Mizoram-a tlanchhia Myanmar sipai thiarchhuak

Myanmar ramchhung Tuibual-a Myanmar Sipai Camp-a awm Mizoram-a rawn tlanchhiate chu nimin chawhma dar 11:00 vel khan Indian Air Force (IAF) Helicopter hmanga thiarchhuah an ni.

Nilaini kalta November ni 15 khan Champhai District-a Vaphai chhak lawk, Tuibual khuaa Myan-mar Sipai Camp chu Myanmar-a Mipui sipai, PDF ten an bei a, he Camp-a awm Myanmar sipai 29 te chu India ramah rawn tlanchhiain November ni 16 khan Mizoram Police, Assam Rifles leh Vaphai khawtlang hruaituten lo dawngsawngin, Assam Rifle Camp-ah dah an ni. Heng Myanmar sipaite hi Vaphai atang hian Helicopter hmanga phurh-chhuah tum ni thin mah se, khaw chinin a zir loh avangin phurchhuah theih lawk an niloa, nimin chhun khan Helicopter hmangin an ralthuam te nen phurhchhuah an ni ta a ni.

Myanmar sipai 29 te hi Manipur-a Moreh khua ah dahin, heta tang hian Myanmar sipai in an ram chhungah an hruai lut dawn ni a rin a ni a. Heti hian Mizoram leh Myanmar ramri a ‘Mipui Tangrual Pawl’ an tih maite leh Myanmar sipai inkahna avanga Mizoram a rawn tlanchhia Myanmar sipai 70 chuang chu kar khat chhungin an ram-a thawn let an ni ta a ni.

Tuibual Camp-a inkahna avangin Tiau lui chhak lawka awm Leilet khua hi Jet Fighter-a bomb thlak rin a nih avangin chhungkaw 63 vel chu Mizoram chhunga Saikhumphai-ah an rawn tlanchhia a, heng te pawh hi an khua ah an kir leh tawh a. Myanmar ramchhung Khawmawi leh Rih-khawdar Myanmar sipai hmun-a inkahna thleng avanga Mizoram-a raltlan rawn lut mi 5,000 bawr velte chu an kir leh deuh vek tawh niin Zokhaw-thar VCP Lalmuanpuia chuan a sawi a. Zan lama boruak tha lo a awm palh hlau engemaw zat erawh chu Zokhawthar lamah an la riak chhunzawm a, chhun lamah Myanmar lamah lutin hna te an thawk thung a.Boruak duhawmlo thleng erawh a awm zui rih lo nia thudawn a ni bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man