Winter Festival nei turin inbuatsaih mek a ni

Thla thar December ni 11 atanga ni 16 inkara Winter Festival ropui taka nei turin inbuatsaihna kalpui mek a ni.

Mizoram Tourism Department Deputy Secretary Zonunthari sawi danin, Winter Festival hi Aizawl Sipai Lammual-ah ropui takin intihhlimna hrang hrang nen buatsaih tum niin mi tam tak huap zo tura ruahman a ni a, he hunah hian tualchhunga thil tharchhuah te man tlawm zawka zawrhchhuah a ni dawn a. Winter Festival khuhhawnna atan December ni 7 khian Concert ropui tak buatsaih tum niin ram dang atanga zaithiam leh Mizo zaithiam tam tak zai ngaihthlak tur a awm dawn a ni. 

Tourism Department Deputy Secretary chuan zin mite hip tur chuan State chhungah mipui tam tak huapzo intihhlimna buatsaih tam a ngai tih sawiin, amaherawh chu tunah chuan ‘Festival’ a tam tawk thei rih lo a, Tourist-te mit la zawng leh thil tih chak zawng buatsaih tam a ngai a; Aizawl Sipai Lammual-a Winter Festival an buatsaih turah pawh zin mite hip thei thil chi hrang hrang buatsaih tum a ni, a ti a. Tourism chungchangah Mizote harh thar a ngai takzet tih a sawi bawk.

Mizoram Tourism Department Deputy Secretary Zonunthari chuan Tourism ngelnghet nei turin State-in nasa takin tan a lak mek thu pawh sawiin, kalphung pangngai tak a nei chho mek, a ti a. State chhunga thil tharchhuah bakah thil neih te humhim leh hnam ziarang tichhe si lova a mi cheng ten an hlawkpui theih tura hmasawn tum a ni, a ti a. Nakin zela Mizoram chu zinmite tana tlawh chakawm thei turin siam tum a nih thu a sawi bawk.