Mizoram Assembly Inthlanpui-a Vote tla te Dec. 3-a chhiar turin inbuatsaihna kalpui mek a ni

Mizoram State Assembly inthlanpuia vote tla te chhiar turin District tinah inbuatsaihna kalpui mek a ni a; Election Commission of India (ECI)-in ruahmanna a siam ang chuan thla thar December ni 3 khian mi 4000 chuang ten zing dar 8:00 atangin District khawpui tinah Vote tla hi an chhiar dawn a ni.

Election Department hotute chuan Assembly Inthlanpui-a vote tla te chhiar tur hian inbuatsaihna kalpui mek zel a nih thu sawiin, Vote chhiar turte leh tih tur hrang hrang nei te pawh tha taka training pek an ni a, venhimna lam thawktute leh hemi kaihhnawiha tel zawng zawng te pawh zirtirna hi pek vek an ni tawh bawk a ni. Mizoram Chief Electoral Officer (CEO) Madhup Vyas-a chuan vote chhiar huna an tih dan tur ang taka tihchhinna chu tunkar Ningani, November ni 30 khian ENCORE Portal kaltlangin neih a ni dawn tih a sawi a. Additional CEO H. Lianzela chuan Vote hi zing dar 8:00-ah chhiar tan tur a nih thu a sawi a, Postal Ballot chhiar hmasak a ni ang a, Postal Ballot-a vote tla te tihfel a nih hnu darkar chanve-ah EVM-a vote tlate chhiar tan a ni ang, a ti a. Vote chhiarnaah hian VVPAT-a lehkha tlate chhiar tel a ngaih thin avang leh vote tlate hi fimkhur taka chhiar a nih thin avangin Vote chhiar chhung hi a rei thin tih a sawi bawk.

Mizoram Assembly Inthlanpui-a Vote tla te chhiar nan hian Mizoram pumah Counting Center 13 awm tura ruahman niin, Mizoram-ah MLA Seat 40-a awm angin Counting Hall 40 buatsaih a ni a, Counting Hall tinte Counting Observer pakhat theuhvin vilin EVM Table 399 leh Postal Ballot Table 56 buatsaih a ni a, vote chhiar tur hian mi 4,000 chuang ruat an ni.

Hetihlai hian Mizoram DGP Anil Shukla-a chuan Vote tla te chhiar ni-ah tluang taka Vote chhiar a nih theihna turin venhimna kawnga Mizoram Police te tih tur tha taka inzirtir a nih tawh thu leh felfai tak leh dik taka vote chhiar a nih theih nan theihtawp an chhuah thu a sawi bawk a. Central Armed Police Forces (CAPF), Central Forces, IR Battalion leh Mizoram Police te venhimna hna thawk turin ruahman an ni, a ti bawk.