mahse, hnathawh dan inang lo mai an nih thu a sawi a, Chanchinbu mite chu tumah tih bik nei lo an ni tih sawiin, sawrkar a ni emaw YMA emaw pawh ni se, an tih that chuan an chhuah tha a, an tih chhiat chuan an ziak tha lo mai thin tih a sawi a. Ram leh hnam humhalh tih chu YMA-in Kumpuan atan tum engemawzat an hmang tawh tih pawh sawiin, tunah hian Mizoram leh hnam in kil hrang hrang atanga beihna a tawh avangin tun hi hman hun tak ni-a a hriat thu a sawi bawk.

Comments

Popular News (Last 30 Days)

Vawiin-ah HSSLC Exam result