Assam Police bo thu ah Assam IGP in Ngopa a tlawh

Mizoram Assembly Inthlanpui-a Duty tura rawn kal Assam Police Constable pakhat bo ta chungchang ngaihvenin Assam Police IGP Akhilesh Kumar Singh chuan Mizoram a rawn tlawh.

Tarlan tawh angin Assam Police-a Constable Sabin Nath (42) s/o Bigoi Nath, Assam hi Mizoram Assembly Inthlanpui-a Duty tura rawn kalin November 5, 2023 khan an inkulhna hmun Ngopa Middle School-II atanga uniform nena a chhuak chu hmuh zui a ni ta lo a. Mizo Dan angin khawtlang huapin ni 7 zawn ni mah se an hmu zui ta lo a ni.

Assam Police pakhat bo chungchang ah hian Assam IGP Akhilesh Kumar Singh chu Mizoram-ah rawn kalin nimin khan Ngopa khua hi a tlawh a, Saitual SP Pukhraj Kamal leh a thawhpuite'n lo tawiawmin Assam IGP chuan Ngopa khawtlang hruaitute a kawm a, Sabin Nath zawn kawnga an hmalakna-ah lawmthu a hrilh a, theihtawp chhuaha zawn chhunzawm zel turin a sawm bawk. Saitual SP Pukhraj Kamal chuan Sabin Nath hi a awmna chin hria te chu lawmman ah Rs. 20,000 pek a tiam a. A awmna kawhhmuh thei leh hria te chu Saitual Police Station emaw, Ngopa Police Station-a hriattir tura ngen an ni.