Thla 7 chhungin chhiah Vbc. 671.11 (61.89%) hmu

Mizoram sawrkar a Taxation Department chuan kumin April atang October (thla sarih) chhungin mipuite atangin Chhiah chi hrang hrang Rs. 6,71,11,29,777 an hmu tling tawh a, hei hi sawrkar kum kal mek 2023-24 a chhiah hmuh beisei zat (target) cheng Vbc. 1,084.29 atangin zaa 61.89% a ni.

Taxation Department hian Chhiah chi li - GST, Profession Tax, Sales Tax leh Entertainment Tax an la thin ber a, kumin thla sarih chhungin GST-ah Rs. 5,73,34,84,346, Profession Tax-ah Rs. 9,15,01,707 leh Sales Tax-ah Rs. 88,20,12,294 la tawhin Entertainment Tax atanga hmuh an la nei lo a, Chhiah dang atangin Rs. 1,31,430 an hmu tawh bawk a ni.

Covid leng vangin kum 2020-21 chhung khan mimal leh sawrkar in harsatna hrang hrang an tawk a. Taxation Department pawhin Tax Revenue a hmuh thin angte a hmu pha lo nasa hle a. April, 2020-a an chhiah hmuh chu cheng vbc. 14.35 chiah a tling a. Hetiang dinhmuna an din avang hian kawng hrang hrangin tan an la a, Tax Return File lo te reminder-te pein, a theih ang angin an tanpui a. Tax Deduction at Source (contract hna atanga tax chhunluh)-te pawh theih ang anga chhuia hma an lak hnuah Covid lengte a lo ziaawm ta bawk nen, tun dinhmunah chuan Chhiah hmuh a tha chho leh tawh a, kum liam ta 2022-23 a chhiah hmuh zat chu cheng Vbc. 1,020.66 a ni.