Khawzawl-ah Cooperative Society zirhona neih a ni

Khawzawl District chhunga Cooperative Societies 29 hruaitute tan Mizoram State Cooperative Union (MSCU) hmalakna in niin khan Cooperative Society chungchang zirhona neih a ni.

Khawzawl District Function hnua District pum huapa Cooperative Societies te tana Training buatsaih hmasak ber hi Khawzawl District Bawrhsap K. Lalrohlua chuan hmanpuiin Khawzawl District a chengte chu Mizoram-ah a District angin taima berah a ngaih thu leh eizawnna kawngah Lakhuihthei, Tomato, Sapthei, Balhla, Sawhthing etc. te chu khaw hrang hrangah an tharchhuak nasa hle tih a sawi a, heng eizawnna peng hrang hrang te hian hma an sawn a, hma an lak chhoh zel theihna turin Society dinin Sawrkarah an in register a pawimawh tih a sawi a. Khawzawl District chu hmundang atangin Cooperation Department in an la hmui rih thu leh District Office dah a nih chuan DC Office-ah emaw thutna an ngaihtuah sak theih thu a sawi bawk.

Nimin-a Training-ah hian Khawzawl District huamchhunga Cooperative Societies 29 atangin hruaitu mi pathum zel tel tura sawm niin mi 87 an tel a, Thupui pahnih 'Primary Society nihphung leh inrelbawlna' leh 'Role and importance of Cooperative Leaders' tih hmangin mithiam ten zirtirna an pe a, Mizoram Coperative Apex Bank Chairman Lalnunsanga pawhin he hunah hian thu a sawi bawk a ni.