Kumin ah lirthei ziahluh thar sing hnih chuang awm

Kumin January 1 atanga November 27 thleng khan Mizoram-ah lirthei registration tih thar sing hnih chuang a awm tawh a, heng zinga za zela 72.91 chu Aizawl DTO chhunga ziahluh thar a ni.

Ministry of Road Transport & Highways website-a tarlan a nih danin kumin January thla khan Mizoram-ah lirthei 2,340 registration tih thar awmin February thla-ah 2,243, March thla-ah 2,257, April thla-ah 2,024, May thla-ah 2,188, June thla-ah 2,329, July thla-ah 2,364, August thla-ah 2,514, September thla-ah 2,210, October thla-ah 2,681 leh November thla kal mekah 2,428 register thar a ni tawh a, kumina registration tihthar 25,578 zinga 18,649, za zela 72.91 chu Aizawl DTO chhunga ziahluh thar a ni.

Aizawl DTO hnuaiah hian kumin chhungin thla tin lirthei 1,400 aia tlem lo ziahluh thar ziah a ni a, January thla-ah lirthei ziahluh thar 1,573 awmin, February thla-ah pung leh hretin 1,577 ziahluh thar a ni leh a, March thlaah chuan lirthei ziahluh thar 1,644-ah a kai chho a, April thla-ah tlahniam hretin 1,452 ziahluh thar a ni bawk a. Kumin thla 11 chhunga lirthei ziahluh thar tlem ber thla chu May thla niin lirthei 1,597 ziahluh a ni a, June thla-ah 1,733, July thla-ah 1,719, August thla-ah 1,973, September thla-ah 1,615 ziah luh a ni a, lirthei registration tihthar tam ber thla October-ah 1,984 ziahluh niin, thla kal mek November-ah ni 27 thlengin lirthei registration tihthar 1,782 a awm tawh bawk a ni.

VAHAN dashboard-a tarlan a nih danin kumin-a lirthei registration tihthar zingah lirthei ke hnih nei a tam ber a, registration tihthar 18,523 a awm a, hei hi registration tihthar zawng zawng atanga chhutin za zela 72.41 a tling a, a dawtah chuan Car a ni a, Car ziahluh thar hi 4,286 a awm bawk a ni.