December 3, 2023-a Vote tla chhiar turin Serchhip District-ah inbuatsaihna kalpui mek a ni

Election Commission of India (ECI) in Mizoram Assembly Inthlanpui a Vote tla te chhiar hun tur a la sawn loh avangin thla thar December 3-a Vote tla te chhiar turin inbuatsaihna kalpui mek zel a ni a. Serchhip District-ah pawh Vote chhiar turte hi ruat ni tawhin tunkar Ningani khian Training buatsaih a ni ang.

Mizoram Assembly Inthlanpui-a Vote tla te chhiar hun atana Election Commission of India in December 3, 2023 a ruat chu Mizoram-a Political Party hrang hrangte bakah, Tlawmngai pawl hrang hrang leh Zirlai pawl Inzawmkhawm, NGO Coordination Committee chuan sawn turin Election Commission of India-ah ngenna thlen mah se tun thlenga sawn ala nih loh avangin Mizoram-a Election buaipuitute pawhin December ni 3 (Pathianni)-a vote chhiar turin hma an la mek a. CEO Office lam sawi dan chuan, ECI lamin an rilru an thlak dawn em tih an la hre lo a, chuvangin a hun bituk ngai anga chhiar turin Counting Hall pawh buatsaih a ni a. Tun thla November 23 leh 24 hian District tinah training buatsaih a ni ang.


Ruahmanna pangngai anga kaltlang a nih chuan vote tlate hi December 3, 2023 zing atanga chhiar tan tur a ni a. Bial hrang hranga Vote tlate chu an awmna District khawpui-ah zel chhiar tur niin Mamit-ah bial pathum, Kolasib-ah bial pathum, Aizawl-ah bial 12, Champhai-ah bial pathum, Serchhip-ah bial pathum, Lunglei-ah bial paruk, Lawngtlai-ah bial pathum, Siaha-ah bial pahnih, Saitual-ah bial pathum leh Khawzawl leh Hnahthialah bial pakhat ve ve chhiar a ni dawn a. Result tam zawk chu chhun laihawl-ah hriat theih beisei a ni.

Serchhip District chhunga Assembly Bial pathum-a Vote tla te Serchhip-a chhiar turin inbuatsaihna ngawrh taka kalpui mek zel a ni a, Serchhip District-a Assembly Bial pathum te tan hian Counting Hall a hran theuha siam niin 26-Serchhip (ST) AC-a Vote tla te chu Serchhip DC Conference Hall-a Counting Hall siam ah chhiar a ni anga. 27-Tuikum (ST) AC-a Vote tla te chu Serchhip DC Meeting Hall leh 28-Hrangturzo (ST) AC-a Vote tla te chu e-District Building-a Counting Hall siam ah te chhiar a ni dawn a ni.

Serchhip District-a Assembly Bial tin tana Counting Hall-ah hian Dawhkan 8 zel dah tur niin tum khat ah Polling Station 8 zel chhiar tur a ni dawn a, hemi ang hian Bial tin-a Vote tla te hi Round 4-ah chhiar zawh hman vek a ni dawn a, a Round 4-na ah hian Serchhip Bial-a Polling Station 5, Tuikum bial-a Polling Station 8 leh Hrangturzo Bial-a Polling Station pathum te chhiar a ni dawn a ni.

Vote tla te chhiar tur hian Dawhkan tinah Counting Supervisor, Counting Assistant leh Micro Observer mi pakhat theuh an awm a ngai dawn a, Vote chhiar turte hi ruat fel ni tawhin tunkar Ningani khian Serchhip-ah Training buatsaih tur a ni dawn a, a tuk Zirtawpni-ah 1st Randomization neiin hetah hian Dawhkan tin-a thu tur mi pakhat theuh bakah thlaveng tur bial tinah za zela 20 thlanchhuah an ni dawn a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man