Taxation Department in kumin a Chhiah hmuh an beisei zatve aia tam an hmu tawh

Mizoram sawrkar-a Taxation Department chu sawrkar kum kal mekah Chhiah cheng vbc. 1000 chhunglut tura beisei niin tunah hian cheng vbc. 670 chuang an chhunglut tawh.

Taxation Department hotute sawi danin, State sawrkar sum bawm-a Chhiah an chhunluh theih dan hi chi li (4) a awm a, Goods & Service Tax (GST)-ah State-in amah-a a lak bakah Central in a lak State nen an insem dun a awm a; State-in a lak Value Added Tax (VAT) leh Professional Tax a awm bawk. Central nena intawm Integrated GST hi State sawrkar Chhiah lakluhna leh State sum lakluhna lian ber a ni a. Kumin Mizoram budget-a an Department-in Chhiah an lakkhawm atanga sawrkar sum-a lut tura beisei zat (target) chu cheng vaibelchhe 1000 a ni a. Sawrkar kum kal mekah tun thla 7 chhunga Chhiah an lakkhawm tawh hi cheng vbc. 670 chuang ni tawhin hei hi za zelah 67.11 a ni a, Chhiah lakkhawm atanga sum luh dan en chuan Budget Estimate hi khum ngei turah an inngai a, Revised Estimate erawh awm leh tura ngaih a ni tih an sawi bawk.

Taxation Deparrment hotute chuan State GST leh VAT-ah hian kum hmasa (2022- 2023) lama lakluh laiin kum kal mek (2023-2024) a lakluh a pung zawk ve ve laiin, Professional Tax-ah cheng vbc. 1.79 in a hniam zawk a; a chhan ber chu sawrkar hnathawk ten Professional Tax an pek tur hi instalment-in an pe thin a, kumina la pe kim lo an tam vang tih an sawi.

Zawhna chhangin Taxation Department hotute chuan, sawrkar kum kal mekah a thla mal ang pawha Chhiah lakluh a hniam deuh tum awm lovin a kang deuh char char zawk tih an sawi a. Chhiah tlingkhawm atanga State-in sum a hmuhna pui ber chu Integrated GST niin, hei hi sumdawng ho ten State pawn atanga bungrua an lakna atanga chhiah (GST) lut, Central leh State-in an insem leh thin a ni a; RBI kaltlangin Central hian State chan tur hi thlatin ni 27 emaw, ni 28 velah emaw a pechhawng ve leh thin tih an sawi. Tunhma ngaihtuahin tunhnaiah mipuiin chhiah pek an ngaipawimawh ve tawh hle tih pawh sawiin, tunhma chuan Professional Tax takngial pawh a hmuna kalchilh ngai khawpa a pe tur ten pek harsa an tih thin a ni tih an sawi a. Professional Tax pek ngai, pe duh lo reng te chu dan tlawhchhan hmangin an chungah hma a lak theih tih sawiin, an chawi tur pangngai let chawi tir emaw, lung In tan emaw thlenga hrem theih a ni tih an sawi.