Myanmar sipai 30 te Assam Rifles kutah inpe in Siaha District-ah raltlan rawn lut an pun belh zel

Myanmar sipai mi 30 te chu nimin khan Mizoram chhim lama Laki-a Assam Rifles te kutah an inpe a, hetihlai hian Myanmar ram buaina avang hian Mizoram-ah raltlan rawn lut an awm belh leh bawk a ni.

Thudawn danin Saiha District atanga hla lo te, Myanmar ramchhung Chin State-a Lailenpi khuaa Myanmar Sipai hmun chu CNA kaihhruaiin mipui sipai te chuan an bei leh a, Mipui Sipai lamah mi pahnih an thi nia hriat niin Myanmar Sipai lamah hian thi an awm leh awm loh erawh hriat a ni lo a, helai hmuna Myanmar Sipai awm mi 30 te chu nimin zing khan an sahimna atan Siaha District chhung Laki khuaa Assam Rifles te kutah an ralthuam te nen an inpe a, hemi hnu hian Tuipang-a Assam Rifles Camp thlenpui niin hemi hmalam-a Myanmar Sipai inpe te ang bawkin Helicopter hmanga hruaichhuah leh an nih rin a ni a, hruaichhuah an nih hun tur leh an ram-a thawnkir an nih hun tur erawh hriat a ni rih lo thung.

Tun tum hi tunhnaia Myanmar ramchhung Chin State-a inkahna thleng avanga Myanmar Sipai te India Sipai kut-ah an inpek tum thumna a ni a, Champhai District-a Zokhawthar-ah Myanmar Sipai mi 43 te chu tun thla ni 13 leh 14 khan Mizoram-ah rawn lutin Assam Rifles te chuan an lo thawnhaw tawh a, hemi hnu November 15 khan Tuibual khuaa Myanmar Sipai Camp beihna ah Myanmar Sipai 29 te chu India ramah rawn lut lehin Vaphai-ah lo dawnsawn an nih hnuah tun thla ni 19 khan Myanmar-ah thawnhaw an lo ni leh tawh bawk a. Heti hian tun thla chhungin Myanmar Sipai za chuang te chu India ramah rawn lutin thuneitute kutah an inpe tawh a. Mipui Sipai te hian Chin State huamchhung za zela 75 vel chu an thunun tawh nia sawi niin Sipai awmna beiin ram an lak belh zel nia tarlan a ni.

Hetihlai hian tunhnaia Myanmar ramchhung India nena inrina hnaih Lailenpi leh a chhehvela Myanmar sipai leh mipui sipai te nasa taka an inkah avang leh nasa taka Bomb te thlak anih avangin Myanmar mi thahnem tak chu India ramah raltlan in an rawn lut leh tawh a. Heng raltlan te hi Chapi, Zyhno leh Khaikhy te bakah Myanmar ramchhung ramri-a Rari khua ah te an tlan hlawm a, heng mite chhawmdawl nan hian Mara Chano Py (M.Ch.P) Siaha Town Branch hrang hrang ten thawmhnaw chi hrang mutbu leh silhfen dang thahnem tak an khawnkhawm a, Pic-up trip 4 bakah hian sum fai engemawzat an thawh bawk a. Heng mutbu leh thawmhnaw te semchhuah dan tur ngaihtuahin MTP Hqrs. chuan Vawiin hian thutkhawm an nei dawn a ni.