Kum 18 chhunga ruihhlo vanga thi tam ber kum?

Kumin (2023) chhungin Mizoram-ah ruihhlo vangin mi 67 an thi tawh nia chhinchhiah a ni a, kum 18 kalta chhunga ruihhlo thihpui tam ber kum thleng thei dinhmun ah kan ding mek a ni.

Excise & Narcotics Department chhinchhiah danin, tun thla, November ni 9 thleng khan ruihhlo vangin Mizoram-ah mipa 56 leh hmeichhia 11, an vaiin mi 67 an thi tawh a, an zinga 66 te chu Heroin leh ruihhlo dang tihpawlh vanga thi an ni a, midang pakhat chu Heroin leh Alprazolam tih pawlh vanga thi a ni thung a. Chhinchhiahna atanga a lan danin kum 1984 atanga kumin thlengin Mizoram-ah ruihhlo vangin mi 1,803 an thi tawh a, an zinga 1,587 te chu mipa an ni a, hmeichhia 216-in an thi tawh bawk. 

Kum 2004 kha Mizoram-a ruihhlo vanga thi an tam ber tum niin mi 143 an thi a, heng te hi mipa 122 leh hmeichhia 21 niin khatih hunlai khan Proxyvon chu an thihpui tam ber a ni a, kum 2015 chho atangin ruihhlo vanga thi zingah Heroin vanga thi an tam tan a. Kum 2005 hnulam ah kum 2020 leh kumin hi ruihhlo vanga thi an tam leh ber tum niin mi 67 ve ve an thi tawh a, kumin ah thla khat chuang hun hman tur a la awm avangin ruihhlo vanga thi zat hi la pung theih dinhmunah a ding mek a, a pun belh a nih chuan kumin hi kum 18 kalta chhunga ruihhlo vanga thi an tam ber tum a ni dawn a ni.