Hmeichhia aiin Mipa thi tam

Kum 13 kalta chhunga kum tin-a Mizorama thihna thlengah Hmeichhia aiin mipa an thi an tam zawk zel a, chawhrualin kumtin hmeichhe let hnih thuak mipa thi ziah ang a ni.

Mizoram sawrkar hnuaia Registrar of Births and Deaths-in MCCD-2022 (Medical Certification of Causes of Deaths 2022) a tihchhuahah hemi chungchang hi tarlan a ni a, MCCD-ah hian damdawi In-a enkawl damlo thi report-te chauh tarlan a ni a. Heng report-te hi sawrkar leh Private Hospital, UPHC, CHC, PHC leh Local Registrar of Births and Deaths (RBD), a vaiin Institutions 112 atanga dawn a ni.

Hetihlai hian Directorate of Economics & Statistics Mizoram-in Statistical Handook a tihchhuah thar ber (2022)-ah chuan kum 2021-a Mizorama thi zawng zawng zat chu mipa 5156 (63.6%) leh hmeichhia 2945(36.4%), an vaiin 8,101 a ni a, mipa leh hmeichhia inthlauhna hi 2,211 zet niin kum bithliah hrang hrang zingah kum 70 chung lam thi an tam ber a, mitthi chhinchhiah zawng zawng atangin 32.87% an tling a. Kum 55-64 inkar in dawtin 14.43% an tling a, kum 35-44 inkar 13.50% an tling bawk. Kum bithliah then hrang hrangah kum khat hnuailam te, kum khat atanga kum li inkarah te, kum nga leh 14 inkarah te mipa leh hmeichhe thi an inzat deuh tlangpui a, kum 15 leh 24 inkarah mipa thi 177 an nih laiin, hmeichhia 75 an thi a, kum 25 leh 34 inkarah mipa 455 leh hmeichhia 169 thi an awm a. Kum 35-44 inkarah mipa 820 leh hmeichhia 274 an thi bawk a ni.

MCCD report-ah hian kum 2022 leh a hmalam kum 13 chhunga mipa leh hmeichhe thi zat inthlauh dan tarlanah chuan, kum thum chhung- 2015, 2016 leh 2017-ah te mipa thi zat hi hmeichhe thi zat let hnih aia tam vek a ni a. Kum 2015 khan mipa thi zat 1871 (67.3%) a nih laiin hmeichhe thi zat chu 908 (32.7%) a ni a; kum 2016-ah mipa 1824 (67.4%) leh hmeichhia 880(32.6%) niin kum 2017-ah mipa 2062(68%) leh hmeichhia 972 (32%) a ni. Hmeichhia thi zat tam ber kum chu 2019 kha niin 38.3% a tling a ni.