Mizoram chhim lamah raltlan rawn lut leh

Tunhnai lawka Myanmar Chin State chhimlam Lailenpi khaw chhehvel Myanmar Indo Thlawhna te'n an bomb leh avangin Siaha District-ah raltlan 298 an rawn luh belh.

Home Department hotute sawi danin raltlan rawn luh belhte hi Siaha District-a Laki, Zawngling, Chapui, Ahmyipi, Mobyu, Siasi, Khopai leh Theiva khua-ah te an awm a, Laki leh Zawngling khua-ah te raltlan hi an tam ber niin Tuipang Police Station atanga thu thawn chuan a sawi a. Kar kalta Thawhlehni leh Nilaini khan Lailenpi khaw bulah sipai sawrkar do a rammute an awm ni a hriain Myanmar Indo Thlawhna ten mipui awmna khaw hnaih ramngaw velah bomb an thlak chiam a. Hemi avanga ralkhel a, Mizoram lama rawn raltlan niin raltlante hi Mara hnam deuh vek ni a hriat a ni.

Chin National Army (CNA) kaihhruai 'Mipui tangrual sipai' ti a an vuahte hian Mizoram ramri hrula Myanmar Sipai Camp awmte chu an la fai deuh vek tawh a. Zokhawthar ep Khawmawi-ah chuan Mizoram lam atanga luh dawna 'Republic of the Union of Myanmar' tih intar pawh 'Welcome to Chinland' tih ziakin thlak a ni a, Myanmar hnam puanzar la thla-in CNA puanzar a inzar tawh bawk a ni.

Hetihlai hian Chin State khawpui ber Halkha bakah Falam, Matupui leh Thantlang khua-ah te chuan sipai an la inbun a. Mipui rorelna duhtu pawl intelkhawm hian an zalen tawhna-ah te hian sikul leh damdawi In bakah sawrkar fumfe taka kalpui turin ruahmanna an siam chho zel bawk a ni.