Zangnadawmna pek-a lungawilohna enfiah a ni

Lunglei leh Tlabung inkar National Highway-302 laihzauh hna thawh meka zangnadawmna an dawn zat-a lungawi lo te zualkona chhan chu a hmunah enfiah a ni.

National Highway-302 sial zauh leh laih that hna thawh mekah kawngpuiin a sutchhiat dawn vanga an In leh lo chântute hnenah zangnadawmna an dawn tur ang ang pek kim thawkhat a ni tawh a, hetihlai hian zangnadawmna an dawn tur zat an hmu lo nia in ngaiin chhungkaw 32-te chu Sawrkar-in Arbitrator tura a ruat hnenah an zualko a. NHIDCL hotute chuan pawisa an dawn tur zat dawng phak loa inngaite zualkona hi a hmunah enfiahin, Tlabung khawchhunga chhungkaw 32-te hi kawng sial a nih dawn vanga an ram chân tur an teh thatsak leh a. NHIDCL lam chuan an tih tur leh bawhzui theih ang ang chu an zofel tih sawiin, an thil neih hlutzawng an chhut mila zângnadawmna an pekchhuah danah fel lo a awm lo niin an sawi a, an ram hlutna bik chhut a nih danah erawh an lungawi lo a nih chuan an la zualko leh thei tih sawiin, chumi chinfel erawh Mizoram Sawrkar mawhphurhna a nih tawh tur thu an sawi a ni.

Lunglei leh Tlabung inkar NH 302 sial zauh leh laih that hna hi kum 2021 kum tawp lam khan thawh tan ni mah se, tun dinhmunah hna hi thawh zawh ala ni lo hle a, kumin thleng khan Fur ruahtui tlak tam lai phei chuan lirthei tana zawh hleih theih a nih loh avangin mipuite pawhin harsatna nasa tak an la tawk a ni.